Tapa duah thau danak dak pasiam veik jalan tapen kraong Xuyên Tâm nao tapa 4 phuong: An Nhơn, Bình Lợi Trung, Gia Định saong Bình Thạnh (di quan Gò Vấp saong Bình Thạnh dahlau diah) Ako UBND TP.HCM ong Nguyễn Văn Được kakei lac bilan 6 thun 2026 brei bayar taong abih mbaok taneh; meyah oh ngak salah, dom phuong brei taduan bruk nan anak Ban raya. Danak dak ramik pasiam jalan tapen kraong Xuyen Tam kuhria jien buh tame ngak 17.230 ti dong, dalam nan jien bayar piah peih taneh lac 14.000 ti dong.

UBND tinh Dong Nai mbaoh harak quy hoach parabha taneh 1/20.000 Labik ngak kong nghe so pataom tame Long Thành di xã An Phước saong xã Bình An. Piah padang pasak kong nghe khaw tin, padang ha tang ka ung dung saong patagok kong nghe so. Ba mbuan ngak bruk dunya, pachreih urang ngak bruk hu ilamo, rik tame paglong prein khang meriak gak di doanh nghiep kong nghe so Viet Nam. Tui harak pathau khan, urang ngak bruk tui kuhria dalam abih Khu kong nghe so di Long Thành lac labaih 10 ribau urang. 

UBND tinh Gia Lai daok peih ngak jalan cakrok patagok tapen ikan Nhơn Lý, phường Quy Nhơn Đông ba tame ngak yulit duh ka tuai mai sirah. Piah peih ngak hu siam lagaih tapen ikan gam ngak yulit, So Ilamo, The thao saong Yulit pambuak bruk padang ngak dom kaya duh ka tuai sirah di  Nhơn Lý, Nhơn Hải tui jalan ba palei ngak mbang taong chap ikan tathik saong rija roya bhap bini tame. Palei ini padang ngak yulit bhap bini pambuak haong palei ikan, palei ngak meng kan; gam ba tabiak jalan peih ngak, tui khik saong ngak brei hacih sa-at alam moi truong.

Ruak kayua não mô cầu kan si thau dahlau hu rilo urang njom ruak, gaok ruak trak di rilo tinh, ban yau Hà Nội, Lào Cai, Hà Tĩnh, Vĩnh Long, Lâm Đồng, An Giang. Ini lac sa dalam 10 ruak njom mbak hu urang metai rilo abih di Viet Nam. Ruak hu ba tame ruak pambak ruak nyaom B kayua mbon nyom mbak samar, meda ngak metai. Langiu bruk klauk jru, bac si tacei pato brei khik rup pabhap saong alam moi truong, cuh pataik pacang pabah labik hu rilo manuac.

Yaom xang menyek gam gam tagok ba tal dom janih kaya karei tagok tui. Di dom darak pasar di Ban raya HCM yaom ikan, rilo saong njam patam tagok meng 5 tal 20 ribau dong sa kilo. Dom jit vu mbang huak, ia menyum jeng tagok tui. Yau nan min, di dom ha thong sieu thi praong di TPHCM urak ini daok khik tamo yaom dom janih pandar yaok harei. Bruk yaom xang menyek tagok oh ka padeih di jien ndik radaih, bo ngak ka taong abih dom kaya karei meng mblang hamu, trang trai, snag mac ngak kaya tal urang pandar.

Bỉ peih ngak rilo bruk pahadar 10 thun harei patuh phao di kol khung mbo ngak sre rilo darah di thun 2016, ba tal 32 urang metai saong yaok rituh urang njauk rambuac. Ini lac sa dalam dom bruk bala trak abih dalam sajarah dakrai salih birau di taneh ia ini. Thun 2026, dua baoh mbom patuh gam gam di labik ngak harak taduan drap ar di mblang kapal ahaok ban ine Brussels ngak metai 16 urang. Labaih 1 mon, sa mbang patuh phao karei di mblang radaih dien ala taneh Maelbeek, ngak 16 urang metai.

Rajaei Anh mboh lac viem màng não di hạt Kent di gah Brak taneh ia ini lac bruk njauk ngak samar chip,  hadei tuk urang njom ruak samar saong hu dua urang metai. Jabat  An ninh Y te Anh brei thau, kuhria tal biar harei 17/3 tui mon pak nan hu 20 urang ruak. Dahlau di nan, hu 15 mbang urang ba tame iek ruak. Taong abih  dom urang nan  brei ba tame sang iek ruak. Njauk caik hatai, ralo lac dom urang ruak viem glo akaok lac sinh vien saong anek saih.

Dom urang metai dalam dom mbang ribuk sua jiak ini di Kenya tagok 71 urang. Labaih meteh dom urang nan kayua ribuk ia sua lac rahra ban ine Nairobi, labik gaok kan  kandah trak abih. Jalan tathuak ia suai, kraong ribaong kadan saong bruk ngak tui hukum oh siam ba tal trak jang. Gah urang jakar khan lac meda daok jhak veik kayua hajan daok dui atah harei dalam adit ini.