# Thủ tướng Raja-ei njauk hatai haong panuac caong di Mentri ngak nong saong patagok palei pala ka bruk peih nyaom biai pataom iek veik pakat negar 5 thun peih ngak danak dak bruk ngak negar padang ngak palei pala bahrau. Tui kuhria, nyaom biai ini rah tabiak harei 8/12 pak Hà Nội. Thủ tướng Nguyễn Tấn Dũng dang akaok nyaom biai ini. Nyaom biai piah taong yaom dom bruk ngak hu hadei di 5 thun peih ngak piah jhul samar tukvak, paglaong kein laba peih ngak danak dak pakat negar padang ngak palei pala bahrau tukvak 2016-2020.

# Kayua njauk ngin bilan đông- bắc, dom harei tapa, di bhum tasik tỉnh Quảng Nam hu ngin khang ngak ka takai tasik Cửa Đại, ban sit Hội AN glut jaleih khang. Ban sit Hội An hu ba 300 dân quân tự vệ di dom xã phường song rilo mik va dalam palei ba gauk tabiak ngak pakhang takai tasik meng padang geing kreim song mbao cuah. Ong Nguyễn Văn Dũng, Akaok Ub bhap bini ban sit Hội An, tỉnh Quảng Nam brei thau: Takai tasik di Hội An glut jaleih khang jang. Anak bruk ni, Ub bhap bini ban sit hu pathau khan tagok Ub bhap bini tỉnh. Akaok UB bhap bini tỉnh song dom Sở ngành di tỉnh hu mai pasang iek. Anak meta ban sit peih ngak dom jalan piah pacang cakak samar. Ni lac jalan ngak di anak meta min oh caik ka ia tasik njom tame boh taneh.

# Kapul urang nong tỉnh Quảng Nam bahrau peih bruk padang ngak pasiam, pabak pandap panda ka Pasak Pato bruk ngak saong Daong urang nong tỉnh Quảng Nam ngan haong yaom jien abih tih 25 tỷ đồng. Pasak peih ngak dom bruk yau pato bruk ngak ka urang ngak palei pala, ngak dom dịch vụ daong ka urang nong dalam bruk ngak mbang, pato bruk ngak piah nao ngak bruk di negar langiu. Tuk dự án ngak salah blaoh dalam thun 2018, meda daong ka pasak paglaong kein laba dalam bruk ngak, pabak hatai caong khin bac bruk ngak di hội viên urang nong dalam tỉnh. 

# Xã Phú An huyện Châu Thành, tỉnh Hậu Giang lac sa dalam dom xã padang ngak palei pala bahrau meng bruk sangka patagok song peih prong dom bruk pala phun mbang boh, piah paglong jien mek tame di bhap bini. Taphia bruk patagok taneh pala phun mbang boh hu kein liba KT, Phú An jeng dok pataom ngak dom bruk pala njam patam song rong pabui, menuk lagaih song dom boh sang dalam xã, jak ba 32 boh sang hu bein oh kein liba salih tapa pala dom janih phun pala hu kein liba glong.  .

# Pasak Y tế dự phòng bal sit Đà Nẵng tal urak ini hu mboh jaik 1.250 urang njauk ruak pandiak tabiak darah, rilo jang 4 mbang dut haong tukvak ini thun dahlau. Jit ruak tamuh tabiak di 7 quận, huyện dalam bal sit yau Liên Chiểu, Ngũ Hành Sơn, saong Sơn Trà. Gah Y tế bal sit Đà Nẵng hu peih pato pathram ka labaih 1.800 urang pambuak bruk dân số - pren yava bhap bani gam pambuak bruk haong urang lambaok labik daok, kapul nyaom nao tal yaok baoh sang jak ba bhap bani puh ramik haci hacih môi trường, pametai lăng quăng, bọ gậy.

# Meng akaok thun tal ni, Bình Định hu 1.413 mbang urang ruak pandiak tabiak darah Dengue. Dom urang ruak nan dok di taong abih 11 huyện, ban sit dalam tỉnh. Dut song tuk vak ini thun 2014, urang ruak pandiak tabiak darah rilo jang jaik 5 mbang. Phaok akaok Sở Y tế Bình Định Lê Quang Hùng ndom lac, anak bruk kan kandah di ruak pandiak tabiak darah, jalan ngak camereip di abih di gah y tế nan lac duah hu sruh jit ruak, langyah njauk tuk vak, patrun patakik bruk pambak ruak, khik iek njauk tuk vak, patrun biến chứng song metai.

# Pasak Y tế dự phòng tỉnh Đồng Nai brei thau: meng harei 16 tal harei 25/11, dalam tỉnh hu labaih 170 urang njauk ruak pandiak tabiak darak. Yom lac biar jang dom adit dahlau, min jeng glaong labaih 42% dut haong tukvak ini thun 2014. Kuhria meng akaok thun tal ini, tỉnh Ðồng Nai hu 8.150 urang njauk ruak pandiak tabiak radah (glaong jaik 200% dut haong tukvak ini thun dahlau), hu 6 urang metai; ruak nyu tameh tabiak di taong abih 171 xã, phường dalam tỉnh. Dom puk palei hu ralo bhap bani, ralo khu công nghiệp yau bal Biên Hòa, huyện Trảng Bom, Long Thành, lac labik hu ralo urang njauk ruak pandiak tabiak darah.

Khaw tin dunya:

# Di ban ine Praha di Cộng hòa Séc, 30 doanh nhân lambaok ka dom Doanh nghiệp VN di Châu Âu hu mbaok tame mbang pakacah dok tako piah palih ruah tabiak dom urang lambaok naih gheih di Châu lục tame sa mbang pakacah dreih yau nan di urang Việt angaok duny. Ni lac mbang camereip Festival doanh nhân doh Châu Âu 2015 kayua Kapul patagok ilamu Doanh nghiệp VN pambuak bruk song Đại sứ quán Việt Nam, Kapul urang Việt Nam, Hội Ilamu nghệ thuật Việt Nam di Cộng hòa Séc song dom Doanh nghiệp VN di dom negar Châu âu peih ngak.

# Mentri ngak nong Pháp brei thau, negar ini bahrau duah mboh sa urang metai kayua njom cúm menuk ada H5N1 pak bal Đo-đô-nhơ (Dordogne) gah Tây Nam negar Pháp. Mentri Y tế Pháp hu ba tabiak jalan ngak chip ka bruk vệ sinh dalam negar, pandar karja palei pasang iek saong peih ngak dom jalan dut iek, kiểm dịch y tế ngan haong menuk ada, athur raong, peih ginum biai chip piah ba tabiak dom jalan pacang cakak jit cúm menuk ada H5N1 tamuh veik.

# Mintri pajeng ba Indonesia brei thau, negar ni hu patagok bruk khik caga di dom mblang kapan haoh hadei di tuk mehit lac sa mblang kapan haoh di ban ine Jakarta hu panuac đe dọa dalam tuk dok rah tabiak bruk khủng bố di dunya. Tui nan, dom jalan patagok an ninh hu peih ngak meng harei 24/11, gah chức năng meda peih bruk pasang iek dom hành lý pandap panda, tui iek dom radeih ô tô tame tabiak mblang kapan haoh, ngak catang bruk iek tui dom urang ngak bruk di mblang kapan haoh./.