Dang akaok ba Mbang nyaom biai haong dom mban sit di Hoi dong palih ruah pakat Negar, piah srap gap siam abih ka harei palih ruah dalam harei 15/3 anak tal, Akaok Quoc hoi Trần Thanh Mẫn, Akaok Hoi dong Palih ruah pakat Negar ndom lac: harei 15/3/2026, urang buh phieu dalam negar brei hu mbaok palih ruah, ini lac danak dak chinh tri hu makna di taneh ia negar, lac harei raya praong di taong abih rahra, kayua nan dom jabat njauk brei pasang iek, pasang duah taong abih dom gah ngak bruk palih ruah. Abih di nyu nan lac caik hatai ka dom bhum atah bayah, bhum tapen negar, bhum tasik kaoh pulao, dom labik buh phieu saong dom bhum daok kan kandah hu brei palih ruah aval.

Tui pathau khan di Jabat Hoi dong Palih pakat negar, mbiah tal ini bruk kuhria caga ka harei palih ruah buh phieu hu ngak salah blaoh taong abih bruk ngak, dalam negar padang hu 34 Uy ban palih ruah pakat tỉnh, 3.320 Uy ban palih ruah pakat xã, gam haong 182 Mban palih ruah urang vakil Quoc hoi, 724 Ban palih ruah urang lambaok vakil Hoi dong bhap bini pakat tinh, labaih 22 ribau Mban palih ruah urang valik Hoi dong bhap bini pakat xã saong labaih 72 ribau kapol palih ruah, njauk manuac saong tukvak hukum ba tabiak.

Kong an Ban raya Ho Chi Minh daok pandar siam lagaih Co so du lieu paket negar ka rahra piah duh bruk pasang iek saong srap gap ka palih ruah dalam harei 15/3 anak tal. Thieu tuong Tạ Văn Đẹp – Phaok Yam ndok Kong an Ban raya Ho Chi Minh brei thau, bruk padang tabiak harak angan urang buh phieu hu ngak bruk di drei angaok majam du lieu rahra “njauk, ginup, hacih, diuk”, daong pasang duah, pabak khau tin daok pandaok njauk lagaih, khik kajap quyen palih ruah di rahra.

Mblang hamu di palei Ninh Chài, xã Ninh Quới, tỉnh Cà Mau kuhria caga jiak yuak padai. Dahlau diah, bilan padai đông - xuan caong takre ralo abih kayua yuak hu rilo padai gam pablei hu rilo jien abih dalam thun. Min , thun ini yaom padai yaom padai trun biar gam gaok kan kandah kayua xang menyek tagok yaom. Dalam tuk nan yaom padai trun biak lap daok jien pah mac yuak, mac haok pruh jru abih rilo jien. Yaom xang menyek tagok ngak dom jien karei tagok tui, min yaom padai trun yau nan ye urang ngak nong lahik rilo jien.

Puac bilan 3 saong dalam bilan 4, meda rah tabiak bruk kurang ia di Dong Nam bo saong cao nguyen Nam Trung bo. Dalam tuk di bhum Taneran kraong Cuu Long, njom ia mbak tagok. Tui ong Nguyễn Hồng Khanh, jabat kuhria langik tasik kraong ribaong hu kuhria ka ia hajan saong ia nduac di angaok dom kraong ribaong di bhum gah Meraong negar daok di tanut jaik yau tanut kuhria rah tapa rilo thun. Min, kayua daok yam tame tuk tabung glaong bilan thu nan taong abih ia jeng daok di tanut biar. Halau ia hu padang khik di dom danao kraong ribaong saong dom danao bineik thuy dien duh ka bruk ngak nong urak ini hu labaih 70-80% dung tich thiet ke. (SGGP) 

Takik abih lac 30 urang metai dalam dom mbang glut jaleih taneh, kayua hajan praong di gah Meraong Ethiopia. Urang jakar ngak praong di bhum ini khan lac, taneh gluh saong ia ribuk ngak gar rilo jalan mbak, nao mai kan kandah, ba tal bruk daong gaok rilo kan kandah. Gam iew bhap bini daok di dom labik mbuan glut jaleih kayua langik hajan ribuk brei hu rilo jalan pacang caga, kayua mbuan gaok bala dalam bilan hajan. 

Kongti ilamo kong nghe dang akaok di Australia Atlassian brei cakak patrun 1.600 labik, samu haong 10% urang ngak bruk. Langiu di dom gilang pariak di Australia jeng cakak patrun rilo labik pambuak tal ilamo kong nghe. Bruk brei padeih bruk ka urang ngak bruk dalam gah ilamo kong nghe patui veik rah tabiak di Australia tuk tri tue nhan tao patagok khang saong meda taduan rilo bruk bo dahlau diah anek menuac ka meng ngak hu.

Rajaei An Do brei ngak cadu trun dom bruk ka phun jien buh tame meng dom taneh ia jaik taphia, dalam nan hu Trung Quoc. Dom gah kong nghiep praong di An Do yau kaya kan yau phun jien, dien tu saong bruk ngak pin nang luong ia harei. Dom jalan birau ini piah jhul pakhang bruk pachreih urang buh jien tame ngak saong daong bruk ngak kinh te dalam tuk sraw kadau chinh tri di dunya saong gaok kan kandah tal dom jien je di Mỹ./.