Rajaei ba tabiak Sarak ka bruk alin kaya di bingun salam uan Nyaom roya urang lambaok vakil dalam negar mbang ka XIV di Ndang saong Tet Nguyen dan nethak Asaih Waw thun 2026. Tui nan dom urang hu Ndang, Karja lac dom urang: daong bruk katmang jaman mesuh metak; urang mbang tui sarak, urang padeih huu, uranaih metui mejua oh hu labik daok atau daok dalam dom labik ka urang metui. Yaom alin lac 400.000 dong sa urang, meng jien. Rajaei pandar suai abih lac harei 31-12 brei salah blaoh bruk alin kaya.

Thu tuong Pham Minh Chinh saong kapol urang Quoc hoi Ban Can Tho birau hu var taom mbaok cu tri hadei Mbang nyaom ka 10, Quoc hoi mbang 15. Var taom gaok ndem biai haong 300 cu tri lac urang jakar kong chuc, vien chuc gah pato megru saong gah y te di Ban Can Tho. Di var taom gaok Thu tuong khan lac, brei pataom tame padang ngak ha tang khang kajap ka gah pato megru saong gah y te, bruk cakrok patagok samar saong khang kajap, “ oh var bruk cakrok patagok, xa hoi sumu gauk, raidiuk tani tanat, alam moi truong piah bruk ngak mbang patagok”; trun takik jien buh tame ngak dom jitvu gah y te, pato megru piah bhap bini taduan hu kein lagaih.

Tui pathau khan di So Noi vu tinh Dong Nai, kuhria tal harei 28/12, hu 1.475 gah ngak mbang pablei salih dalam tinh salah blaoh bruk ba tabiak tanut alin jien Tet ka urang ngak bruk. Thun ini, dom gah ngak mbang pablei salih dom urang peih mbang ngui daok dang akaok ka yaom jien alin Tet Nguyen dan nethak Asaih Waw lac 840 trieu dong sa urang. Langiu jien alin, dom gah ngak mbang pablei salih saong kapul kong ndoan daok peih bruk mbang menyum haong gauk puac thun, alin kaya, daong harak ve radaih atau srap gap radaih raong pajeng urang ngak kong mai bhum palei raok Tet. Abih di nyu nan lac, tinh padang dom bruk lagaih yau “Tet pataom mbaok”, tadai pablei 0 dong saong rivang tangi dom baoh sang urang kan kandah. 

Kapol bol lin  34 ( Mentri Quoc phong)  peih bruk jao brei 5 baoh sang ka dom po sang jaleih kayua ribuk ia sua di xã Sơn Hòa, tỉnh Đắk Lắk. Ini lac dom baoh sang akaok meti di “Danak dak Quang Trung” hu salah saong jao brei ka urang. Yaok baoh sang ngak blaoh praong 44 met vuong, kuhria abih tih jien buh tame ngak 170 trieu dong sa baoh kayua Karja daong gam jaik 300 urang lin buh prein tame ngak saong daong bhap bini. Tui kuhria tal harei 04/01/2026, Bol lin Quan khu 5 brei pambuak  haong haong dom tinh Dak Lak, Gia Lai saong Khánh Hoà alin brei sang mbang 1 ka 123 baoh sang. Dalam nan, Dak Lak hu biak ralo tal 90 baoh sang.

 Festival Bangu ngak mekre Sa Dec mbang ka II thun 2025, ngan haong kadha “Sambo bangu harei bahrau” daok rah tabiak di Sa Dec, tinh Dong Thap. Festival Bangu ngak mekre Sa Dec piah pok meyaom bruk pala bangu ngak mekre, patagok yaom kaom kinh te, jhul patagok bruk pala bangu ngak mekre saong patagok jirah rivang ngak nong saong Danak dak yaok xa sa ndap nda (OCOP). Bingun ini peih bruk Ky luc Viet Nam – Viet Kings hu mek hu Ky luc Viet Nam ngan haong: “Thaik thaot Taneh ia Viet Nam hu ngak jeng meng dom pajaih Bangu ngak mekre rilo abih di Viet Nam.

Hadei rilo harei kandah gauk di labik taphia negar Thai Lan - Campuchia, brei padeih patuh phao camereip mboh siam. Di rilo labik karja bhum palei brei adat ka bhap bini di dom huyen daok di labik tapen negar mai sang saong ngal njauk tui dom bruk khik brei salamat. Mbang mesruh kalin kan meng blaoh di Thai Lan saong  Campuchia tamuh tabiak di harei 7/12. Bruk mbaoh tangin ba tabiak kadha tuyen bo chung  brei mboh siam jang, piah dua taneh ia jhul pakhang bruk ginum biai saong pambuak langyah dom bruk di tapen negar ba siam sron mbon salamat.

Patui veik bruk ndom meyai khang ka bruk Israel mbaoh tangin ka bhum taneh Somaliland di Somali lac sa negar karei, 21 negar Islam hu ba tabiak sa bruk cagar ka bruk di Israel. Panuac ndom cambaih laih ka bruk Israel mbaoh tangin ka bhum taneh Somaliland di Somali, ngak tabiak bruk kan kandah trak ngan haong bruk sron mbon saong an ninh di labik Take chau Phi, Tasik Bhong Maraih saong atah jang di nan veik. Bruk di Israel lac bruk ngak suan dom adat di hukum pakat dunya saong Hien chuong Lien hop quoc.

Bồ Đào Nha brei klauk jru labaih 32 trieu vaccine COVID-19 kuhria peih bruk klauk jru caga ruak akaok meti dahlau di ini 5 thun. Tui Kapol Y te Bhap bini Bồ Đào Nha, bruk klauk jru hu pacang caga labaih 12 ribau urang metai dalam 2 thun akok meti saong pandar veik vaccine oh hagait karei, kayua vaccine hu pasiam veik lagaih haong dom hagait salih birau di dom bien the virus rah tabiak. Langiu di nan, adit blaoh taneh ia ini peih bruk klauk jru caga ruak piah daong ka 2,5 trieu urang pacang caga ruak kum mua saong 1,5 trieu urang pacang caga hu ruak COVID-19./.