UB Bhap bini Ban raya Ho Chi Minh patabiak 12 bruk naih gheih brei mboh ka patagok taong abih, cakrok samar di thun 2025. Dalam nan danei abih lac inem sajarah tuk Ban raya Ho Chi Minh peih praong labik jabat karja, pagam Binh Duong saong Ba Ria – Vung Tau, jeng sa “ban medin praong” hu kinh te saong rahra praong abih meng dahlau mai tal ini. Gam saong Nyaom roya pahadar 50 thun Harei peih paha Meraong negar, yasa taneh ia, Ban raya brei mboh bruk dang akaok hu tanut cakrok patagok 8,3%, peih ngak jalan pasei nduac samar saong salah blaoh the che pabak ka bruk bahrau, dalam nan hu rilo adat hadah krah. Dom inem danei nan brei mboh bruk salih bahrau, hadah krah, kham merat ngak bruk saong caong takre patagok di Ban raya Ho Chi Minh dalam jaman bahrau.

Dom gilai di kapol ngak bruk di Bo Tu lenh bhum 5 Hai Quan page ini pataok tame kaoh pulao Thổ Chu, tỉnh An Giang, ba labaih 200 urang lambaok ka dom kapol ngak bruk di dom tinh, ban, dom doanh nghiep, jabat harak mbao chi mai rivang, alin pandap Tet ka urang jakar, urang lin, dom urang bol saong bhap bini di pulao. Kaoh pulao Thổ Chu urak ini  hu labaih 500 baoh sang diukrai haong labaih 1.800 urang; bhap bini pak ini ngak mbang  meng bruk pala, raong kaya dalam ia saong ngak jitvu. Dalam dom thun tapa, hu bruk sangka di Dang, Karja, kaoh pulao Tho Chu hu salih birau di taong abih gah.  

Anak bruk dak harei dak rilo kol duas hinh su, jru phil saong dom bruk an ninh srau kadau di jalan tapen negar, Tay Ninh padang Kapul Canh sat cơ động khang – kapul “akaok mbram di akaok mbram”. Bruk padang Kapul Canh sat cơ động khang hu caong takre brei patagok prein gham kakei, pacang caga, mek kol duas, daong khik kajap an ninh, siam mekre, brei labik salamat ka bruk patagok kinh te - xa hoi saong raidiuk sron mbon di rahra Tay Ninh.

Ban Can Tho peih ngak 37 balai pabak ia oh mek jien, caga blaoh kapal, gilai pajeng ia duh ka bhap bini dalam palei pala dalam bilan pandiak 2026. Bruk pamong tal lac oh luai ka bhap bini kurang ia pandar dalam bilan pandiak thu. Ban raya jeng hu kuhria caga  ba 4 sang mac pabak ia tame ngak bruk di huyen Vĩnh Châu, Trần Đề saong Cù Lao Dung (di tỉnh Sóc Trăng dahlau diah), piah pabak ia saong trun prein ngak bruk yau urak ini.

Tinh Dong Thap bahrau ba tabiak Danak dak luai ia salamat, pacang caga mblung ia di uranaih tal thun 2030. Tui nan, tal thun 2030, takik abih 80% uranaih meng umo 6 - 15 thun hu bac di danak dak pato luai ia. Taphia di nan, kham merat 50% xa, phuong hu danao luai ia njauk tanut; 100% sang bac tieu hoc saong trung hoc co so peih bruk pato luai ia ka anek saih. Dong Thap lac labik hu rilo kraong ribaong, yaok thun rah tabiak rilo mbang mblung ia. Kayua nan, bruk pabak ilamo luai ia ka uranaih biak njauk ngak piah pasram prein yava saong pacang khik ka uranaih.

Rajaei Singapore saong Indonesia daok pambuak duah thau ka dom bruk hu pambuak tal jalan talei pablei uranaih kaman tapa Singapore piah ngak anek raong. Dom pathau khan ka jalan talei ikak pablei menuac nan rah tabiak meng kreh thun 2025, hadei tuk dom urang jakar Indonesia mek kareik labaih 10 urang njauk medil di tinh pei Java. Canh sat Singapore jeng daok daong Indonesia dalam luac jalan duah thau. Mbang duah thau ini biak hu makna kayua ikak pablei uranaih lac sa asal kadha biak trak.

Jabat Salamat kaya mbang Lien bang Bỉ brei am cuh klak labaih 55.000 drei menuk hadei tuk duah mboh sa labik njom jit kum menuk ada H5N1 kanjah jhak trak di sa tinh gah Pei negar ini, jaik tapen negar Prang. Dom labik jit kum menuk ada di dom anek ciim brim dalam thu n 2025 mek hu tanut glaong oh ka tuk halei hu, daong ngak jeng sa riyak jit ruak aval saong labik pambak ruak di chau Au. Di gah Barak Israel jeng hu sa labik jit kum menuk ada, brei mboh bruk mbuan pambak tabiak di jit ruak, truh tabiak chau Au daok hu.

Mbang jaleih hareik di labik tuh hareik di Cebu, Philippines ngak jaleih sa labik pataom mek ndap nda kaya saong sang daok di urang ngak bruk jaik nan, ngak ka 1 urang metai, 12 urang njauk rambuas saong 38 urang karei lahik. Kapul daong bruk daok kham merat duah dom urang lahik oh duah mboh. Labik tuh hareik ini praong labaih 20 ha, lac labik pataom tuh hareik di ban Cebu. Mbang jaleih mbua hareik rah tabiak katuak meda kayua bruk cakac ceik, pandar taneh saong tuh sa mbuan hareik glaong, ngak ka labik ini jeng sa labik tuh hareik di langiu langik salih ka bruk lam dar njauk lagaih./.