Khaw tin 6h30 harei 07 -12-2015

/ UBMT negar ban sit Đồng hới (tỉnh Quảng Bình) brei thau, tapa 15 thun peih bruk jak ba “ harei ka urang kan kthaot” ban sit Đồng Hới jak ba hu labaih 12 tỷ đồng. Meng ngak siam bruk pathau khan, jak ba tal pandar siam kadung jien nan ye urak ni boh sang kan kathaot di ban sit Đồng Hới trun meng 6,7% thun 2000 dok 1% puac thun 2014.

# Yaom lac kayau nguyên liệu meng glai pala trun 100.000 đồng sa tấn duk saong atah di ini 2 bilan, min tui yaom urak ini lac 1,3 triệu đồng/sa tấn jeng daok hu laba yau nan ye urang nong tỉnh Phú Yên daok pala glai kinh tế. Tui Sở ngak nong saong patagok palei pala tỉnh Phú Yên, taneh pala glai kinh tế dalam tỉnh meng akoak bilan hajan tal urak ini labaih 3.260 ha saong meda tagok tal 3.600 ha. 

/ 5 thun tapa tỉnh Khánh Hòa ieu pataom hu labaih 1.198 tỷ đồng meng dom gah, padang ngak cơ sở hạ tầng, patagok bruk sản xuất song dom jalan ngak mbang. Meng nan, salih bahrau rai duik bhap bini puk palei song yaom jien mek tame hu labaih 25 triệu sa urang sa thun, dong patrun boh sang kan kathaot tal puac thun 2014 dok 3,23%. Kuhria tal harei 31/10, tỉnh Khánh Hòa hu 22/94 xã hu UB bhap bini tỉnh tabiak quyết định lac xã palei pala bahrau.

# Huyện Si Ma Cai, tỉnh Lào Cai barau taduan mek 333 tấn brah di rajaei daong 6.835 anek saih di 29 sang bac bhum kan kandah thun bac 2015 – 2016 (mbang 2).Tui nan, Ủy ban bhapbini huyện Si Ma Cai hu tacei dom labik, puk palei pasang iek bruk taduan mek saong parabha brah ka anek saih dom sang bac njauk tui adat, taphia nan daong jien pajang ba brah meng pasak huyen nao ka dom sang bac. 

/ Mintri pato megru bahrau hu harak pandar Sở pato megru ban raya HCM peih bruk pasang iek dom sang bac di  ban raya mehit lac brei anek saih klah bac dom môn, brei điểm ka anek saih piah hu ginup điều kiện nao pakacah trung học phổ thông pakat negar piah pilih ruah tame ĐH. Mintri pato megru ndom lac, ni bruk ngak suan trak dom quy định pato phổ thông. Tui nan, Sở pato megru hu panuac ieu brei pasiam veik song langyah trak dom bruk ngak suan nan ( meyah hu), payua pathau khan tagok Mintri, saong brei thau di dom jalan pathau khan piah rút kinh nghiệm.

# Jaik 5 thun peih ngak danakdak padang ngak palei pala barau di 30 xã điểm padang ngak palei pala barau, tỉnh Đồng Tháp hu labaih 70.000 baok sang hu padang ngak njauk chuan tui quy định di mintri Xây dựng, meblah 76% dom  sang danaok di 30 xã điểm padang ngak palei pala barau. Piah ngak hu tiêu chí kan kandah ini, taphia bruk daong di karja, bhapbini jeng kham merat ngak, paglaong jien mek tame, patrun kathaot khang kajap, dak harei dak patak pataom dak padang sang danaok tani tanat, njauk chuẩn.

/ Piah padang ngak palei pala hacih saat song pglaong kaok sahaneng khik caga môi trường di mik va urang nong. Chi cục khik caga phun pala tỉnh An Giang bahrau pambuak bruk song Syngenta Việt Nam peih chiến dịch “ Môi trường hacih – rai duik hajao” di 4 huyện Châu Thành, Thoại Sơn, Châu Phú, Tri Tôn song ban sit Long Xuyên. Chiến dịch piah jak ba mik va pachreih tui bruk pataom mek bao bì, klaok jru khik caga phun pala hu pandar bloh mai tal dom labik pataom mek song taduan mek pandap  yau saradang, bột ngọt, menyek mbang  

Khaw tin dunya

# Sa kapul urang ngak ikan Tây Ban Nha  biak tatuak drei tuk mek hu sa drei mực praong biak praong, trak 150 kg, atah 10 m di bhum tasik Villaviciosa. Drei mực hu đông lạnh saong ba tal phòng thí nghiệm  CEPESMA duh ka bruk roh duah. Phòng thí nghiệm CEPESMA urak ini hu dua mẫu mực đông la ar saong kuhria ba dom drei ini nao parang iek 8 mẫu mực praong biak praong di akoak thun 2016.

/ Dom urang ilamu Brazil brei thau lac duah mboh 3 janih raok độc oh ka bhian mboh di glai Đại Tây Dương, gah merong negar ni.Dom janih raok ni mbang dum song ve, dalam tuk tiêu hóa pandap mbang, nyu paneh tabiak sa chất hóa học tapa klik meda ngak độc ka dom động vật mbang rilaow yau dom janih la. Min dom urang ilamu brei thau raok ni oh jhak hagait tal anek menuac kayua lac dalam tuk vak roh duah, urang tok mboh tê di akaok tangin tuk gaok tame nyu./. 

# Rilo urang ndom lac drei meda gam nao takai gam pandar điện thoại. Min urang alamu kakei drei njauk cảnh giác saong bruk randap ini. Sa roh duah barau patabiak harei 2/12 di Viện plac raih chỉnh hình Mỹ (AAOS) brei mboh  78%  urang praong thun Mỹ sahaneng lac ngak bruk karei dalam tuk nao takai lac sa bruk "njauk maong veik” min tok  29% dom urang sahaneng lac meda gaok tavak tavaiy di bruk randap ini. Dom urang hu pataom tame dut iek njauk hatai brei thau lac ngak bruk karei di tuk nao takai hu ndom puac, pang nhạc tau nhắn tin lac "nguy hiểm".