Page ini (19/3), padang ngak rilo sang bac pho thong gam bac gam daok di dom bhum taphia negar thun 2026 peih tabiak di 17 tinh, ban. Brei panuac di var padang ngak Sang bac Pho thong gam bac gam daok pakat TH saong THCS Đồng Đăng, xã Đồng Đăng, tỉnh Lạng Sơn, Tổng bí thư Tô Lâm khan lac: Ini lac sa bruk ngak njauk, hu makna praong dalam, brei mboh bruk sangka di Dang, Karja brei ka urang bhum tapen negar, bhum atah bayah daok rilo kan kandah. Urak ini, dalam negar  hu 22 tinh, ban tapen negar  kuhria abih tih hu 248 xã, phuong tapen negar, kuhria  padang ngak 248 sang bac pho thong gam bac gam daok dom pakat.

UBND TPHCM birau padang kapol urang jakar nao pasang iek bruk khik glai di Bein pakat negar Côn Đảo  saong dac khu Côn Đảo, piah pasang iek dom asar kadha ka bruk quy hoach, patagok kinh te - xa hoi pambuak haong bruk khik drap ar alam moi truong. Ndem ka bruk patagok glai khang kajap, Pho Akok UBND TPHCM Bùi Minh Thạnh  khan lac: “ Oh salih alam moi truong piah ba tame bruk ngak mbang patagok kinh te”, tui nan caong khin dom don vi brei khik ramik, pasiam veik saong khik iek glai, drap ar tathik saong rilo janih sinh hoc, pamong tal bruk cakrok patagok  hijao hacih, khang kajap ka Côn Đảo. 

UBND tinh Dong Thap birau mbaoh harak brei pandar kaya ngan haong kaya mek veik dalam danak dak kayua bhap bini rik jien tame kuac mek cuah kraong Tien, tapa pabah kraong Tiểu, xã Tân Phú Đông. Ini lac danak dak hu peih ngak piah mek cuah njom ia mbak pabak jien kuac ribong, oh pandar jien karja. Bruk mboh harak nan rik tame khik brei salamat jalan kraong Tiền bo oh pandar jien karja.

Dom harei jaik ini, yaom kaya nong di tinh Ca Mau trun ralo, abih di nyu lac baoh bloi daok trun biak biar yau nan ye urang pala gaok rilo kan kandah. Bilan akaok thun, baoh bloi  hu yaom 12.000 dong sa kilo, urak ini trun daok meng 5.000-6.000 đồng/kg. Di xã Khánh Bình daok kandong 200 tan bloi oh ka pablei hu. Yaom biar min oh mboh urang mai blei. Anak bruk nan, Kapol urang Ngak nong tinh Ca Mau brei peih ngak danak dak “ Ba gauk daong kaya nong” ka mikva pala bloi. 

Pasak Kuhria dahlau ka langik - tathik pakat negar kakei dahlau, puac adit ini lac dom tinh Nam bo meda  pandiak di ralo labik. Bruk nan kayua langik pandiak catang, yawa la-ar di gah Barak takik, pagam haong takik taginum, pandiak ia harei, ba tal pandiak. Hadei harei 22 bilan 3, hajan gilac veik di biar harei sup di Nam bo. 

Rajaei Nhat Ban - Japon pambuak veik bruk daong jien xang saong menyek diesel meng harei ini dalam tuk xang menyek daok tagok yaom glong. Mentri Jien padai Nhat Ban Satsuki Katayama khan lac, dalam tuk dui atah, Rajaei brei ginup xang menek oh kurang, tui nan brei mboh bruk pandar kadung jien thun 2025 ( labaih 860 ti Yen) jeng lac “sa bruk palih ruah”.

Sarak mien thi thuc 30 harei di Trung Quoc ngan haong bhap bini Nga daok brei mboh cambaic laic. Dom ban daok tapen negar yau Hắc Hà saong Tuy Phân Hà hu jeng labik biak bhian randap haong tuai damuai Nga. Rilo baoh sang palih ruah bruk nao sirah rivang ma-in di harei puac adit, tame Trung Quoc di harei Suk saong giac veik di harei Adit, rivang iek ilamo bhap bini saong kaya mbang biak karei bingi di bhum Dong Bac.

Cuba pasiam veik talei dien saong ba mac tame nduac ndien meng menyek biak praong di negar ini tame ngak bruk, abih bruk lahik ndien dalam negar dui atah labaih 29 mon. Yau nan min, dom urang jakar khan lac bruk lahik ndien daok rah tabiak kayua ngak tabiak oh ginup. Cuba oh ka ba tabiak cambaic laic bruk lahik ndien dalam negar – bruk nan rah tabiak kuhria meng tuk Mỹ cakak menyek di Venezuela./.