Bruk srap gap ka mbang palih ruah daok rah tabiak samar chip di dom bhum palei tapen tasik di Ban raya Ho Chi Minh. Di xa Long Sơn, Long Hải…karja palei pambuak haong dom kapul bien phong peih bruk pathau khan, jak ba urang nao tasik daok ngak bruk di angaok tasik ramik tukvak tame taneh riya buh phieu njauk harei 15/3. Dom urang buh phieu caong takre tame hala phieu di drei, caong lac dom urang lambaok njauk palih ruah brei ngak njauk dom phun sanya hu ba tabiak dalam dom mbang taom gaok urang buh phieu jak ba palih ruah.

Kayua rilo ribaong kraong, rilo labik daok di bhap bini tapen glai, tapen tathik di tinh Ca Mau atah pasak xã, bhap bini ralo nao mai meng jalan kraong ribaong. Yau nan min, rilo bhum palei pandar ghe gilai peih loa papar sap angaok ribaong kraong, jak ba cu tri hu mbaok tame palih ruah. Bruk ini daong ka urang cu tri di bhum atah pasak xã thau tantu kadha dahwak, thau kuhria caga dahlau ka bruk palih ruah.

Tinh ndoan Lam Dong hu peih rilo danak dak lagaih, paglaong bruk xung kich di dam dara dalam bruk pathau khan saong duh bruk palih ruah. Dalam nan pataom tame padang majam khau tin, kadha pathau khan ka bruk palih ruah angaok Internet. Gam haong nan, padang 535 kapul ngak bruk halan tiam hu labaih 6.700 urang ndoan, dam dara hu mbaok di jaik abih dom bhum palei dalam tinh piah hu mbaok daong bruk palih ruah.

Urang ngak nong tinh Dong Thap daok yuak padai Dong Xuan. Padai yuak bilan ini hu ralo, oh ngak kan kandah tal bruk njom ia mbak min yaom padai brah biar, gam yaom khak drak  saong jru khik caga phun pala. Tuk ini, tui labik saong padai yuak hu yaok hecta urang ngak hamu hu laba labaih meng 10 -15 trieu dong, meda hu hamu oh hu laba labaih. Yau nan ye, tukvak anak tal Sở Kong thuong Dong Thap brei pambuak haong dom gah saong doanh nghiep peih ngak rilo jalan sumu gauk piah paglong jien mek tame meng bruk pablei padai brah tabiak negar langiu.

Dom jabat chuc nang di tinh An Giang daok ngak bruk pasang duah ngak cambaih laih bruk ruak mek kaya mbang di kapul urang tuk mbang kem di 1 labik ngak kem di jalan 3/2 di phuong Rạch Giá. Tui kuhria mboh, urak ini hu labaih 63 urang hu medil njauk ruak mek ngan haong rilo bruk brei mboh yau ye taglaoh aok, pandik tian, aih caraoh. Dahlau nan rilo jabat mban nganh kakei blei ahar kem di sa tadai kuan ahar di jalan 3/2 piah tadhau ayuh harei 8/3. Hadei tuk rilo urang mbang ahar kem ye jeng njauk pandik tian, taglaoh aok, aih caraoh saong brei tame sang iek ruah piah pasang iek.

Rajaei Nhat Ban brei ba tabiak sarak ka bruk kandah nan lac peih gilang khik piah xang menyek di negar. Urak ini yaom xang pablei rai di darak pasar dalam negar mbuan tagok labaih 200 Yen. Ini lac bruk ndua naong trak ka taong abih bruk ngak tabiak, pablei salih  di Nhat Ban. Urak ini, gilang khik piah xang menyek taneh ia Nhat Ban hu menyek ginup pandar dalam negar labaih 254 harei.

My brei ba tabiak gilang 172 trieu thun menyek meng Gilang Khik piah Menyek Chien luoc piah pacang bruk patagok khang di yaom xang menyek dalam tuk mesuh metak haong Iran ngak klaih klaoh halau pabak dalam dunya. Bruk ini hu ba tabiak dalam tuk darak pasar menyek dalam dunya daok ciuk kateik geik praong kayua mesuh metak di Trung Dong. Tui Mentri Nang luong My, gilang khik piah chien luoc di negar ini daok labaih 415 trieu thung, samu haong 60% cong suat.

Quoc hoi Han Quoc brei khan tapa hukum peih tabiak jalan ngak ka Rajaei taneh ia ini buh tame 350 ti dola ngak mbang gah kong nghiep praong di Mỹ. Tui harak pambuak bruk, Han Quoc njauk hatai buh tame 200 ti dola ka dom gah kong nghiep praong karo kajap di Mỹ saong 150 ti dola ka gah ngak gilai. Salih veik, kaya kan di Han Quoc meda daong trun laba blei tame meng Mỹ./.