# Meng akaok thun tal ini, tỉnh Bình Định padang hu jang 77 kapul, nyaom gilai gul pataom taong mek kaya ikan angaok tasik ngan haong jaik 400 sruh gilai. Tal tukvak ini, tỉnh Bình Định padang hu jaik 400 kapul, nyaom ngan haong 1.500 sruh gilai. Piah pachreih urang taong ikan hu mbaok tame dom kapul nyaom gul pataom, pambuak bruk taong ikan angaok tasik, Ủy ban Bhap bani tỉnh Bình Định hu ralo sarak daong yau bảo hiểm rup gilai, bảo hiểm urang nao gilai.

# Pachreih tui bilan an toàn jalan mbak, Thành đoàn Đà Nẵng barau peih bruk pasram megru ka an toàn jalan mbak saong kỹ năng peih radaih an toàn ka labaih 300 urang đoàn, dam dara. Asal kadha di tal pasram megru tangi sua javap calei ka hukum jalan mbak saong peih radaih an toàn. Lambaok công ty Honda VN mai tacei pato kỹ năng peih radaih, jalan tuak mot bảo hiểm tuk daok la angaok radaih mô tô, radaih mac, langyah dom kadha rah tabiak tuk peih radaih angaok jalan mbak. Ayut Hoàng Võ Ngọc Anh, sinh viên Đại học Bách khoa Đà Nẵng brei thau: “Dahlak jeng khin payua tal taong abih dom ayut sinh viên dalam ban Đà Nẵng lac kol drei brei paglaong akaok saneng tuk peih radaih angaok jalan mbak. Kayua bala angaok jalan mbak di VN biak ralo. Danak dak ini hu daong ka kol drei paglaong akaok saneng tuk peih radaih angaok jalan mbak saong langyah angaok jalan nao, abih di nyu nan lac ndom puac tuk tabiak jalan”.

# Tỉnh Phú Yên bahrau peih nyaom biai peih tabiak bruk pacang, caga bala meng langik tasik saong roh duah urang njauk bala thun 2015. Meng akaok thun tal ini, pandiak bhang, thu lagu rah tabiak grauk labik, ngak kan kandah tal bruk ngak mbang pala drak di bhap bani dalam tỉnh. Piah pacang caga dom bala meng langik tasik, dalam bilan hajan ribuk thun ini, Ban tacei pato Pacang caga bala meng langik tasik saong Roh duah urang njauk bala tỉnh Phú Yên tacei pato gah chức năng saong dom puk palei pataom tame pasang iek, duah thau, samar pasiam veik dom công trình thủy lợi; patagok bruk khik iek ghe gilai; caga dom jalan ngak pak di labik. 

# Di tỉnh Bình Thuận, kapal cao tốc pajeng tuai angan Hưng Phát 26 hu peih mbang akaok meti meng pulao Phú Quý tame baoh taneh harei 11/9. Ini lac kapal barau abih kayua tư nhân ngak piah pabak ka bruk nao mai di bhap bini huyện pulao Phú Quý. Kapal Hưng Phát 26 atah jaik 45 m, praong 7 m 8. Kapal glaong 3 tal, hu ngak biak siam pajeng hu 250 tuai saong jaik 30 tấn pandap, yaok tuk nduac hu 20 hải lý, meda nduac hu dalam ngin khang tal pakat 9. Kapal cao tốc ini kayua công ty cổ phần pablei salih saong dịch vụ Hưng Phát (huyện pulao Phú Quý) buh jien tame ngak, yaom abih tih 55 tỷ đồng.  

# Nyaom darak thời trang dunya thun 2015 meda rah tabiak di Pasak parang iek saong nyaom darak Tân Bình, Bal raya Hồ Chí Minh, meng harei 18 tal 23/9/2015. Kuhria tal urak ini hu 200 gian hàng hu dom doanh nghiệp tut angan hu mbaok tame di angaok mblang taneh praong abih tih  labaih 4.000 m². daok asal kadha haong bruk praong di nyaom darak thun ini, ong Vũ Đức Giang – Akaok Kapul Jik pet Việt Nam, Akaok mban peih Nyaom darak thời trang dunya thun 2015 brei thau: Nyaom darak thun ini hu kadha karei nan lac khaol dahlak ba tabiak angan Sambo màu yam tame kayua thời trang thun ini di dunya tui jalan lac tanut prong. Kadua nan lac khaol dahlak pataom tame pachreih dom urang buh jien tame ngak lac urang negar langiu piah ngak habar pataom hu dom doanh nghiệp FDI rik daong ka gah  jik pet negar drei.

# Kayua langik tasik oh lagaih, abih di nyu nan pandiak dui atah saong kan kandah dalam bruk langyah ia kayua môi trường ia nan ye meng akaok thun tal ini hu jaik 14 ribau ha hadang raong dalam tỉnh Bạc Liêu njauk khat lahik. Dalam nan, hadang raong njauk khat lahik meblah meng 30 tal 70% jaik 10.700 ha, khat lahik labaih 70% nan lac labaih 3.000 ha. Anak bruk nan, gah chức năng tỉnh Bạc Liêu brei urang jakar trun tacei pato mikva jalan langyah, pasiam danao raong, tacei pato ilamu raong hadang piah patakik khat lihik dalam bilan raong barau.

# Bilan padai Hè thu 2015, urang nong tỉnh Tiền Giang pala drak hu labaih 70.000 ha padai. Tal tukvak ini, urang nong daok tame bilan yuak kuak ngan haong năng suất padai meng 5,5- 6 tấn sa ha, hu labik năng suất padai Hè thu jaik 7 tấn sa ha. Tui urang nong tỉnh Tiền Giang yaom padai jaik di ini tagok hasit meng 100- 200 đồng/kg. Ngan haong padai chất lượng glaong, urang mai blei di mblang hamu yaom jaik 6.000 đồng sa kg, padai karei meng 4.200- 4.300 đồng sa kg. Tui yaom yau ini, hadei di sa vụ padai urang nong laba hu jaik 15 triệu đồng sa ha.

Patui di ini dom khau tin dunya:

# Kapul padam pui khuah mban Ca-li-phoc-nia, ( gah pai taneh ia Mỹ) daok nduac pakacah saong tukvak piah padam dom mbang khuah glai meng dom harei tapa. Thống đốc mban Gie-ry Brao barau tabiak panuac peih praong bruk khẩn cấp ngan saong dom labik gah brak mban Caliphocnia, taphia di nan pandar panduan yaok ribau urang dahlau di tuk pui khuah tal dom khu dân cư. Di A-ma-đốt saong Ca-la-vê-rát, labik pui khuah meng harei 9/9, tal urak ini, khuah abih jaik 90 baoh sang saong njauk panduan nao 3 ribau 500 urang. Urak ini oh ka thau cambaih makna rah tabiak pui khuah.

#  Kuhria tal biar harei 13/9, mbang aia sua khang di bhum taneh gah Timur Nhật Bản ngak takik abih 5 urang metai, 22 urang lahik saong dauk lihik ralo sang danaok, ralo radaih. Tui Jabat khik iek bala meng langik tasik saong apui khuah Nhật Bản,  abih tih hu labaih 400 ribau urang hu panduan ba nao daok di labik karei. Thủ tướng Nhật Bản Sin-dô A-bê (Shinzo Abe) hu panuac lac, Raja-ei kham merat abih drei piah samar pasiam veik dom khut khat.

# Cảnh sát Áo brei thau, urang di cư tuh tame taneh ia ini dalam harei 13/9 nan lac 10 ribau urang, ralo di abih meng labaih sa adit tapa. Tui urang brei panuac cảnh sát Áo, sa tuk hu jaik 500 urang daok angaok jalan nao tal taneh ia Áo hadei di tuk nao tapa negar Hungary. Ralo dalam dom urang nan khin nao tal Đức piah likau tỵ nạn. Urak ini Áo saong Đức lac dua taneh ia châu âu brei thau lac taduan urang tỵ nạn nduac tabiak truh bruk mesruh metak di Xyry atau srau kadau di Trung Đông./.