Dalam thun ini, Tổng Cục khik piah Kanja hu pabak labaih 107.320 tấn brah daong ka dom tinh, ban daong pacang eik lipa dalam tuk Tết Nguyên đán 2022, daong brah akaok thun, daong urang njauk jit ruak COVID-19, daong pasiam dom kan kandah meng bala di langik tasik kayua  hajan ia sua, pandiak bhang, pala drak oh hu, daong ka anek saih, daong bruk pala glai…

Tui yaok pataom di Tổng LĐLĐ Việt Nam, yaom lac gaok kan kandah min dom doanh nghiệp jeng kham merat thưởng Tết piah pachreih ba urang ngak, bhian di nyu lac 1 bilan jien bilan. Dalam nan, dom gah gaok kan kandah meng bruk di dunya yau ye jhik, menyim, takhaok, kalik… hu yaom thưởng Tết trun meng 15 - 20%. Daok dom gah karei, yaom thưởng Tết samu meng 1 - 2 bilan jien bilan. Di ban raya hCM, yaom thưởng kuhria rah tapa di yaok urang ngak lac jaik 13 triệu đồng, tagok jang 45% duk haong thun bloh. Di Bình Dương lac labaih 6 triệu đồng. Hậu Giang jaik 12 triệu đồng.           

UBND TP.HCM bahrau peih ngak danak dak padang ngak, peih praong jalan roya 50 (huyện Bình Chánh). Danak dak atal jaik 7km, labik akaok jalan pambuak haong jalan Nguyễn Văn Linh, labik puac jaik taphia tỉnh Long An. Abih tih jien buh tame danak dak lac jaik 1.500 tỷ đồng. Danak dak tuk ngak salah meda langyah hu bruk gar jalan, trun manieng bala di mangaok jalan mbak, pabak hu bruk nao mai di mangaok jalan hu siam lagaih jang ka Jalan roya 50; dak harei dak pasiam jalan mbak, pabak hu bruk cak rok patagok KT – XH bhum gah maraong  ban raya  jeng yau ka abih TP.HCM.

Urang ngak nong di tỉnh Trà Vinh urak ini daok yam tame bilan mek pablei hadang ginraong hijao raong di 2 bhum lac ia taba saong ia meteh mbak meteh taba. Bruk chreih chrai lac yaom hadang ginraong hijao pablei hu yaom glaong tani tanat, urang raong laba hu 70 triệu đồng sa hecta sa mbang raong. Tui Chi cục Thủy sản Trà Vinh, meng thun 2019 tal ini, urang ngak nong di bhum ia meteh mbak meteh taba di dom huyện Châu Thành, Cầu Ngang, Trà Cú, Duyên Hải hu patagok bruk ngak padai haong hadang ginraong hijao atau 1 vụ raong hadang sú - 01 vụ padai. Daok taneh raong hadang ginraong hijao thun ini hu 1.700 ha mbaok ia.

Dalam dom harei tapa, sa baoh sang daok di xã Tân Bằng saong 1 baoh sang daok di xã Trí Phải, huyện Thới Bình, tỉnh Cà Mau hu khan brei karja palei thau ka bruk raong pabui njauk metai. Abih tih dom drei pabui metai lac 43 drei. Jabat chức năng hu nao pasang iek, mek mau dut iek brei mboh tapon pabui di dua baoh sang rahra dương tính haong vi rút ba tal jit ruak aih craoh pabui châu Phi. Akaok UBND huyện Thới Bình hu ba tabiak harak pathau khan lac jit aih traoh pabui châu Phi di dua labik ini. Dahlau di nan, akaok UBND tỉnh Cà Mau jeng hu harak ieu kakei dom labik peih ngak dom bruk pacang caga saong  padam jit ruak eih traoh pabui châu Phi di pak ini.

Tổng thống Mỹ Joe Biden  tabiak bruk samar drah di gah pai bang New York piah pacang caga ribuk bilan brak. 28 urang metai di New York samu meteh dom menuac metai kayua ribuk bilan brak dalam taneh ia Mỹ di tuk Noel. Tuyết laik kapal glaong tal 1 mét 2 tấc di rilo labik, karja palei brei thau lac tuyết daok laik trun dalam dom harei tal. Bang Kathy Hochul brei labaih 400 vệ binh quốc gia nao tal gah pai New York piah daong ka bhap bini daok pak nan.

Tui yaok pataom di Philippin tal tukvak ini mboh lac, hu takik di nyu  13 urang metai saong 23 urang lahik kayua hajan ia sua di dom tinh gah maraong saong gah kreih negar ini. Dom mbang hajan khang dui atah dom harei tapa ngak hajan ia sua, glut jaleih taneh saong lahik dien di rilo labik, njauk ba 170 ribau urang nao daok di labik karei piah plaih di ia sua. Tal tukvak ini, jeng daok 46 ribau urang daok kadauk di 87 pasak sơ tán di rajaei. Hajan ia sua ngak tayah labaih 500 baoh sang, yaok piluh jalan saong  tatua dauk dalam ia sua.

Pluh tuai angaok sa sruh radaih buýt mini metai tuk njauk mìn angaok jalan di gah timur Burkina Faso. Sa urang jakar ngak praong di palei nan brei thau lac dom menuac metai meda hu rilo jang kayua daok hu dom tuai lahik oh ka duah mboh. Burkina Faso lac sa dalam dom taneh ia kan kathaot abih di dunya. Meng thun 2015, taneh ia Tây Phi ini having akaok pcang caga dom bruk taong tame di kol cực đoan ngak brei yaok pluh ribau menuac metai saong jaik 2 triệu menuac lahik sang daok./.