Page ini (7/10), di Ha Noi, Kapul Pachreih bac Viet Nam peih Nyaom roya lambaok vakil dalam negar. Dalam tukvak ngak bruk meng blaoh, Kapul Pachreih bac Viet Nam hu padang hu majam praong hu labaih 27 trieu urang dalam kapul. Danak dak pachreih bac, pachreih ngak mbang saong padang rahra bac megru di dalam negar patui veik taduan dom bruk naih gheih, daong prein khang. Amuk Lộ Nữ Hoàng Tiên, bangsa Cam xa Ninh Phước, tinh Khanh Hoa brei thau, meng bruk mekre bac megru di palei pala, but pajaih hu pagam bruk pachreih bac megru haong bruk pato ka ilamo, ilamo bangsa Cam, piah ka dom adei oh tok siam ka gah pato megru, bo daok hu anit ranam, klah rabha, iek praong ong amuk mei, amaik ame saong khik ramik ilamo bangsa drei.

Tui Cuc Pala drak saong Khik caga phun pala, Mentri Ngak nong saong Alam moi truong, tal puac thun 2025, taneh pala tui Danak dak 1 trieu hecta padai brah pahe bingi, takik tathuak nerak labaih 379 ribau hecta, tapa labaih 180 ribau hecta. Tapa bruk patak pataom hu jien buh tame ngak takik, brei yuak hu rilo padai saong takik tathuak nerak, bruk ngak padai brah pahe bingi, takik tathuak nerak pachreih hu labaih 175 ribau baoh sang di Bhum taneran kraong Cuu Long tame ngak.

Ban raya HCM daok mek panuac ndom meyai ka bruk maong iek bruk anak meta brei padeih atau cakak klaoh bruk kinh te malam meyah ngak kan kandah tal rahra. Tui danak dak kuhria, meyah bruk ngak mbang pablei salih malam di labik ngak suan adat hukum ngak kandah trak tal raidiuk rahra atau hu rilo panuac ndom meyai oh njauk hatai. Labik pasang iek brei pasang duah, ndom meyai, pathau khan jabat hu tham quyen maong iek pasiam, anak meta brei padeih atau cakak klaoh bruk ngak.

Dom harei tapa, hajan praong gam ribuk ia sua meng kraong gah angaok tuh tame kraong, barat tagok glong, sre an hamu. Di xã Bình Thành, yaok pluh hecta padai tathak, kuhria caga dahlau, ia duak dalam, mbuan khat lahik ralo. Mban Tacei ba Bol lin Bien phong tinh Tay Ninh tacei ba dom don vi jak ba dom gah daong ka bhap bini samar yuak padai, njam patam bilan Thu Dong. Anak bruk ia ribuk sua sraw kadau, gah ngak nong pachreih dom bhum palei, mikva bhian tui iek khaw tin piah samar thau dahlau, kuhria caga, khik iek taneh pala.

 Tui Balai Kuhria langik tasik kraong ribaong Meraong negar, di Ban raya HCM tanut ia di jaik abih dom balai di angaok kraong Sai Gon tagok samar dalam 5 harei anak tal. Tal harei 10-10, tanut ia glaong abih di dom balai Phú An, Nhà Bè meda di tanut glaong meng 1,63 - 1,68m, di tanut njauk kakei caga ka 3, daok balai Thủ Dầu Một di tanut glaong kakei caga ka 3. Rahra brei caga hajan praong pambuak ia ndik glaong meda ngak ia dauk di dom bhum dhaong biar, tapen kraong, barat ribaong,  ngak kan kandah tal jalan mbak.

Salih ka bruk daok cang suai damuai di mblang kapal ahaok, tuai damuai cang do mbang kapal haok negar Thái Lan meng 6 tal 8 mon piah nao tuor rivang ma-in, mbang yaom kaya pablei dalam jalan ban saong tame massage tui jalan meng kan jaik mblang kapal ahaok dahlau tuk gilai mai ngak harak gal par nao veik oh abih jien meng thun 2027. Danak dak ini dalam Danak dak patagok Thái Lan hu jeng pasak kapal ahaok di dom negar jaik taphia, tui nan patagok jien mek tame di tuai damuai dunya tuk nao tapa negar ini.

Di Harei pahadar 3 harei rah tabiak mesuh metak di Gaza, karja Palestine gam haong dom gah khau tin di labik harei kabroi pathau khan bruk kuhria hu brei thau, dom mbang taong tame di bol lin Israel tame Gaza dalam 3 thun tapa, ngak ka jaik 22.000 uranaih metai, meblah labaih 30% taong abih urang metai kuhria hu. Taphia uranaih, urang kamei jeng meblah labaih 12.400 urang metai. Daok khat lahik ka kaya ngui, mesuh metak ngak labaih 90% ha tang di Gaza njauk tayah tayac atau khut khat.

Mesruh metak di Trung Dong  daok rah tabiak kan kandah tuk Mỹ pakhang bruk daong medruh di Saudi Arabia piah taong tame bol lin Houthi di Yemen. Bol lin Yemen ngak hu labaih 1.000 mbang taong tame dom labik di Houthi, tui peih praong bruk taong tame ban ine Sanaa. Dalam tuk nan, dom bol lin kayua Saudi Arabia ba kaok khan brei thau 100 kapal ahaok  mesruh hu ba tame saong daong bol lin Yemen  angaok langik.