Quan khu 5 pambuak haong tinh Dak Lak peih bruk jao 229 baoh sang ka rahra gah Pur di tinh, dalam mbang ka 2 di “Danak dak Quang Trung”. Tui Quan khu 5, dalam mbang ka 1, tinh Dak Lak lac bhum palei hu baoh sang njauk brei padang bahrau, pasiam rilo abih di bhum Kreh negar. Tal ini, bhum palei hu salah blaoh 254 di dalam taong abih 606 baoh sang, hu jaik 42% jalan ngak. Taka sang karei daok hu samar peih ngak, kham merat salah blaoh njauk tukvak ngak tui pato tacei di Thu tuong Rajaei.

Phuong Phu Loi, ban Can Tho di ban Soc Trang dahlau diah birau peih ngak  danak dak “ Taduan doanh nghiep di doanh nghiep” piah pakhang  bruk salih birau harak gal hanh chinh, lang talaih dom kan kandah ka doanh nghiep. Bruk daok veik lac taom gaok duah thau hatai sahaneng di doanh nghiep, rik tame daong doanh nghiep peih praong bruk ngak mbang, pablei salih, padang mbang ngui, meng nan rik tame langyah bruk ngak, jhul pakhang  bruk ngak mbang pablei salih  kinh te- xa hoi.

Piah khik kajap samu bruk blei saong pablei dom kaya njauk hu, khik tani tanat darak pasar, duh ka hatai caong blei pandar di rahra, tinh Vinh Long caik labaih 948 ti dong piah khik piah ndap nda duh ka Tet Nguyen dan 2026. Danak dak palagaih darak pasar Tet thun ini hu peih ngak pagam haong bruk jak ba “Urang Viet Nam caik dahlau ka bruk pandar kaya Viet Nam”, pabak ginup hatai caong ka kaya mbang di rahra. Tapa nan daong patakik bruk tagok trun di yaom kaom, pachreih blei pandar, jhul tagok bruk ngak mbang, pablei salih patagok, gam haong nan khik kajap bruk daok dang mbang ngui di rahra dalam bhum.

 Roya bingu mai anh đào - Da Lat bilan pataih 2026 peih ngak meng harei 16/1 tal 05/2/2026. Peih ngak dom bruk piah peih pakak gam parang nghe thuat, gom hadah, pok meyaom bingu mai anh đao - bingu mekre abih di bilan pataih Da Lat. Lavang labik roya bingu  daok hu peih praong tal rilo bhum palei di ban pambuak dom bruk mai mong iek bingu sirah yulit  nong nghiep, bac megru ilamo, ma-in kong chieng. Tapa nan roya ini, karja bhum palei pamong tal bruk pambak praong kadha khik iek labik hu siam, patagok labik hacih hijao, pachreih bruk yulit Da Lat meng dom harei akaok bilan pataih thun 2026.

Thun 2025, bruk gaok bala jalan mbak dalam Ban raya Ho Chi Minh hu rilo salih siam mekre. Dalam ban tok rah tabiak 2.110 mbang gaok bala jalan mbak, ngak metai 1.044 urang saong ngak rambuac 1.244 urang. Njauk caik hatai sangka lac, bruk langyah dom labik bhian rah tabiak bala mek hu lagaih mboh cambaih laih. Kuhria tal ini, dalam ban raya oh daok labik bhian rah tabiak bala jalan mbak. Min bruk gar tavak jalan mbak jeng daok lac kan kandah praong.

Tui harak pathau khan Bruk rah tabiak saong Caong khin Kinh te Dunya kayua Lien Hop quoc brei thau, thun 2026, bruk ngak tabiak di dunya kuhria tagok 2,7%, biar jang 0,1 % dut saong thun 2025 saong biar jang  ralo dut saong dahlau jit ruak praong COVID -19. Harak pathau khan jeng kakei lac yaom glong daok ngak trun jien mek tame di bhap bini, oh kuhria ka bruk lam phat di dunya trun.

Di rilo labik di chau Au, langik la-an langaoh ngak jeng ia patau saong tuyet laik kapal ngak ka 8 urang metai. Ia patau la-an saong tuyet ngak kanjah trak tal taong abih gah di raidiuk, meng kurang katuak darah khik piah duh ka bruk taong ruak di sang iek ruak, tayah klak dom mbang par ahaok ba tal bruk kareik bambang sang bac, lahik ndien saong mbuan kurang ia pandar tagok glaong. Rilo labik di gah Barak negar Duc hu tuyet laik meda tagok tal 15 ndo, dalam tuk gah Meraong mbuan gaok ia patau la-an langaoh, langik la-an meda trun daok tanut -20 ndo C.

Bhap bini Victoria – Australia daok tame dom harei cuang kandah tuk karja payua harak kakei apui khuah glai pambak praong, dalam tuk langik pandiak. Tui Cuc Khi tuong Australia, pandiak yau urak ini gam thu lagu saong hangin mbuan apui khuah glai  saong kan pacang hu. Dom urang ilamo ka langik jeng brei panuac kakei lac langik salih karei daok ngak dom mbang apui khuah glai di Australia dak harei dak dui atah saong kan kandah jang.