# Tal urak ini, tỉnh Quảng Ngãi hu jaik 28.800 urang ngak palei pala hu pato bruk ngak tui Quyết định 1956 di Thủ tướng Raja-ei; dalam nan, 80% urang ngak hadei di pato bruk ngak hu paglaong tangin ngak bruk, eng drei duah bruk ngak saong hu bruk ngak bahrau. Ong Lê Quang Thích, Phaok Akaok Uỷ ban bhap bani tỉnh Quảng Ngãi brei thau, anak tal dom jabat, puk palei daok peih prong dom mô hình pato bruk ngak, pandar  siam cơ sở vật chất, caik hatai tal bruk pato dom bruk ngak ba mai ralo kein laba lagaih haong bruk di puk palei.

# Ninh Thuận lac tỉnh thu lagu di abih dalam taneh ia, bhian gaok bruk biến đổi khí hậu. Meng rilo thun tapa, gah ngak nông tỉnh ini hu peih bruk pala glai tamuh hu dalam pandiak bhang piah pacang cakak bruk sa mạc hóa. Dự án pala glai neem (daok ieu lac xoan drum pandiak) di bhum cuah thu di huyện Ninh Phước lac sa dalam dom bruk ngak ba mai kein laba.

# Uỷ ban bhap bani tỉnh Đắc Nông saong Tổng Công ty Viễn thông MobiFone bahrau mboh tangin tame danak dak "An sinh xã hội saong patagok cộng đồng". Tui nan, Tổng Công ty Viễn thông MobiFone alin pok jien bac ka 1.200 anek saih urang bangsa takik kathaot yam tapa kan kandah, bac megru naih jioy pak 24 sang bac trung học phổ thông di tỉnh Đắc Nông, yaok pok yaom 1.000.000 đồng. Bruk alin brei pok jien bac piah pachreih saong daong ka dom adei hu jien bac megru ka nyu siam jang. 

# Gam saong dom tập đoàn praong, rilo doanh nghiệp mbiah saong sit di Thái Lan jaik di ini hu patagok bruk ngak, peih praong bruk yaih khan, pablei salih, rik daong ngak jeng làn sóng đầu tư meng Thái Lan tap Việt Nam. Di bhum taneran kraong Cửu Long, tukvak jaik di ini, rilo nyaom darak, bruk yaih khan pandap di Thái Lan hu rah tabiak di Cần Thơ jeng yau dom puk palei dalam bhum. Tapa nan, hu yaih khan pandap saong duah jalan pambuak bruk, ba pandap mai ini tapa dom doanh nghiệp di bhum taneran kraong Cửu Long.

# Tỉnh Bến Tre hu 8.300 baoh sang mbuan glut jaleih oh ka hu labik daok bahrau piah panduan nao. Dom baoh sang ini ralo meng daok tapen dom baoh kraong prong, di dom huyện Châu Thành, Chợ Lách saong Mỏ Cày Bắc, saong ralo meng lac sang kathaot, oh hu taneh riya di labik siam mekre. Anak dom kan kandah nan, Sở Ngak nong saong patagok palei pala tỉnh Bến Tre daok pok panuac tagok Mentri ngak nong saong patagok palei pala daong, parabha phun jien piah  ngak ka nyu salah dự án padang ngak labik daok bahrau Vĩnh Bình, huyện Chợ Lách saong labik daok bahrau Long Hòa, huyện Bình Đại piah panduan ba mikva mai daok. 

# Kayua biến đổi khí hậu hajan takik, ia mbak njom tame avar ngak ka labaih 17.000 baoh sang bhap bini dalam tỉnh Trà Vinh kurang ia hacih piah pandar. Anak dom kan kandah ka bruk kurang ia pandar, anak meta tỉnh brei daong jien ka dom baoh sang daok di labik oh hu ia ngầm pandar piah blei pandap khik mepiah ia saong pabak jru halang ia pandar. Taphia di nan brei kuac duah jalan ia ngầm di bhum njom lakhuan, mbak di độ dalam meng 300 tal 600m, duah thau ka trữ lượng, chất lượng ia piah hu dom jalan pabak ia ngầm ka nyu lagaih. 

# Kapul dam dara bal Sóc Trăng, tỉnh Sóc Trăng bahrau peih “Melam pataom Giáng sinh” ka dom adei uranaih. Tapa nan dom adei uranaih hu mbaok tame nyaom pakacah angui cuk khan ao tui angan “Khu vườn cổ tích”, dom adei hu ba drei tame ngak dom nhân vật cổ tích yau ong taha Noel, Bạch Tuyết, cei lùn, anai Tấm atau anai Lọ Lem; daoh tamia dom kadha daoh giáng sinh… Ralo pok pandap hu alin brei ka dom adei pakacah naih gheih; taphia di nan, danak dak daok pok brei 21 pok jien bac ka dom adei uranaih nan lac đội viên yam tapa kan kandah bac da-a naih jioy, yaok pok yaom 500 ribau đồng.

Patui di ini dom khau tin dunya:

# Gah Nông lương LHQ brei thau, bhum gah meraong Châu Phi daok dang anak bruk kurang padai brah pandap mbang kayua pandiak bhang ngak kadul tukvak pala drak saong phun pala oh tamuh siam. Taphia di nan hiện tượng En Ni-nô ngak brei pandiak bhang catang jang, đe dọa an ninh lương thực dalam khu vực. Dom bilan yauk ngũ cốc barau ini jeng hu takik, dalam nan hu dom phun pala praong yau tangei.

# Mentri Thống nhất Hàn Quốc brei thau, Hàn Quốc saong Cộng hòa dân chủ bhap bani Triều Tiên ginum biai njauk gauk ka yaom jien pandar taneh riya bo dom doanh nghiệp Hàn Quốc daok ngak bruk pak khu công nghiệp chung Kê-xâng (Kaesong) njauk bayar ka Cộng hòa Dân chủ bhap bani Triều Tiên. Tui nan, dom doanh nhiệp di Hàn Quốc daok ngak bruk pak khu công nghiệp Kê-xâng njauk ba-yar ka Cộng hòa Dân chủ bhap bani Triều Tiên 0,64 đô la Mỹ/ m2 taneh pandar yaok thun. Raja-ei Hàn Quốc caong lac, bruk njauk gauk ka yaom jien ini meda daong ka dom doanh nghiệp di Hàn Quốc pataom tame patagok bruk ngak mbang tui jalan khang kajap.

# Hajan ribuk praong tuh tame bhum Trung Nam taneh ia Mỹ ngak sa urang metai saong ralo labik duak ia. Ngin ribuk gam hajan khang nyu tuh tame mban Át-kan-sát saong mban Mít-xi-xi-pi ngak ka ralo kayau patau saong sang danaok khut, jaleih. Cục langik tasik negar Mỹ brei thau, ngin ribuk meda nao tapa dom mban Ten-nét-xi , Mít-su-ri, I-li-noi, Ken-tắc-ki… ngak kan kandah tapak ka jaik 4 triệu bhap bini Mỹ di dom labik nan./.