Dom bruk hu padang ngak biak rilo janih, lagaih haong bruk di pak ini, tui yaok bhum palei, yaok gah, yaok manuac urang di bhum mikva bangsa takik. Tapa nan, rahra hu pabak ka kong an labaih 181.000 khau tin, daong ka jabat chuc nang langyah jaik 34.300 bruk, cap mek, pato pakai rilo urang, kol toi pham, dom te nan xa hoi. Rilo bruk, rilo menuac lac kreih camin hadah, ba akaok nao dahlau dalam bruk eng drei khik iek, hu rilo rahra taduan, kham merat hu mbaok tame, ba mai rilo siam lagaih.  

Tỉnh Sóc Trăng hu caik hatai peih ngak samu gauk dom sarak an sinh xã hội, peih ngak samar drah, daong palagaih ka dom sang kathaot, sang jaik si kan kathaot lac bhap bini bangsa takik hu mbang tui dom sarak daong di Karja. Abih di nyu lac bruk peih ngak hu siam Danak dak bruk ngak negar, haong yaom phun jien 1 rabau tỷ đồng hu rik daong praong, paglaong raidiuk, bruk ngak mbang ngak huak ka bhap bini dom bangsa takik. Bruk patrun kathaot di bhum urang bangsa takik jeng hu salih bharau siam, dalam tỉnh hu daong salih bruk ngak ka labaih 4.600 sang haong 67 bruk cakrok ngak mbang, dom sang kan kathaot kuhria rah tapa trun hu 2% yaok thun.

Mban Dan van Huyen uy Đức Cơ, tỉnh Gia Lai bahrau peih nyaom biai taong yaom jak jeng di bruk pambuak talei rohim di dom jabat, kapul nyaom haong dom palei urang bangsa takik. Tal urak ini, 42 jabat, kapul nyaom di huyện Đức Cơ hu pambuak haong 29 palei urang bangsa takik. Tapa bruk pambuak gauk, dom jabat, kapul nyaom hu jao alin 260 paok pandap  yaom abih tih 70 triệu đồng ka palei saong dom sang kan kathaot, sang jaik kathaot; daong padang ngak 8 baoh sang saong ngak pasiam veik dua baoh sang ka sang kathaot, sang jaik kathaot gaok kan kandah ka sang daok, daong padang ngak dua baoh sang haniem phul ka dua adei anek saih kan kathaot kham merat yam tagok, bac taa naih joi di palei Phang, xã Ia Lang; pato tacei mikva ba ilamo ky thuat tame bruk ngak mbang, pala drak.

Dom sang iek ruak uranaih di TP.HCM daok taong ruak ka yaok pluh uraniah njauk ruak sởi trak tapa viêm phổi, nhiễm trùng, patuk, brei daong  luan suan, suak yava meng jamriak oxy. Gah y tế ban raya kuhria mboh lac, anak tal, dom menuac njauk ruak sởi daok tagaok, ba tal naong trak ka bhap bini saong trak damak ka gah y tế. Meng akaok thun tal ini, TP.HCM hu labaih 590 mbang urang njauk ruak pandiak ndaih baoh dreih yau ruak sởi dalam bhap bini saong di dom labik iek ruak dalam ban raya. Dalam nan hu labaih 340 urang dut iek mboh dương tính haong sởi, hu gam uranaih sang daok di TP.HCM saong uraniah daok di dom tỉnh ban karei, hu 3 uranaih metai.

Kapul Liên hiệp urang kumei tỉnh Ninh Thuận saong huyện Bác Ái bahrau peih ngak dom bruk pathau khan ka bruk samu gauk di urang kumei saong urang likei, padang ngak baoh sang haniem phul saong rilo bruk an sinh xã hội pamaong tal urang kumei saong uranaih bhum bangsa takik gaok kan kandah,  pachreih hu bruk hu mbaok di labaih 450 urang kumei, uranaih saong rahra di dalam huyện Bác Ái. Danak dak hu dom bruk biak chreih chrai, yau harei pataom mbaok Sang urang kumei bangsa takik angan je, kadha ma-in ilamo “Pagui thaot mek akhar”, parang iek kịch ndem truyen thong. Abih di nyu nan lac, danak dak ba drei tame Baoh sang urang kumei bangsa takik angan je hu pok mayaom dom yaom glaong ilamo di baoh sang Việt Nam.

Cong ty Android Technics di negar Nga bahrau ini mek hu Giải thưởng Công nghiệp thun 2024 haong dom sahneng duah bahrau daong ka gah công nghệ y tế. Nan lac pandap Tổ hợp robot ORTHEZ-1 daong pasiam prein yava rup pabhap hadei di đột quỵ atau njauk rambus, piah ka raidiuk di uraniah njauk “khut não bẩm sinh” hu mbuan lagaih jang. Meng jamriak ini, urang ruak meda siam veik bruk megei nao mai di tangin, daong iek glang rup drei eng saong meda mai gilac veik haong raidiuk yaok harei. 15 thun tapa, Cong ty Android Technics ngak tabiak hu labaih 40 mẫu jamriak samu haong tanut ngak meng pandap dalam taneh ia di robot y tế lac labaih 90%.

Sa roh duah bahrau hu peih ngak di Australia brei mboh, jit ruak Covid-19 dui atah ngak ka kinh te negar ini khat lahik jaik 10 tỷ đôla Australia. Bruk roh duah hu tui iek labaih 5.000 urang praong thun gaok ruak hadei di tuk njauk Covid dalam tukvak meng 3 tal 12 bilan brei mboh, dom urang ini njauk padeih ngak 100 trieu maong. Dalam nan, nyaom urang meng umo 30 tal 49 thun lac dom urang njauk padeih ngak rilo abih meblah tal labaih mateh maong padeih ngak bruk kayua njauk ruak hadei di Covid. Tapa nan oh lac ngak kanjak jhak tal prein yava di rilo urang bo daok ngak kan kandah tal kinh te.

Phone tangin saong mạng xã hội daok ngak ka uranaih di dunya dak harei dak klaak nao dom bruk pasram rup pabhap saong bruk di gah langiu langik. Bruk pandar rilo mạng xã hội saong internet, ngak ka uraniah takik sahneng kuhria, oh siam ka glo akaok saong takik kanal hadar. Piah daong ka dom adei plaih hu dom kadha oh siam meng Internet saong mạng xã hội, di ban sit Basra di Irắc, amuk Sumaya Al-Baghdadi, sa gru pato đại học dahlau daih, halan hatian peih labik ngak lan am ka uraniah, daong ka dom adei salih jalan diukrai saong caik hatai sangka jang tal bruk pasram pahat rup di gah langiu langik./.