Ban raya Ho Chi Minh kuhria peih bruk palih ruah aval di harei 26/2 di 4 labik hu labaih 4.500 urang cu tri daok dalam kapul lin pan phao karaong saong kinh te tasik. Kuhria dalam bilan 1/2026, Ban raya Ho Chi Minh brei salah blaoh bruk palih ruah aval. Gah hu mbaok lac dom gah dalam nan hu: Bo Tu lenh Ban raya, Hải đoàn 128, Hải đoàn 129 daok dalam Quan chung Bol lin tasik, Bo Tu lenh bhum Polit tasik 3, Chi doi Pasang iek ikan hadang ka 2 saong Tieu ndoan DK1 - Pambuak ngak mbang Viet Nga Vietsovpetro. Dom labik ini hu brei panuac likau Uy mban Palih ruah Ban raya Ho Chi Minh brei buh harak phieu aval dalam harei 26/2 hu taong abih kuhria labaih 4.500 urang cu tri.

Tet nethak Athaik Waw - Bính Ngọ 2026, UB Karja urang Viet Nam daok di negar langiu - Mentri Ngoai giao pambuka haong dom jabat peih ngak Danak dak Bilan pataih Bhum palei 2026 ngan haong kadha “ Caong khin Viet Nam: Salamat, Kaya meda” di harei 08/02/2026 lac harei 21 bilan  Puac thun Ulanaih. Ini lac bruk peih ngak yaok thun piah ka urang Viet Nam daok di negar langiu, rik tame pambuak bhap bini daok atah palei negar hadar taneh ia. Danak dak “ Bilan pataih bhum palei” thun ini peih ngak di Ha Noi, dalam nan hu Jum pataom kaya mbang Viet saong Danak nghe thuat hu papar bunguk tapak.  

Mban Pato tacei Bol lin Bien phong ban raya Can Tho pambuak haong Sang bac Pabak ilamo Bangsa Pali Meteh pakat gah Meraong Negar bahrau tamat tal pato pabak sap bahsa Khmer thun 2025. Tal bac hu 20 urang bac lac dom urang jakar tapak ngak bruk dalam bhum hu rilo mikva urang bangsa Khmer diuk rai. Ini lac caong khin lagaih, daong paglaong siam lagaih bruk jak ba bhap bini, pathau khan hukum, padang kapul jum pataom gauk taong abih bangsa adei sa-ai pagam haong bruk pasiam quoc phong, an ninh dalam jaman bahrau.

Thun 2025, gah kaya ia Viet Nam khik hu bruk cakrok patagok siam, jien mek tame meng bruk pablei tabiak negar langiu kuhria hu labaih 11 ti USD, mek hu jien glong abih. Dalam thun 2026 ini, gah kaya ia kham ngak hu labaih 10 trieu tan; jien pablei kaya tabiak negar langiu hu labaih 11 ti USD. Jalan sahaneng  salih meng bruk “ ngak tabiak kaya” tapa “ kinh te kaya dalam ia”,  patagok bruk pala raong kaya ia hu khang kajap, raong dalam ia tathik kong nghiep, pakhang bruk salih pandar taka so, pasang iek tani tanat kaya mbang hacih, duah thau hu mai meng halei saong ngak tui dom jalan lang talaih “pakat the kanjik” IUU, paglong prein meriak gauk di kaya ia Viet Nam dalam tuk yam tame dunya.

Yaom ikan pra pandap tamo di tinh Dong Thap daok tagok glaong, meng 34.000 - 35.000 dong sa kilo, tagok labaih 5.000 dong sa kilo dut saong dua bilan dahlau. Dom thun tapa, kayua yaom ikan pra oh lagaih, khat lahik dui atah, rilo baoh sang raong klak danao atau salih tapa raong dom janih dalam ia taba karei. Jaik ini, yaom ikan tagok glaong, daong urang raong hu kein laba glaong gap mbiah, brei sahnang hatai piah buh jien tame raong ikan. Urak ini Dong Thap hu labaih 2.600 ha raong ikan pra. Ikan pra thun 2025 kuhria hu labaih 595.000 tan, pabak labaih 92% pandap tamo ka bruk ngak kaya pablei tabiak langiu negar.

Urang ngak praong di Triều Tiên Kim Jong Un brei thau ka bruk iek praong  saong pachreih tui Tổng thống Nga Putin jeng yau daong ka taneh ia Nga. Ong Kim Jong Un khan lac, bruk pambuak tani tanat dua negar  hu suai lavik, pambak tame bruk ngak mbang suai lavik di Trieu Tien saong Nga, lagaih haong kein laba suai lavik di dua taneh ia saong sa jalan ngak, hatai caong takre di dua taneh ia tui rilo gah.

Tong thong Duc hu panuac ndom khang ka sarak pambuak langiu negar di My meng tukvak pan bruk di Tong thong Donald Trump saong ieu pandar dunya brei pacang cakak, oh luai ka “dom labik atau taong abih dalam negar hu maong yau lac drap ar di dom negar khang meda”. Dom bruk ini hu ba tbiak dalam bruk rah tabiak dom bruk ngak meraik gauk jaik ini di My, dalam nan hu mbang taong katuak Washington tame Venezuela di dom harei dahlau.

Meng harei 8/1, dom nen tang mang xa hoi di Anh brei cakak bruk payua tathaot binguk kandauk di urang meyah oh hu urang taduan njauk hatai. Hukum Salamat online  birau caong khin ngak brei Internet jeng labik hu siam salamat saong iek praong jang, njauk ndem tal urang kumei saong uranaih kumei. Hukum nan piah langyah bruk haduh hatai ka bruk dalam 3 urang kumei di Anh ye hu 1 urang bhian taduan hu thaot binguk oh njauk hatai takre. Ini lac kadha bruk ngak cambaic laic di dom nen tang kong nghe dalam bruk khik iek urang pandar./.