Dang akaok nyaom biai mbang ka 4 di Mban tacei ba bruk ngak Sang mac dien hat nhan di biar harei 7/1, Thu tuong Phạm Minh Chính caong khin tacei pato ramik caga piah buh jien tame padang ngak dom danak dak sang mac dien hat nhan hu siam; ba tabiak dom jalan ngak cambaic laic, lagaih ngak yau: kuhria caga phun jien mesre, bruk peih taneh…Tukvak anak tal, Mentri Kong thuong brei ngak salah harak ho so, pathau khan brei padeih pambuak bruk padang ngak sang mac dien hat nhan Ninh Thuan 2 ngan haong urang ngak dahlau diah saong ginum biai tui jalan “ kien laba sumu gauk, khat lahik parabha” tui hukum  Dunya saong dom hukum pambuak tal.

Thanh ndoan TPHCM birau peih bruk pahadar 76 thun Harei saih bac, sinh vien saong Kapol Sinh vien Viet Nam (9/1/1950 – 9/1/2026). Thun ini lac bruk pahadar  hu makna  biak praong dalam tuk anek saih saong sinh vien di Ban raya HCM birau pagam tame meng 3 tinh ban, jak ba gauk patui ngak veik. Tui dom rairah  hadei pagam tinh, ban caong khin kham merat bac megru, pasram patia rik tame padang ngak sa ban raya ilamo birau. Bingun ini, Mban peih bruk pok meyaom 30 urang naih gheih Yai Patuk Bilan Tha, hu 830  anek saih  mek hu angan “ Sinh vien 5 bruk siam” pakat Ban raya saong pakat Negar.

Phuong Sóc Trăng (Ban Cần Thơ) birau peih bruk “ Chung thuc mbaoh akhar di sang” di labik, piah ba mbuan lagaih, daong ka bhap bini, abih di nyu lac urang umo taha, urang prein yawa oh karo, kan nao mai. Dahlau di nan, piah pamong tal  bru padang karja “ jaik bhap bini, daong bhap bini, duh ka bhap bini siam jang” , phuong Soc Trang hu peih ngak dom bruk yau “Harei sanecar daong bhap bini”, “ Tut ngan ngak harak brei angan tuk anek kuman birau ndih tapui tabiak di sang iek ruak”…Dom bruk nan ba mai kein lagaih, hu bhap bini njauk hatai, rik tame saong taong yaom glong.

Vinh Long lac bhum palei ba akaok nao dahlau dalam negar ka kaya kong nghiep kaya nong siam angan pakat negar thun 2025, hu 8 kaya saong mejam kaya hu brei angan. Dalam 5 thun blaoh tapa, dalam tinh peih ngak 165 danak dak pachreih ngak kong, kuhria abih tih labaih 37 ti dong. Dom danak dak pataom tame daong pandar mac, jamraih birau, jao brei ilamo kong nghe, pato pakai saong paglong prein khang khik ramik dom labik kong nghiep palei pala.

UBND tinh Ca Mau birau mbaoh harak peih ngak danak dak pacang caga, glut jaleih ar tathik, ar kraong tal thun 2030. Makna di danak dak lac brei ngak dahlau langyah dom labik glut jaleih mbuan rah tabiak bala, ngak kan kandah tal labik daok di bhap bini, danak dak tapen kraong, ribaong, ar tathik. Kuhria phun jien hu tame labaih 26.820 ti dong, atah labaih 300km. Tinh Ca Mau brei pakhang bruk  pasang iek, pacang  caga, langyah bruk padang ngak danak dak, sang danaok, dom bruk ngak mbang pablei salih suan hukum ngak khat lahik atau ngak glut jaleih ar kraong, ar tathik.

Tong thong Indonesia khan lac padai brah di taneh ia ini pabak hu ka bhap bini dalam negar. Ini lac bruk hu makna praong ka an ninh padai brah di Indonesia. Bruk jak jeng nan mek hu aval dut saong bruk kuhria dahlau, dalam nan rajaei khan lac bruk nan mai meng daong ralo ka urang ngak nong saong takik harak gal. Bruk kinh te praong abih di Dong  Nam A ini bhian brei brah tame. Yau nan min, tui rajaei,  Indonesia oh blei brah tame thun 2026.

Ceik pui Mayon, tabung ceik apui pruh khang abih di Philippines pruh, brei panduan ba jaik 3 ribau rahra daok jaik takai ceik nao labik karei. Urak ini, glut jaleih patau gam gam meng tabung ceik, dalam nan hu dom patau praong sumu sa sruh oto, ba tui dom bau, thak saong patau apui biak pandiak. Tui urang ilamo, ini lac bruk pruh oh thau dahlau, kayua bau membeik di tabung ceik pui pandiak ngak talah patau.

Oh ka bak sa adit hadei tuk khan brei thau sarak pabak 7 taneh ia buh jien likau thi thuc My, Mentri Ngoai giao My peih praong veik 25 taneh ia veik, kuhria abih tih hu tal 15.000 dola My caik kakei dahlau piah likau tame My di 38 taneh ia. Ini lac bruk kham merat birau abih di karja Trump piah khik catang bruk tame My. Bruk bayar jien kakei dahlau oh njauk la hu brei visa, jien nan hu bayar veik meyah visa nan oh brei ngak atau urang ngak likau visa brei mboh drei hu ginup dom asar kadha piah brei visa./.