Khaw tin dalam negar:

# Hadei di tuk nao tal Cu Ba, melam 26/3 tui tuk Việt Nam, Thủ tướng Nguyễn Tấn Dũng saong Kapul urang lambaok pakat glaong Việt Nam hu mai pok bingu pak Tượng đài Jose Marti dalam bal ine La Habana. Thủ tướng Raja-ei Nguyễn Tấn Dũng jeng hu mbang taom gaok, ngak bruk haong Phaok Akaok ka sa Hội đồng karja saong Hội đồng Bộ trưởng Cuba Mi-gên Di-át Ca-nên. Dua urang dang akaok pataom tame taong yaom talei pambuak bruk nao mai dalam bruk ngak mbang kinh tế, iek bruk nan yau asal kadha prong njauk hu Raja-ei dua negar ba tabiak ngak piah patagok ka nyu samu haong talei pambuak bruk chính trị saong pren khang di dua gah. Dua gah jeng brei mboh hatai kham merat peih ngak siam dom harak hu mboh tangin sanya blaoh pak Mbang nyaom 31 di Ủy ban 2 negar Việt Nam – Cuba pak Hà Nội, bilan 9/2013.

# Tổng cục Thống kê, mintri Kế hoạch saong Đầu tư brei thau : urak ini, bruk kuhria caga ka bruk dut iek dan so saong sang daok di kreh kỳ hu salah blaoh. Meng pagaiy harei 1/4 hu peih bruk dut iek dan so saong sang daok di labaih 11 rabau xã, phường, thị trấn dalam taneh ia. Ini lac bruk dut iek kreh dua mbang dut iek 2009-2019 dalam taneh ia saong yaok puk palei. Tukvak salah bruk dut iek tal harei 20/4.

# Mô hình mblang taneh pala tabau mẫu pandar jamriak di bhum pala tabau piah ngak saradang di tỉnh Phú Yên bahrau hu thu hoạch brei năng suất 110 tấn/ha, glaong jang năng suất bình quân yaok thun 40 tấn/ha; laba hu labaih 62 triệu đồng sa ha, glaong jang sa meteh dut haong jalan pala meng kan. Jalan ngak bahrau ini pambak pagam tame mac moc meng bruk ngak taneh tal pala, iek glang saong buh khak.

# Meng akaok thun tal ini, kapul iek glang, khik caga glai dalam tinh Binh Thuan hu langyah 166 dalam abih tih  210 mbang ngak suan adat hukum khik caga saong cakrok glai, rilo jang 12,3% duk saong dom bilan ini thun dahlau; mek labaih 172 m3 kayau dom janih gam saong rilo ridaih patuh saong dom pandap ngak suan karei, ba tame kadung jien karja jaik 900 triệu đồng. Dom gah chuc nang jeng hu langyah rilo bruk urang lih mek taneh glai suan hukum. Min, pak dom bruk praong, bhum taphia glai, bruk jah tak glai, methuh saong urang iek glang glai saong khik caga glai jeng daok rah tabiak catang.

# 3 bilan akaok thun ini, dom chỉ tiêu kinh tế - xã hội di bal raya Hồ Chí Minh daok patagok, taong abih pandap panda ngak tabiak dalam taneh ia kuhria mboh hu labaih 184.250 tỷ đồng, tagok 0,1% dut haong tukvak ini thun dahlau. Danak dak grap tanat darak pasar hu peih ngak siam, chỉ số yaom blei pandar dalam 3 bilan akaok thun tok tagok 0,18% dut haong bilan 12 thun 2013. Yau nan min, darak pasar daok gaok ralo kan kandah. Dalam 3 bilan tapa, urang dang akaok bal raya hu peih 8 mbang ngak bruk haong 400 doanh nghiệp saong dom thành phần kinh tế piah peih talaih kan kandah ka bruk ngak mbang pablei salih.

# Harei 27/03, Tạp chí Điện ảnh Việt Nam, Viện phim Việt Nam peih bruk tabiak mbaok danakdak phim tài liệu “ Urang tướng di bhapbini”. Ini lac sa dalam dom bruk thau dhar phuan dom urang ngak phim Việt Nam hadar tal Đại tướng Võ Nguyên Giáp. Bộ phim tai lieu nan hu quay di tỉnh Quảng Bình, ban ine Hà Nội. Tukvak tal, kapul ngak phim daok quay phim di ban raya Ho Chi Minh, Thừa Thiên Huế, Tây Nguyên… saong di harei roya pahadar 60 năm jayah Điện Biên Phủ harei 7/5/2014. Taphia nan, tphim hu pandar rilo tư liệu meng báo chí di tuk ngak ndam metai Đại tướng Võ Nguyên Giáp bilan 10/2013. “Urang tướng di bhapbini “ tui kuhria atah  50 minit saong hu ngak blaoh blai njauk di tuk pahadar 1 thun harei lahik Đại tướng Võ Nguyên Giáp.

# Page harei 27/3, Sở Pato megru bal raya Hồ Chí Minh hu peih họp báo ka Harei nyaom Pato megru patagok. Tui nan, harei nyaom ini meda hu peih ngak meng harei 22 tal 24/4 pak hội trường Thống Nhất, bal raya Hồ Chí Minh, ngan haong ralo bruk ngak yau: ginum biai ka bruk pabak ilamu ka gru pato, định hướng bruk ngak ka anek saih, meyaih khan dom danak dak tiên tiến, parang iek dom jak jeng di gah pato megru, tư vấn du học...Ini lac tukvak piah ka dom labik pato megru ba dom bruk ngak mai jaik jang haong dom anek saih saong amaik ame di anek saih.

# Nhật Bản saong Ô-xtrây-li-a oh ka njauk gauk ka bruk klak kak je pambuak tal rilo limo saong dom janih radaih ô tô dalam mbang taom gaok di akaok mintri pablei salih saong dau tu Ô-xtrây-li-a An-đriu Rób (Andrew Robb) saong akaok mintri ngak nong Nhật Bản Yô-xi-ma-xa Ha-ya-xi (Yoshimasa Hayashi), akaok mintri iek gah bruk ginum biai Hiệp định pablei salih Tự do (TPP) rah tabiak barau ini. Gah Ô-xtrây-li-a daok hu panuac ieu Nhật Bản patrun yaom kak je ngan saong rilo limo di Ô-xtrây-li-a meng 38,5% trun daok 19%, dalam tuk Nhật Bản brei panuac caong gah Ô-xtrây-li-a yah klak yaom kak je 5% ka ô tô di Nhật Bản.

# Bahrau ini, Pato Brunây Ha-sa-nan Bôn-ki-a (Hassanal Bolkiah) hu payua harak klah rabha pandik harao haong Thủ tướng Malaixia Ra-gíp Ra-dắc (Najib Razak) saong Akaok negar Trung Quốc Tập Cận Bình, negar hu 154 urang nao angaok baoh kapal haok lihik. Dalam dom kham merat pacok duah sruh kapal haok  daok lahik di Malaixia, hu panuac lac sruh kapal haok nan nyu njauk kol kanjhah jhak chap mek atau njauk khủng bố, min maong tui dom kadha bahrau kayua công ty vệ tinh In-mar-sat di negar Anh ba tabiak, raja-ei Malaixia mboh lac sruh kapal haok MH370 nyu laik trun gah meraong Ấn Độ Dương. Jabat duah thau di Malaixia hu padang sa nyaom roh duah pakat dunya piah ngak ka nyu cambaih laih bruk nan.

# Dalam sa harak pathau khan barau ini kayua pasak roh duah cakrok di rajaei Trung Quốc saong Gilang pariak sarak dunya pambuak bruk peih ngak brei thau : njom narek khong khi di Trung Quốc ngak ka jaik 500 rabau urang metai dahlau di thun saong ngak khat lahik yaok ratuh tỉ Đô la Mỹ yaok thun di Trung Quốc. Bruk đô thị hoá biak samal lac sa dalam dom makna ba tal nerak khong khi. Di thun 2013, dalam 74 ban roya di Trung Quốc tok hu 3 ban mek hu tanut khong khi hacih saat./.