Mentri Bangsa saong Agama birau khan angan bhum palei urang bangsa takik saong bhum ceik, palei biak kan kandah meng ini tal thun 2030. Dalam 27 tinh, ban hu khan ye di Tay Nguyen saong bhum Meraong negar hu: Gia Lai, Đắk Lắk, Tây Ninh, Ban raya Hồ Chí Minh, Cần Thơ, Cà Mau, Lâm Đồng, Đồng Nai, Vĩnh Long. Ini lac bruk piah dom jabat saong karja bhum palei peih ngak, pasang iek dom sarak pambuak tal bhum urang bangsa  takik saong bhum ceik.

TPHCM brei pasram bruk pasang iek mạng  tui 3  khaw tin daok peih ngak tui klau bruk bruk pabak ia, pato megru saong y te. Danak dak dui atah  tal harei 28/9. Đại tá Lê Công Anh, Pho Yam ndoc Công an TP.HCM brei thau, mang dak harei dak hu makna praong ngan haong bruk salamat negar, khik salamat xa hoi, bruk khik iek saong patagok kinh te - xa hoi. Yau nan min, khik brei salamat mang lac bruk bhian, brei hu mbaok di dom jabat, don vi saong bruk ngak di urang dang akaok.

Urang ngak nong xa Vĩnh Bình, tinh An Giang mek hu kien laba glong meng bruk raong hadang giraong hijao di taneh hamu padai. Bruk raong hadang - padai lagaih tui langik ini daong bhap bini duah jien tame tani tanat. Tui Pasak pachreih Ngak nong  tinh An Giang, bruk nan ba mai kein laba jien padai, mek hu meng 1,2 - 1,7 tấn hadang sa hecta, daong bhap bini  di xã Vĩnh Bình duah jien tame. Urak ini, tinh An Giang hu labaih 15 ribau hecta danao raong hadang di taneh padai.

Hadei jaik 2 adit  hajan di ralo labik, ia dauk, glut jaleih taneh di rilo bhum palei tinh Lam Dong rah tabiak sraw kadau. UBND tinh Lâm Đồng payua harak iew karja dom bhum palei pasang iek, panduan ba bhap bini tabiak truh labik mbuan rah tabiak bala, tame tal dom labik pacang cakak, brei hu ginup kaya mbang, oh brei  bhap bini kurang kaya mbang. Tui kuhria mboh dahlau, Lam Dong daok hu hajan praong, ia hajan meng 50 - 110mm, hu labik tal labaih 180 mm.

Meng harei 25/9 tal harei 3/10, di dom kraong, ribaong barat  dalam tinh Vĩnh Long hu rilo mbang ia ndik gam ribuk ia sua. Ia tagok samar, ia tagok glong abih meng harei 29/9 tal harei 1/10, meda ia dauk ralo labik dhong biar. Jabat khi tuong kakei dahlau, ia tathik ndik gam ia angaok halau, hajan ngak ia dauk. Ia dauk dalam meng 5 tal 50 cm, ngak kan kandah tal dom labik daok di bhap bini, labik raong glang saong pala kaya ia.

Trieu Tien ngak iek ten lua rilo akok meda cuh praong 240 mm ngak birau, pandar he thong ba jalan tui tu dong. Dom ten lua hu ngak veik cuh atah labaih 100 km par atah  tui quy dao saong dom labik atah 115 km par tagok trun. Po negar Kim Jong Un khan lac, bruk ngak iek phao karaong mesruh metak birau ini brei mboh prein khang kong nghe negar birau di Trieu Tien.

Di Indonesia, kreh dom glai Borneo bhian apui khuah, bol lin padam apui khuah padang tabiak. Dom urang nan lac dom urang kumei bhian randap haong bruk ngak hamu apuh saong bruk sang, urak ini tame ngak bruk padam apui. Dom urang kumei nan lac urang do kapol padam apui hu labaih 140 urang meng 10 palei. Oh hu mac jamraih birau, urang pandar mac njuk pruh ia kak gah lakuk radaih, cambuac pruh ia, dhar kayau piah padam apui. Langiu bruk padam apui di labik, urang bhian tame iek glai.

Tui Gah Y te Dunya (WHO), hajan praong kayua El Nino meda ngak njom mbak ruak jit ta saong jamoh kaik, ba tal dom ruak la-ar dom, ruak pandiak tabiak darah…Kan kandah praong di dom labik ini kurang labik y te, kurang an ninh kaya mbang atau daok dang anak  bruk sraw kadau ngak pahala. WHO iew dom taneh ia samar peih ngak dom jalan pacang caga ngak jhak tal  prein yawa bhap bini. Tui kuhria mboh bruk kan kandah kayua El Nino dui atah tal thun 2027./.