Brei panuac tacei pato nyaom biai Rajaei ka bruk ngak thun 2026 rah tabiak di page ini, Tong Bi thu Tô Lâm kakei dom bruk bo Rajaei khin brei pataom tame peih ngak dalam tukvak anak tal: Pataom  tame lang talaih dom bruk kan kandah, tavak tavaiy kayua sarak piah ngak bruk hu mbuan sahanang. Kham merat khik hu kajap tani tanat vi mo, pasang iek bruk lam phat, khik brei samu gauk; Patui veik bruk ngak brei khang catang pachreih urang buh jien tame pablei salih; atah klak jalan sahaneng “khik oh hu ye pakauk”, khik catang adat ngak po drap ar, bruk pablei salih, oh pambak tame bruk pasang iek, duah thau piah mbang jien padai bhap bini, doanh nghiep.   

Tinh Gia Lai ngak bruk Kuhria pasang iek kinh te thun 2026. Tui bruk ba tabiak, dalam tinh jak ba hu jaik 1.200 urang pasang iek saong dom urang jakar duah thau yaok kuhria, ngak bruk njauk tui jalan ba tabiak saong khik kandauk khaw tin tui hukum karja. Tapa pasang iek lac piah ngak tabiak sarak, padang bruk ngak suai lavik patagok kinh te -xa hoi dalam tukvak birau, piah salih brau bruk khik iek kinh te saong salih pandar taka so.

UBND tinh Ca Mau birau ba tabiak Danak dak patagok dom kaya ngak nong kein laba glong vaktu 2026 -2030. Dalam nan, Ca Mau pataom prein khang tame ngak brei patagok 4 kaya hu kein laba glong lac hadang, ariang, padai brah saong sara. Piah ngak hu dom bruk ye Ca Mau pataom tame  dom jalan yau ye: kuhria ngak salah labik pala drak; ba ilamo ky thuat – kong nghe tame ngak saong salih pandar taka so. Njauk ndem tal dom doanh nghiep buh jien ngak tabiak kaya, khik piah kaya nong saong jhul pakhang bruk pablei salih  di dom labik mang dien tu.

Tukvak jaik tal Tet nguyen dan, rilo janih kaya ia di tinh Dong Thap yaom biak glong saong kurang. Urak ini, doanh nghiep blei ikan pra di danao hlung raong yaom meng 34.000 - 35.000 dong sa kilo, tagok labaih 1.000 dong sa kilo dut saong adit dahlau, yaom nan yaok kilo ikan pra  urang raong laba labaih 10 ribau dong. Langiu di hadang tathik jeng yaom tagok glong, janih meng 20 -25 drei sa kilo yaom 250.000 - 260.000 dong sa kilo. Yaom nan urang raong laba hu ala 100 ribau dong sa kilo

Kong an tinh Lam Dong pambuak haong UBND phuong Ham Thang, huyen Ham Thuan Bac, tinh Binh Thuan dahlau diah birau hu jao alin ka sa-ai Nguyễn Ngọc Vương, daok di khu phố Phú Thành, sang jaleih abih kayua hajan ribuk di puac thun 2025. Baoh sang sa-ai Nguyễn Ngọc Vương lac sa dalam 6 baoh sang di phuong Hàm Thắng hu sang ia ba theik abih. Bruk ngak nan di Kong an tinh Lam Dong oh lac rik tame pasiam dom kandah anak meta bo daok pakhang hatai jia di bhap bini, khik kajap an ninh chinh tri, salamat xa hoi di bhum, piah mikva sahanang hatai ngak mbang, pala drak.

 Tong thong My mbaoh harak khan brei thau My tabiak truh labaih 60 kapol dunya. Dalam harak pathau khan di Nha Trang oh ndem cambaic laic angan kapol nyaom bo My tabiak, min khan lac dom kapol nan pachut “dom sarak ka langik oh siam, khik iek dunya saong dom danak dak sahaneng daok karei di gauk ka bruk ngak po saong prein khang gah kinh te di My”. Langiu di nan, ong Trump jeng pathau khan bruk My tabiak truh Gah y Te Dunya  saong Harak gunum biai ka yawa langik di Paris.

An Do birau khan ka danak dak pato pasram pandar AI di dunya, pamong tal bruk hu 1 trieu dam dara hu bac ilamo saong pandar AI dalam sa thun anak tal. Danak dak hu daong ka uranaih An Do ngak pok pandar AI tame bruk ngak saong raidiuk, abih di nyu lac daong doanh nghiep sit paglong prein ngak bruk. Urak ini, Ấn Độ hu labaih 6 trieu urang daok ngak bruk dalam he sinh thai kong nghe saong AI.

Campuchia pathau khan pajeng ba 3 urang negar Trung Quoc mai taneh ia tui panuac caong khin di Bac Kinh, dalam nan hu Chen Zhi. Campuchia jeng thau lac mek vei harak adat negar Campuchia di Chen Zhi. Chen Zhi, umo 38 thun, daok di tinh Phúc Kiến (Trung Quốc), lac urang ngak mbang praong di Campuchia, peih praong bruk ngak mbang di rilo gah taneh riya, jitvu pandar saong jien padai hu labik ngak bruk di Phnom Pênh. Tui Mỹ, Chen Zhi saong dom urang karei peih labaih 100 kong ti di rilo taneh ia piah rao jien ngak kaya taeng drei, tapa ma-in mbia online./.