Pahadar 95 Harei padang Mat tran Bangsa yasa Viet Nam (18/11/1930 - 18/11/2025), page harei kabroi 9/11, Akaok Quoc hoi Trần Thanh Mẫn hu mbaok di Harei gui pataom grauk abih bangsa di Labik rahra puk palei Châu Thành, xa An Ninh, Ban Can Tho. Akaok Quoc hoi Trần Thanh Mẫn brei mboh hatai bui sambai tuk hu mbaok di Harei gul pataom di sang Baha Tum Núp hu labaih 400 thun, labik ngak ilamo di bangsa Khmer dalam var raya tet yau ye: Tet Bhap bini Chôl - Chnăm - Thmây, harei raya Sen Đolta, raya Óc Om Bóc...

Pho Thu tuong Rajaei Mai Văn Chính  harei kabroi hu mbaok di taneh padang ngak Sang bac Pho thong gam bac gam daok pakat Tieu hoc saong THCS di xa bhum taphia negar Ia Rvê, tỉnh Dak Lak. Bhap bini bhum taphia negar jeng chreih chrai anak bruk sang ka di Dang saong Karja brei ka anek saih di bhum  kan kandah. Sang bac hu padang ngak di taneh praong 5 hecta, kuhria abih tih jien buh tame ngak labaih 185 ti dong, praong brei meng 900 tal 1.100 anek saih tame bac. Jeng dalam harei ini, Pho Thu tuong Rajaei Bùi Thanh Sơn hu mbaok di labik Padang sang bac gam bac gam daok pakat Tieu hoc saong THCS Vĩnh Gia, tỉnh An Giang; Pho Thu tuong Rajaei Hồ Đức Phớc hu mai pataom mbaok di harei padang Sang bac bac gam bac gam daok pakat Tieu hoc saong THCS Thuận An, tỉnh Lâm Đồng…Ini lac dom sang bac dalam taong abih 248 baoh sang gam bac gam daok hu padang di bhum taneh taphia negar tui jalan tacei ba di Mentri Chinh tri.

Mban Jak ba Trung uong daok dalam Uy mban Trung uong Mat tran Negar Viet Nam mbaoh tangin ka bruk rabha paok jien 30 ty dong ka 3 tinh lac Quang Ngai, Gia Lai, Dak Lak – yaok tinh hu 10 ty dong, piah daong dom tinh pasiam samar drah dom kanjah di ribuk ka 13. Kuhria tal harei ini, tapa 5 mbang, Mban Jak ba daong Trung uong hu rabha labaih 538 ty dong (sumu jaik 92% dom paok jien hu taduan) ka 19 tinh, ban pasiam kanjah di 3 ribuk ka 10, 11, 12 saong hajan ia sua.

Brah Ông Cua ST25 di Việt Nam saong Brah Phka Romdoul di Campuchia mek hu jai glong abih di mbang pakacah “Brah pahe bingi abih di dunya” thun 2025. Yau nan, kuhria tal ini, brah ST25 hu blaoh 3 mbang pakacah jai “Brah pahe bingi abih di dunya” mek hu tanut glong abih. Dahlau di nan, lac dom thun 2019 saong 2023. Bruk ngak hu jak jeng di ST25 oh lac mek hu rilo yai glong. Janih padai ini hu rilo urang dalam negar thau tal saong takre, ba mai kein laba glong ka urang ngak nong. 

UB Bhap bini Ban raya Ho Chi Minh ba tagok ka HĐ Bhap bini Ban raya buh jien tame bruk kuac kuah, pasiam alam langik saong pasiam ban medin kraong ribaong Bà Lớn piah peih laneing jalan tathuak ia, pacang ia dauk, pasiam thaik thaot saong panduan sang danaok tapen ribaong dahlau thun 2030. Ribaong Bà Lớn hu meng ribaong Kênh Đôi (phuong Bình Đông) saong puac abih di canah pak ribaong Bà Lớn – ribaong Bà Lào (xa Bình Hưng). Taong abih jien buh tame ngak kuhria hu labaih 9.200 ty dong meng kadung jien Ban raya.

Mbang kareik pambang padeih ngak bruk di rajaei atah abih kuhria meng lavik mai di Mỹ dui atah tapa 40 harei tuk dom thuong nghi si Dan chu saong Cong hoa oh njauk gauk ka bruk pandar kadung jien iek glang prein yawa. Bruk kareik pambang ba tal dom danak dak hu makna praong yau daong kaya mbang oh daong jien, tukvak ngak bruk, rajakar lien bang oh hu bayar jien ngak bruk saong klaih klaoh bruk ka dom gah hu makna praong, yau kapal ahaok. Tui Quoc hoi Mỹ, bruk  rajaei padeih ngak bruk  dui atah ba tal khat lahik meng 7 tal 14 ti dola, GDP quy 4 meda trun ala 2%.

Ong Lưu Cường Đông, urang peih padang gam pan akaok Kapul JD.com di Trung Quoc, brei thau balai jao kaya oh hu urang ngak akaok meti di dalam dunya di kapul ini brei salah blaoh dalam bilan 4 thun hadei. JD.com, atau daok ieu lac Jingdong, lac sa dalam dom labik pablei salih praong abih di Trung Quoc. Di balai jao kaya ini, ahaok par oh hu urang peih nduac brei peih nduac angaok langik, ala taneh ye radaih jao kaya oh hu urang peih nduac. Bruk dak kaya ndap nda tagok ahaok par saong radaih oh hu urang peih nduac jeng kayua robot ngak.

Hukum pasang iek alak mbia birau di Thai Lan birau hu ba tame pandar taong bhat urang menyum alak langiu tukvak karja ba tabiak tagok tal 10.000 Baht sumu labaih 300 dola My, ba tal rilo bruk oh siam ka gah sirah riavang ma-in. Meng mon 11h00 - 14h00 tuk saong meng mon 17h00 tal 24h00 brei menyum alak mbia. Njauk caik hatai, tuai damuai blei alak mbia dalam tuk pasang iek min menyum dui atah tapa tuk pandar njauk taong bhat./.