Brei panuac ka dom jalan pabak saong khik tani tanat xang menyek, Thu tuong  Pham Minh Chinh caong khin oh brei kurang xang menyek; pakauk khik piah pandap, pambak tame ngak laba, ngak sraw kadau yaom xang menyek. Dom mentri, dom gah pambak tal bruk pasang iek, duah thau saong langyah catang dom bruk ngak suan meyah hu. Thu tuong jeng eiw brei pasang khik saong trun dom jien je pambak tal xang menyek piah daong  doanh nghiep saong bhap bini dalam tuk yau urak ini, pok tagok dahlau harei 20 bilan 3.

Tinh Tây Ninh birau brei ba tabiak 16 binek, hlung kuhria jaik 23.000 ha mbaok ia oh brei lam. Ini lac dom danak dak hu makna  praong piah pabak ia ngak mbang pala darak – ia pandar, pacang caga ia dauk saong khik alam moi truong. Dalam dom danao, hlung nan, hu binek ia Dầu Tiếng lac danak dak praong abih, labaih 20.107 ha, piah padang ia, pabak ia ka bruk pala drak ka rilo bhum palei.

Page ini, po danak dak ngak jalan ĐT 753 gam karja xã Tân Lợi, tỉnh Đồng Nai peih bruk likau ma-ah di bhap bini hadei kuac hluk ngak jalan ba tal 8 baoh sang bhap bini mbuan gaok bala, brei panduan ba nao labik  karei daok. Ong Dương Hoàng Anh Toàn -Pho Yam ndoc Mban khik iek danak dak padang ngak tinh Dong Nai dang tabiak taduan dom bruk kurang di po padang ngak jeng yau don vi tacei pato tui iek, don vi peih ngak. UB bhap bini  xã Tân Lợi jeng likau ma-ah di bhap bini ka bruk caik rah tabiak bruk nan saong iew po padang ngak pambuak haong xã piah ngak salah dom harak gal piah bayar jien khat lahik kayua danak dak.

Chi cục Khik iek darak pasar tinh Dak Lak birau ngak salah harak ho so, payua ka kong an pasang iek langyah  bruk pablei jaik 90 tấn khak ja. Dahlau di nan, jabat chuc nang brei pasang iek sa po pablei salih di xã Ea Súp saong mboh ralo janih khak ja, kuhria labaih 1 ti dong  daok hu pataom di labik ini min oh hu harak gal brei thau khak nan mai meng halei.

Page ini peih pakak, “ Yai caoh mbanh dat blong urang kumei bangsa takik tinh Gia Lai pambuak praong thun 2026 - Cúp VTV5 mbang ka sa”. Yai pakacah peih ngak meng ini tal harei 21/3, pataom 8 kapol urang kumei di bhum Tay Nguyen saong Duyen hai Nam Trung Bo, dalam nan hu dom kapol Ea Păl, Ea Knốp (tỉnh Đắk Lắk); dom kapol Đak Đoa, Jarai (tỉnh Gia Lai)...Yai mbang ini  hu mbaok di dom urang kumei caoh mbanh   dom bangsa takik yau Ê Đê, Jarai, Ba Na, Rơ Măm, Xơ Đăng, Tày, Nùng, Thái…Oh pakacah piah mek yai, dom urang kapol kumei angui cuh khan ao bangsa, ba mai ilamo karei di bangsa drei di mblang caoh mbanh.

Rajaei Cuba kham merat ba tabiak dom jalan pamedeih bruk ngak kinh te payua panuac tal Cuba daok diukrai di Mỹ saong dom taneh ia  karei buh tame ngak mbang saong hu doanh nghiep dalam negar. Rajaei jeng atah klak paga pacang dalam dom bruk ngan haong dom po ngak mbang pablei salih di Mỹ. Bruk salih sarak tok dom harei  hadei Cuba  taduan ndem biai haong Mỹ. Karja Mỹ jeng brei thau duah jalan ngak mbang haong taneh ia karei dalam ralo bruk.  

Tong thong Mỹ Donald Trump khan lac hu “adat tuyet doi” kuhria jien je tui jalan birau, oh lac bruk ba tabiak catang dahlau di Toa an pakat glong Mỹ atah klak dom jien je di dunya. Dalam sa kadha ba tagok mang xa hoi  Truth Social, Tổng thống Trump khan brei thau: “ Dahlak hu “ adat tuyet doi” piah kuhria mek  JIEN JE tui jalan karei saong ngak tui bruk nan. Hadei panuac ba tabiak di Toa an pakat glong, ong Trump hu mbaoh harak  mek jien je 10% ngan haong dom janih kaya pablei tame Mỹ.

6 thun hadei hu urang njom ruak COVID-19 akaok meti di New Zealand, taneh ia ini daok rah tabiak ruak mbang ka 9. Dom urang ilamo y te khan brei thau dom mbang tamuh jit ruak praong meda rah tabiak, min kayua hu klauk jru pacang ruak saong hu ruak blaoh dahlau di nan, virus SARS-CoV-2 urak ini drei yau dom janih virus jalan suan yawa karei pambak ruak yaok thun di negar ini./.