Nyaom roya lambaok vakil dalam negar Kapul Van hoc nghe thuat dom bangsa takik Viet Nam mbang ka VII bahrau peih ngak di Ha Noi. Kapul urak ini hu jaik 1.500 urang dalam kapul, bruk di 47 kapul di 32 tinh, ban. Di nyaom biai, ong Trần Thắng, Phaok Akaok Uy mban Trung uong MT Negar Viet Nam, ndom meyai lac, dalam tukvak ngak bruk bahrau, kapul patui veik sangka iek praong ka paneh, pataom khik, roh duah saong yaih khan van hoc nghe thuat ka dom bangsa takik, rilo meng lac urang van nghe si, nghe nhan daok di bhum bangsa takik, bhum ceik, bhum atah bayah; roh duah padang pasak daong urang van nghe si urang bangsa takik…

Tong Lien ndoan Lao dong Viet Nam ba tabiak rilo bruk ngak kuhria taong abih gah ka urang doan, urang ngak tuk Tet Nguyen dan nasak Papaiy Jim Luac 2027. Bruk njauk hatai lac danak dak daong harak ve nao saong mai urang ndoan, urang ngak bruk daok gah Meraong negar mai palei mbang Tet. Dom urang ngak kong oh hu lagaih mai palei mbang Tet, dom pakat kong doan alin kaya di labik daok. Dom bruk kuhria Tet brei pataom tame sangka ka dom baoh sang kan kathaot, jien mek tame biar, takik atau lahik bruk ngak.

Mban Pato tacei Bol lin Bien phong ban raya Dong Nai bahrau alin brei radaih juak ka anek saih lan landah di dom xa tapen negar ban raya Dong Nai. Ngan haong kadha “Balai lac sang, tapen negar lac palei negar, mikva dom bangsa takik lac adei sa-ai sa tian”, Bol lin Bien phong Ban raya Dong Nai hu ngak rilo danak dak, bruk ngak, danak dak lagaih daong rahra labik tapen negar. Danak dak Urang jakar, bol lin paglaong takai adei nao tal sang bac saong dom kamuan anek saih meng tal 4 tal tal 9 di dom palei, puk 8 xa tapen negar hu alin brei radaih juak; yaom kaom yaok sruh radaih meng 1,7-2 trieu dong.

Di dom tinh, ban dalam bhum taneran kraong Cuu Long, ruak pandiak tabiak darah daok rah tabiak sraw kadau; langiu  dom urang ruak, daok hu urang metai. Yau di tinh An Giang meng akaok thun tal ini hu jaik 6.400 mbang ruak pandiak tabiak darah Dengue saong sa 1 urang metai. Anak bruk nan, gah y te brei pasang iek, langyah  ngak hacih dom sruh jit ruak, oh caik jit ruak tamuh tabiak di ralo labik. Tui nan, kakei bhap bini  caik 10 minit yaok adat piah pasang iek, duah thau saong hacih dom labik mbuan jamih menek.

Kong an Ban raya HCM bahrau kakei caga 122 labik mbuan dauk ia di bhum, dalam nan hu 83 labik ia dauk kayua hajan praong, ia saong 39 labik ia dauk kayua ia ndik. Kapul Canh sat jalan mbak brei patagok dui ba jalan, rabha dom jalan pasak, pachreih rahra srap gap palih ruah jalan ngak, patakik bruk mbuan gaok bala saong gar tavak. Tuk rahra khin daong saong khin ndom ka bruk dauk ia, gar tavak meda pambuak tapak kapul canh sat jalan mbak daok ngak bruk di angaok jalan atau jalan talei pambuak chip: 0326.08.08.08.

Thu tuong Italy Giorgia Meloni payua harak đơn mbaoh tangin khik sap ndem di Jabat Sở hữu trí tuệ Lien minh chau Au (EU) njauk tui hukum anak bruk mek AI ngak ja sap ndem. Tui nan, gam payua ban tavak sap atah 4 giây, dalam nan muk Meloni meyai “ Dahlak lac Giorgia Meloni” meng sap Itali dua mbang. Meyah brei adat, muk Meloni brei atah klak dom asar kadha suan hukum, ndok bayar jien atau ngak tui dom jalan karei di chau Au.

Sa mac jamraik di Bol lin ahaok Nigeria pajeng tui 25 urang bahrau gaok bala saong laik trun bhum meraong bang Ondo. Kapul chuc nang brei mboh taong abih tuai damuai saong dom urang di ahaok par jeng metai abih. Tong thong Nigeria hu pathau khan peih 3 harei padhi pakat negar saong pandar tuel hala dok meteh gang dalam negar. Makna ba tal bala jeng daok pasang duah ngak tantu cambaih.

Jit ruak pandiak tabiak drah di Bangladesh daok rah biak trak, meng akok thun tal ini hu tal 281 urang metai. Di ralo sang iek ruak, dom urang ruak ralo jang gaiy laneng ndih iek ruak pandiak tabiak darah, dom urang ruak ndih di gah langiu atau dom labik cang dahlau. Bangladesh daok pasang iek vaccine pacang ruak pandiak tabiak darah dalam negar. Yau nan min, bruk ba tabiak nan oh ka mbaoh tangin brei peih ngak./.