# Pak Hà Nội, Tổng cục Thể dục thể thao dalam Mentri Ilamo, padhih saong rivang ma-in bahrau brei thau ka dom bruk ngak pamong tal pahadar 70 thun harei "Ilamu gah Thể dục thể thao (27/3)". Sa dalam dom bruk ngak pahadar 70 thun harei ilamu anak tal nan lac "Harei nduac Olympic brei ka pren yava taong abih bhap bani thun 2016", kham merat jak ba manuac urang pathram ma-in thể dục thể thao, pathram ma-in tui kareih camin Wa Hồ.

# Piah mboh, piah pacang cakak hu siam dom bruk buôn lậu, kaoh mek song pajeng ba kaya glai suan hukum tapa jalan negar, Bo đoi Biên phòng 3 tỉnh Bình Phước, Tây Ninh song Đăk Nông hu mbaoh tangin tame harak khik caga jalan negar. Ni lac 3 tỉnh hu jalan tapen negar song  CPC meng Nam Tây Nguyên trun Đông Nam Bộ atah abih tih labaih 500km. Di tuk peih bruk mbaoh tangin, dom urang lambaok hu pataom tame ginum biai bruk jalan negar, meng nan ba tabiak dom jalan ngak piah dalam thun ni peih bruk tui eik, khik caga jalan negar hu siam mekre jang.

# 5 thun tapa, tỉnh Sóc Trăng buh tame labaih 363 tỉ đồng piah padang ngak hạ tầng cơ sở, patagok bruk ngak mbang pala drak. Meng nan, tỉnh hu padang ngak saong ba tame pandar 431 công trình jalan mbak nao mai dalam palei, jalan ba aia, sang sinh hoạt cộng đồng, balai y tế, sang bac… Langiu di nan, tỉnh hu daong ka jaik 11.360 baoh sang Khmer kathaot piah patagok dom bruk ngak mbang pala drak… Mai meng nan, baoh sang kathaot urang bangsa Khmer trun yaok thun meng 3,5 – 4%.

 # Yaok rituh boh sang di huyện Bình Đại, tỉnh Bến Tre dok having akaok kayua hàu jiak tal harei pablei daok metai biak rilo. Tui kuhria mboh, urak ni labaih 80% dalam 36 ha hàu di urang nong Bình Đại metai abih, khat lihik labaih 20 tỷ đồng. Gah ngak nong Bến Tre dok dut iek mẫu piah thau makna ngak ka hàu metai.

# "Hồ Chí Minh haong dam dara" nan lac angan ieu di mbang parang iek kayua Muyim Hồ Chí Minh saong Muyim dam dara Việt Nam daok peih tabiak pak Hà Nội, tukvak pahadar 85 thun harei padang Đoàn Dam dara Cộng sản Hồ Chí Minh (26/3/1931-26/3/2016). Meng jaik200 tài liệu thaot binguk saong drap ar, parang iek meyaih khan ka umo ranaih di Hồ Chí Minh; jalan saneng, hatung hatai, bruk sangka, iek glang, peih pato megru saong pathram di Wa brei ka dam dara uranaih; brei mboh labik dang prong di rai rah dam dara Việt Nam dalam bruk dak padang saong khik caga taneh ia.

# Di xã B’Lá, huyện Bảo Lâm, tỉnh Lâm Đồng bahrau peih Hội trại ilamu meng kan dom bangsa mbang ka 1 thun 2016, ngan song rilo bruk yau danak dak dok tako, main bhap bini. Tapa nan pakhang, tagok talei jum pataom tong abih bhap bini, jhul patagok KTXH song pabak ilamu ka mik va bangsa takik.

# Harei pataom har bhap bani Nam Bộ meda rah tabiak meng harei 15 tal harei  19/4 pak bal Cần Thơ, hu 150 gian hàng, gam haong labaih 200 janih har bhap bani saong dom janih pandap mbang karei di yaok bhum taneh dalam saong langiu negar. Abih di nyu nan lac, harei pataom hu mbaok di 10 negar ASEAN, Nhật Bản, Hàn Quốc, Ấn Độ... Tapa nan, ralo bruk meda hu peih ngak yau nghệ nhân ngak iek har saong phục vụ dom janih har bhap bani; parang iek dom janih har bhap bani Nam Bộ saong đặc sản dom bhum palei; pakacah ngak har bingi saman mbeik drei tame dunya.

Khaw tin dunya:

 # Iran dok khin blei bahrau 500 kapan haoh pajeng tuai piah pasiam patagok kapul par di negar ni, hadei di tuk dom bruk trừng phạt dunya ngan saong Iran hu tah klak. Di bilan sa meng bloh, Iran hu blei 118 kapan haoh di hãng kapan haoh E-bớt (Airbus) di Prang saong yaom jien abih tih labaih 27 tỷ đô la Mỹ.

# Hàn Quốc brei klaak meneing dom bruk gah cấp thị thực thương mại meng adit tal. Mentri Tư pháp Hàn Quốc harei kabroi brei thau. Sa hệ thống dom tiêu chí bahrau ka cấp thị thực ka dom urang pablei salih negar langiu dalam gah blei tame pablei tabiak Hàn Quốc, meda hu brei thau dalam harei (14/3). Dahlau di nan, janih thị thực ini tok hu brei ka dom urang pablei salih hu bruk ngak mbang meng 500 ribau đôla yaok thun tagok. Ngan haong hệ thống bahrau, Mentri meda  cấp thị thực iek tui ralo tiêu chí karei di gauk, dalam nan hu gam bruk ngak, jien padai, bằng cấp, tiểu sử saong ilamu roh duah di urang likau thị thực.  

# Brazil lac sa negar gaok kan kandah trak di abih meng jit Zika, urang ruak song medhil ruak akaok sit pagam tal virus Zika urak ni tagok tal jiak 5 ribau. Meng adit tal, Brazil ba pandar dom tanut chuẩn di Gah y tế dunya piah tacei tabiak dom uranaih ruak akaok sit. Urak ni Bazil dok jia lac dom anek kama akaok sit nan,  lac kayua  virus Zika dalam tuk bruk nan  oh ka hu gah ilamu brei panuac lac yau nan./.