Hadei jaik 4 bilan ngak karja palei 2 pakat, tal ini hu 100% bhum palei hu salah blaoh bruk pasiam ramik bruk karja saong brei angan ka urang dang akaok UB Bhap bini dom pakat. Dalam negar hu 146 ribau 847 urang padeih bruk. Thu tuong Phạm Minh Chính pandar dalam tukvak anak tal dom mentri dom gah patui veik salah blaoh bruk karja, sarak. Pasiam bruk karja, urang ngak bruk, pandar Mentri Noi vu padang labik bruk ngak karja palei duah pakat, rilo meng lac di dom xa phuong, khik kajap bruk lagaih, dil samu. Thu tuong caong bruk karja palei dua pakat hu nao tame dalam, siam lagaih, daong padang sa karja bahrau, tantu cambaih laih, ka rahra, ka negar.

TPHCM kham merat brei salih taong abih radaih saong jalan mbak tal thun 2030. Meng thun  2025, taong abih radaih buyt salih atau blei birau radaih peih meng dien saong nang luong hacih. Mbiah tal thun 2030, taong abih radaih buyt saong oto di jabat, don vi karja meda hu peih meng dien saong nang luong hijao hacih. Njauk ndem tal, takik abih meteh dalam dom radaih di urang peih radaih kong nghe, radaih pajeng pandap saong radaih urang jakar, vien chuc brei salih tapa radaih dien di thun 2027 blaoh tal thun 2030 hu salih taong abih.  

Tinh Dak Lak hu salah blaoh 100% ndap nda pasang iek jalan VMS ka taong abih gilai ikan atah meng 15m ba tagok. Kadha ini daong kapul chuc nang meda thau saong taong bhat dil samu dom gilai ikan ngak suan hukum luac jalan nao tasik, lahik pambuak tuk daok ngak di angaok tasik. Ong Lương Nguyễn Minh Triết, Bi thu Tinh uy Dak Lak caik hatai urak ini lac tukvak tabung glaong peih bruk pacang cakak taong mek IUU, kayua nan jabat chuc nang brei samar drah ngak bahrau bruk salih lek taka so piah khik kajap ka bruk pasang iek.

Di xa Mỹ Hòa Hưng, tỉnh An Giang sa labik glut jaleih atah 120m, mbang tame dalam ar 15m, ngak jaoh tatua meng kayau; 1 kuan pablei salih  saong 8 baoh sang gaok khat lahik, kuhria khat lahik labaih 1 ti dong. Labik glut jaleih ngak kan kandah tal bruk nao mai di bhap bini, urak ini dom radaih oh nao mai hu. Karja bhum palei jak ba rahra dalam bhum mbuan rah tabiak bala brei panduan ba nao tal labik hu salamat khik siam ka drap ar.

Tui Jabat khoa hoc kraong ribaong, khat lahik kayua njom ia mbak ka 4 gah ngak nong hu makna di Bhum taneran kraong Cuu Long lac padai brah, phun mbang baoh, kraong ribaong saong njam patam yaok thun hu labaih 700 ty dong, dalam nan khat lahik ka phun mbang baoh biak glaong saong caik kanjah jhak suai atah. Makna kayua yaok pluh binek thuy dien praong hu padang di halau angaok di kraong Mekong pataom ia dalam bilan thu, gam haong langik salih karei, ia tasik tagok nan dom thun jaik ini bruk pandiak bhang saong njom ia mbak dak harei dak glaong tagok.

Mentri Pathau khan Campuchia birau brei thau duah mboh abih tih 2.810 bruk tin ja, khaw tin oh njauk saong pachut padrak ngak sraw kadau dalam 9 bilan tapa. Njauk caik hatai, hu tal 2.122 bruk pambak tal bruk rah tabiak di labik tapen negar, ndem mbo ngak mbluak bruk oh njauk saong pagat panuac Rajaei Patao negar Campuchia. Mentri Pathau khan Campuchia eiw bhap bini atah klak khaw tin ja: Ndem oh haong tin ja, oh ngak saong oh parabha dom tin nan.

Di An Do takik abih 133 urang metai kayua mblung ia saong rilo urang karei lahik dalam raya adat Chhath Puja piah pok paling Yang Ia Harei tui adat agama Hindu. Dom urang jakar ba tabiak kakei rahra brei tabni tanat sron mbon salamat tuk ba drei tame raya adat menei ia kraong saong oh trun labik ia dalam. Tui adat, dalam adat cambat ini dom urang dang di ia dauk tal la-uk, gaok mai dauk abih rup di kraong, danao piah pok paling, langkar ka prein yava saong bilan pala drak.

Gah Y te Dunya (WHO) birau peih bruk panduan ba gah y te akaok meti tabiak truh Dải Gaza meng tuk padeih patuh phao di Israel saong Hamas hu ngak tui, ba 41 urang ruak trak gam haong 145 gauk gar di dom urang ruak tabiak hu. Urak ini, WHO daok pambuak haong Hoi Trang luoi liem Đỏ Palestine piah ngak khang dom bruk dalam tuk daok labaih 15.000 urang daok cang jru ruak gah langiu Gaza./.