Thu tuong Rajaei birau caong takre khik brei salamad, hacih sa-at var mbang huak di anek saih dalam dom sang bac. Dalam nan akaok UBND dom tinh, ban taduan taong abih bruk brei urang peih ngak var mbang huak saong khik iek di dom sang bac. Thu tuong caong khin brei pakhang bruk khik iek cambaic laic, tui iek saong khan cambaic laic ka dom janih kaya mbang, don vi pabak, kaya mbang saong dom asar kadha pambuak tal var mbang huak piah amaik ame anek saih thau saong tui iek.

TPHCM daok peih ngak dom jalan pacang khik ia dauk, dalam nan pataom tame ngak salah 9 danak dak praong saong pakhang dom bruk pacang caga bilan hajan. Bruk hu makna praong ngak salah 9 danak dak, rik tame  langyah dom labik ia dauk dalam meng 30 cm tagok. Gam haong bruk caga ia dauk, gah padang ngak pakhang bruk pasang iek phun kayau, abih di nyu lac dom jalan hu ralo manuac nao mai, sang bac, sang iek ruak. Ban raya tui iek bruk rah tabiak di langik, tui jalan “ 4 di labik”, bruk ngak po langyah dom bruk rah tabiak dalam bilan hajan thun ini saong dom thun anak.

UBND Ban raya Cần Thơ mbuak harak peih ngak Danak dak Ar pacang glut jaleih samar  di ribaong Cái Muồng saong Vàm kênh Xẻo Chồi - Kênh Mới di xã Châu Thành, kuhria jien buh tabiak ngak jaik 125 ti dong. Danak dak ini piah khik pacang sumu jeng yau pasiam hadei bala kayua langik rah tabiak; pacang caga glut jaleih veik, lih tame dalam, khik brei siam salamad ka manuac sia saong kaya drap ar di bhap bini. Meng akaok thun mbiah tal ini, di ban raya rah tabiak  jaik 330 labik glut jaleih ar ribaong, ar tathik  kuhria atah abih labaih 35 km, ba tal labaih 100 baoh sang khat lahik, tui nan ngak kan kandah tal jalan mbak dalam palei pala, ndien saong ia.

Ia di dom kraong biraong dalam tinh Vĩnh Long daok tagok samar  kayua ia ndik akaok bilan 8 Saka ia bulan di gah angaok kraong. Mbuan ba tal ia dauk ralo labik dui atah tal harei 16.9. Dom balai Mỹ Thuận, Cần Thơ, Chợ Lách tapa tanut ka III. Gah chuc nang  kakei bhap bini daok tapen labik kraong Tiền, kraong  Hậu, kraon Cổ Chiên gam haong karja dom bhum palei samar ngak kajap ar pacang, pandon glong kaya dalam sang. Kuhria caga dahlau hu siam piah takik khat lahik jien padai jeng yau khik hu bruk ngak mbang pala darak.

UBND xã An Cư, tỉnh An Giang pambuak haong Pasak rayo papar binguk Việt Nam di bhum gah Meraong negar peih Nyaom pakacah limo meng kan di Baha thun 2026, pakacah yai Cúp Khak drak Cà Mau. Nyaom pakacah thun ini hu 32 gu yau limo mai meng dom bhum palei tame pakacah. Pakacah limo oh lac bruk padhih the thao, ma-in bo daok pambuak haong raidiuk ilamo saong adat cambat meng kan di urang Khmer Meraong negar. Ini jeng lac bhum palei khik ramik, patagok ilamo meng kan, pakhang bruk jum pataom saong ma-in bui sambai di harei Roya Sene Dolta di urang Khmer.

Dom bol lin daong di Indonesia hu pakhang bruk duah daong dom urang gaok bala tuk kapal gilai Virgo Transport 8 di tathik  Java page harei 13/9. Urak ini hu 107 urang pandon nao labik karei hu salamad, 6 urang metai saong 130 urang lahik. Indonesia hu 17.000 kaoh pulao, kapal gilai pajeng ba. Yau nan min, dom tanut salamad oh njauk tuk halei jeng ngak catang, mbuan rah tabiak bala.

Cảnh sát Thái Lan birau chap mek kapol pablei salih suan hukum dom janih “kalam klauk jru trun kilo” oh tapa pasang iek kuhria tui jien labaih 50 trieu baht (labaih 1,5 trieu USD). Jabat chuc nang kakei dom janih kaya kalam mbut klauk jru trun kilo hu jru brei pasang iek tani tanat karei, brei hu sarak pandar iek ruak ka urang me-ik saradang tuyp 2 saong tui tacei pato di gru jru. Bruk pablei salih online mbuan rah tabiak rilo kan kandah saong mbuan ba tal ruak ung thu tuyen giap. 

LHQ kakei dom kapol khung mbo pambak tame game saong mang XH piah palua dom uranaih, dam dara. Dom nyaom khung mbo dak harei dak hu pandar kong nghe so piah palua dui ba tame, dalam nan hu uranaih saong dam dara. Dom kapol nyaom nan tame dom game dien tu saong dom nen tang yau Discord, Twitch atau Steam. Khol  nyu ngak tabiak game saong mbat tame asar kadha dui ba, gam pandar mang XH saong dom asar kadha taong paoh piah dui ba uranaih ngak tui./.