Meng ini tal thun 2030, Ban raya HCM kuhria peih ngak 87 danak dak ngan haong jalan ngak pacang ia dauk di 50 labik ngan haong taong abih phun jien labaih 142.000 ti dong. Ban raya kuhria padang danao pasiam di dom labik ban medin saong bhum dhaong biar piah padang khik ia hajan, patakik ia pataom samar di sa labik ngak kateik geik tagok majam tathuak ia. Ban raya HCM jeng patui veik salah blaoh majam ar pacang, braong pasang iek ia ndik, balai njuk tathuak ia, bambang tathuak ia tui quy hoach; gam haong nan roh duah dom jalan langyah pasang iek ia ndik saong ia tagok glaong di labik tapen tasik.

 Mban Khik iek inem mek saong labik gheih mekre di Ban Da Nang birau jao 88 kaya kuac mek hu di Đồn Chơn Sảng saong Balai Nam Chơn (ala takai ceik  Hải Vân) ka Gilang khik piah drap ar Da Nang taduan, khik piah saong duh ka bruk roh duah. Ini lac dom kaya duah hu dalam mbang kuac duah di Balai  Nam Chơn saong Đồn Chơn Sảng, di phuong Hải Vân, Da Nang. Njauk caik hatai, di Balai Chơn Sảng, dom urang kuac duah  mboh rup patau cur di lubang H2. Mbaok patau yau urang daok du-a, gah likuh lac akhar huroh Cam meng abap 8 ilimo Champa.

Piah duh bruk taoh talaih khoang gilai saong majam gang pataok pacang thaok ginuh di tatua Mỏ Cay klak angaok jalan QL.60, So Padang Vinh Long pathau khan pakauk jalan nduac angaok ia di dom binah jalan barat saong ribaong Mỏ Cày meng harei 8/10 tal harei 16/10. Dom jalan angaok ia oh hu peih nduac tapa labik daok padang ngak. Langiu tukvak patakik dom jalan nan, dom gilai gaiy hu peih nduac tapa labik daok padang ngak min brei ngak tui pato tacei di kapul tacei ba jalan mbak di labik.

Urak ini, yaom aring di dom tinh gah Pei negar daok glong saong tani tanat jang dom thun, dahlau. Di Ca Mau aring mek gạch janih 1 yaom meng 600.000 tal 700.000 đồng sa kilo; aring ralaow yaom meng 300.000 – 350.000 dong sa kilo. Cà Mau lac tinh hu taneh raong aring tathik  praong abih dalam negar. Meng akaok thun tal ini, tinh hu labaih 365.400 hecta  raong aring tathik. Langiu di nan, ralo bruk ngak mbang  daok hu peih praong yau raong aring tathik  gam hadang tui jalan chuan VietGAP.

Hadah page harei ini, hajan praong dui atah ngak ka ia di halau angaok tuh mai rilo, ngak kan kandah yaok pluh rahra saong urang ngak kong di danak dak kuac kuah Suối Cái binah nao tapa phuong Tân Khánh, Ban raya HCM – dahlau diah lac Ban raya Tân Uyên, tinh Binh Duong. Dalam ia nduac khang catang, kapul chuc nang hu medeih tapa malam piah daong rilo urang nao tal labik salamat. Tal page ini, ia sua trun jang. Kapul chuc nang daok patui veik ramik sang danaok, tani tanat raidiuk saong peih bruk kuhria khat lahik.

Trung Quoc mbang akaok meti brei pandar jien karja negar piah daong laba ka urang blei sang daok. Tui nan, meng harei 1/10, urang blei sang akaok meti  hu ginup tui sarak ba tabiak hu daong 1 % jien laba, dalam 5 thun. Makna di sarak ini brei  salih jalan sahaneng di urang khin blei sang. Urak ini, Trung Quoc  hu labaih 750 trieu met vuong sang daok pablei. Dom baoh sang ini pablei trun yaom gam gam dalam dom thun tapa.

Rajaei Philippines daok srap gap ka kadha kanjah jhak abih ngan haong kakei caga ka bruk mbuan kurang kaya mbang, dalam tuk El Nino “biak catang” hu kuhria mboh lac dui atah tal kreh thun 2027. Jabat chuc Kaya mbang pakat Negar (NFA) daok peih praong prein khik piah, dalam nan hu bruk pah gilang khik piah bahrau, piah parilo padai brah khik piah. Meng dahlau lac negar pablei brah tabiak langiu negar rilo abih di dunya, Philippines urak ini lac negar blei brah tame praong abih, brah blei tame hu 3,37 trieu tan di thun 2025.

Pahadar  50 thun ngak tabiak kong nghe Apple, sa bruk to yaom dom kaya  d hãng  hu kapol negar Mỹ, dalam nan njauk caik hatai lac daok tha baoh mac tinh Apple-1 ngak bruk. Baoh mac tinh ini daok huroh mbaoh tangin di Steve Wozniak di bo mach saong harak thư  hu mbaoh tangin di Steve Jobs. Dom kadha ini bo baoh mac tinh nan  hu yaom  meng 500.000 – 800.000 USD. Bruk to yaom online dui atah tal harei 14/10.