Mentri Pato Megru hu mbaoh tangin ka harei tamat bac THPT thun 2026. Tui nan, Mbang pakacah tamat THPT thun 2026 rah tabiak dalam dua harei 11-12/6, anek saih thau tanut pakacah dalam harei 1/7, aval drah jang meteh bilan dut haong yaok thun. Mentri Pato Megru brei thau, kadha pakacah thun ini jeng tui jalan taong yaom prein bac tapak, patui danak dak bac bahrau, khik parabha tanut điểm 4:3:3 brei tui dom kadha bac hu, hadar kanal, ba tame pandar. Kayua dreih yau thun dahlau, Mentri oh khan brei thau dahlau ka kadha pakacah dreih nan. Dom thun dahlau, labaih sa trieu anek saih pakacah tamat THPT, labaih 50% hadei nan tame dai hoc meng tanut pakacah ini.

UBND ban Can Tho khan brei thau bruk palih ruah buh phieu saong sarak dom urang hu palih ruah urang ka HĐND ban Can Tho mbang XI, vaktu 2026 -2031. Tui nan, hu 84 urang hu palih ruah tame HĐND ban Can Tho mbang XI, meng thun 2026-2031. Cu tri dalam ban caong khin dom urang lambaok vakil brei patui veik bruk ngak siam di drei, pambuak khang kajap haong cu tri, bhian pang, taduan saong khan tagok veik njauk panuac, bruk sahaneng di bhap bini saong rik tame bruk ngak hu jak jeng di ban Can Tho dalam jaman birau.

UB Bhap bini tinh Ca Mau mbaoh tangin brei salih lek taka so phun pala, athur raong di bhum taneh pala padai thun 2026. Cambaih laih lac, taong abih taneh pala padai hu salih tagok tal 88 ha. Dalam nan, 70 ha pala phun yaok thun, 3 ha pala thun suai atah thun saong 15 ha pala padai pagam haong raong kaya dalam ia. Bruk ini piah pasiam veik cau truc tui jalan randap saong siam lagaih jang saong brei mboh bruk ngak tui yaok bhum sinh thai saong kein lagaih ngak bruk, salih ka bruk pandar sa bruk ka taong abih dalam tinh.

Tinh Tay Ninh padang ngak 19 sang bac gam bac gam daok di dom xa tapen negar, buh jien tame jaik 4.000 ti dong. Hadei tuk ngak blaoh, dom sang bac ini brei ka labaih 25.600 anek saih tame bac. Bruk bac 2 var dalam sa harei, hu mbang huak hu labik daok, caong khin takik anek saih klak bac, bruk bac da-a hu sumu gauk jeng yau piah patagok di bhum tapen negar hu siam. Njauk caik hatai, hadei buh jien tame ngak, 19 sang bac salih tapa, dak ramik veik labaih 30 sang bac saong labik duk bilik bac, rik tame ngak brei bruk pato megru njol njac saong paglong bruk khik iek hu siam.

Chi cuc pasang iek darak pasar tinh Vinh Long bahrau taong bhat sa tadai kuan pablei xang, menyek di taka 2/7 jalan Phạm Hùng, phuong Long Châu, hu ta-eng padeih bruk pablei tuk oh ka hu mbaoh tangin brei adat di jabat hu tham quyen. Vinh Long urak ini hu 4 tadai kuan pablei salih xang menyek anak meta padeih pablei. Jabat chuc nang brei patagok bruk pasang iek di bhum yaok harei, kham merat taong bhat dom bruk ngak klaih klaoh halau pabak oh thau makna hagait piah pacang khik kein lagaih ka urang blei pandar.

Tui kuhria di rajaei Han Quoc khan brei thau, hu urang tok diuk tok pasang di Han Quoc  tagok labaih 8% dalam thun 2025 dut saong thun 2024, hu ralo abih dalam 7 thun  tapa. Urak ini, umo thun lakhah mbang akok meti di urang likei  Han Quoc lac 33,9 thun, urang kumei 31,6 thun. Dalam nan, urang klaok klak gauk thun 2025 daok 88 ribau mbang.

Trung Quoc daok mbuan rah tabiak jit ruak ndaih baoh njom tame meng negar langiu. Dalam 10 negar hu dom urang njauk ruak ndaih baoh rilo abih dalam thun dahlau, hu tal 6 negar tapen negar haong Trung Quoc. Bruk ini ngak ka bruk mbuan njom jit ruak tame Trung Quoc tagok rilo. Urak ini jabat chuc nang hu pandar dom bhum palei brei patagok bruk klauk jru caga bhian, gam haong nan jhul khang bruk pasang duah, klauk jru caga ka dom urang oh ka klauk atau klauk oh ka ginup vaccine.

Sa sang iek ruak di Lahabala di Cuba taduan hu 5 tấn vat tu y te meng dom urang ngak bruk di chau Au. Bruk pajeng ba labaih 20 tấn pandap nda daong mai meng rilo negar di dunya piah ngak tayak dom bruk pakauk pajeng ba di Mỹ ngan haong Cuba saong daong bruk iek ruak daok kurang di negar ini. Danak dak nan oh lac daong ka Cuba langyah dom kan kandah bo daok brei mboh thaik binguk di bruk jum pataom dunya./.