Akaok mban Tuyen giao saong Dan van Negar ong Trịnh Văn Quyết harei kabroi ba Kapol rajakar di Dang, Karja saong Mat tran negar Viet Nam mai ayuh harei Giang sinh di TPHCM. Kapol urang hu taom gaok Tong Giam muc Tong Giao phan TPHCM, Akok Hoi dong Yam muc Viet Nam Nguyễn Năng gam haong dom linh muc, urang agama saong lambaok bhap bini Kito. Lambaok vakil ka Dang saong Karja, ong Trịnh Văn Quyết payua panuac  ayuh Giang sinh hu rilo siam mekre saong thun birau haniem siam. Ong Trịnh Văn Quyết taong yaom glong jalan sahaneng “ iek praong Chua, anit taneh ia” di bhap bini Kito, njauk ndem tal dom bruk ngak pahala, daong urang bhum ia sua dalam thun tapa. Jeng dalam harei nan, dom urang jakar hu nao rivang saong ayuh Hoi thanh Tin Lành Viet Nam.

Patui veik bruk ngak siam di pasrak padang bruk jum pataom taong abih bangsa, di Nyaom roya mbang ka I, vaktu 2025 -2030, Mat tran Negar Viet Nam tinh Dak Lak njauk gauk ka 6 danak dak bruk ngak hu makna praong saong 13 kadha peih ngak cambaic laic. Dalam nan, kham merat jak ba gauk padang ngak hu takik abih lac 1.000 baoh sang Jum pataom; daong takik di nyu 1.000 baoh sang kathaot, jaik kathaot tabiak truh kathaot khang kajap; jhul pakhang bruk pandar kong nghe khaw tin, salih taka so dalam bruk  pandar taka so di dom pakat Mat tran. Ong Y Giang Gry Niê Knơng, Pho Bi thu Tinh uy hu pok ngak Akok Uy ban Mat tran negar Viet Nam tinh Dak Lak mbang.

Hadei jaik 15 harei peih ngak tui jalan “ ngak bruk samar drah, samar salah blaoh”, baoh sang akaok meti di “ Danak dak Quang Trung” di tinh Gia Lai hu Bol lin 34  ngak salah saong jao veik sang ka muk Tô Thị Sửa, umo 88 thun, palei Chánh Hội, xã Phù Mỹ, dahlau tukvak ba tabiak. Dalam tinh Gia Lai hu 674 baoh sang khut tayak abih, brei ramik padang veik kayua ribuk ka 13. Mbiah tal ini, taong abih dom baoh sang nan hu padang ngak, daong  bhap bini hu labik daok tani tanat, uan raok Tet Nguyen dan dalam baoh sang birau praong laneng lanoi, kajap.

Mbiah tal ini, dom danak dak binah 2 saong 3 di Danak dak jalan peih drah samar Bien Hoa - Vung Tau, jalan tapa tinh Dong Nai saong TPHCM hu pambuak jalan tapak. Taong abih Danak dak Binah 2, tapa tinh Dong Nai daok peih ngak “ luac harei, luac harei melam”. Dom labik canah jalan Tân Hiệp, labik pambuak mblang kapla haok Long Thành saong labik jalan peih drah samar  TPHCM - Long Thành - Dầu Giây daok peih ngak drah samar. Jalan peih drah samar Bien Hoa – Vũng Tàu atah labaih 54km, dalam nan jalan tapa TPHCM atah jaik 20km.

Birau ini, kayua langik oh lagaih nan ye dom janih njam patam di tinh Dong Thap daok takik, yaom tagok glong; dalam nan, baoh amriak  biak chiat jien, urang pala amriak  laba rilo. Urak ini, yaom amriak meng 100 - 120 ribau dong sa kilo, amriak janih A yaom tagok tal 140 ribau dong sa kilo. Yaom nan, yaok kilo amriak, urang pala laba labaih 80 ribau dong. Tui urang pala amriak di bhum taneh Gò Công di tinh Dong Thap, yaom amriak urak ini  glong abih dalam 5 thun tapa.  

Tong thong Donald Trump birau mbaoh harak ba angan jru fentanyl tame “ vu khi pametai rilo”, brei mboh bruk hu makna praong di bruk mesruh metak pacang matuy di My. Harak hu khan cambaic laic fentanyl lac sa janih matuy tong hop catang, mbuan ngak metai manuac  dalam 2 miligam. Karja Mỹ khan lac bruk nan ba tal  fentanyl dreih vu khi hoa hoc jang  jru phien.

Anak bruk njom nerak yawa langik dui atah saong biak trak, karja ban ine New Delhi, An Do ba tabiak dom jalan pacang cakak tathuak nerak saong khik prein yawa di bhap bini. Sa dalam dom jalan njauk caik hatai abih lac hukum pakauk pandar dang patau saong tahaneh mbang meng njuk di dom khach san, nha hang saong kuan mbang langiu langik di ban raya. Dom labik ngak kaya mbang pablei brei salih tapa pandar nhien lieu hacih yau khi gas atau dien, piah takik tathuak nerak. 

Kong ty roh duah darak pasar kong nghe Counterpoint birau ba tabiak panuac lac, samart phone ngak tabiak pablei di dunya kuhria trun 2,1% di thun anak tal kayua jien chip tagok glong. Njauk ndem tal darak pasar yaom biar  ala 200 dola gaok rilo kan kandah. Dom  samartphone di Trung Quoc  yau Honor saong Oppo anak tal mbuan gaok khat lahik jang, njauk ndem tal janih yaom lap, dalam tuk Apple saong Samsung hu labik dang biak siam piah ngak mbang cak rok patagok./.