Quoc hoi khan tapa Hukum ramik pasiam veik Hukum Pato megru 2025 tui nan, oh jien tapuk bac di anek saih  meng harei 1 bilan 7 thun 2026. Tui nan Rajaei ba tabiak bruk oh mek jien tapuk bac di anek saih; Akok Mentri Pato megru khan lac brei ka taong abih anek saih bac sa mejam tapuk yau gauk di dalam negar. Mejam tapuk pato ka anek saih bac pho thong, cambaic laic caong khin danak dak pato megru ka bruk ngak, asar kadha pato, caong khin pato jalan diukrai saong prein khang di anek saih; asar kadha saong thaik thaok tapuk bac oh lac bangsa, agama, bruk ngak, likei atau kumei, umo thun saong labik dang di xa hoi…

Di mbang ginum biai pang harak pathau khan ka bruk peih ngak “Danak dak Quang Trung” samar padang ngak, ramik pasiam sang danaok ka dom baoh sang gaok khat lahik kayua bala meng langik rah tabiak di dom tinh bhum Kreh - Tay Nguyen, Thu tuong Phạm Minh Chính caong khin dom bhum palei brei ngak blaoh sang daok urang gaok kan kandah bala meng langik dahlau harei 15 bilan 1 anak tal; dom baoh sang ngak blaoh hu dien, ia , pagam internet, ndap nda kaya ka bhap bini.

Kapol Urang ngak nong TPHCM pambuak haong Rayo papar sap saong Papar binguk TPHCM birau peih ngak danak dak Tet anit ranam - Bilan Pataih nethak Athaik Waw 2026 piah jak ba dom gah rik tame daong ka urang ngak nong, bhap bini hu raidiuk trei sir. Danak dak hu dom don vi, jabat, doanh nghiep rik tame daong 21 ti dong. Akok Kapol  Urang ngak nong TPHCM sanya pandar dom gah njauk bruk ngak, cambaic laic, piah yaok paok kaya alin hu  payua tal tangin urang, njauk manuac.

Piah sangka ka urang ngak,  tui jalan “ Taong abih urang doanm urang ngak hu mbang Tet, bui sambai”, Lien doan tinh Dong Thap peih ngak Danak dak jum pataom daoh tamia ngan haong kadha “Tet Jum pataom - Bilan pataih dhar phol Đảng”, alin harak blei kaya, peih brei “Radaih pajeng urang ngak kong” taduan raok, urang ngak nao palei mbang Tet bui sambai haong baoh sang…Njauk ndem tal, alin brei labaih 24.000 paok pandap yaom 500 ribau dong tal 700 ribau dong sa paok ka dom urang sang kan kathaot.

UBND tinh Ca Mau birau mbaoh harak dom palei, xã di bhum urang bangsa takik saong dom labik kan kandah di tinh. Tukvak ini tal thun 2030, tinh Ca Mau hu abih tih 165 palei, bhum urang bangsa takik. Dalam nan, hu 91 palei dalam sarak angan palei kan kandah. Bruk mbaoh harak  mbang ini  oh lac brei njauk dom bhum khin hu jien buh tame ngak bo daok lac piak Karja kuhria peih ngak dom danak dak pakat negar ka bruk patagok khang kajap di bhum urang bangsa takik di tinh Ca Mau.

Thun 2025 brei mboh bruk patagok dalam sajarah dakrai di gah buu chinh Trung Quoc tuk kuhria taong abih dom paok pandap payua mbang akaok meto tapa 200 ti don vi. Jien mek tame hu 1.800 ti nhan dan te, dalam tuk bruk logistics rik tame jhul pakhang bruk kuhria pablei le online hu 14.000 ti nhan dan te. Njauk caik hatai, jit vu buu chinh hu nao tal bhum atah palei pala, bhum ceik tapa labaih 13.000 jalan saong 145.000 labik pambuak bruk.

Karja Tong thong My Donald Trump karik labaih 10 ti dola kadung jien lien bang ka dom danak dak uranaih saong daong ka baoh sang  di 5 bang kayua gah Dan chu taduan. Bruk nan gaok rilo kan kandah kayua cagar veik di gah Dan chu. Thong doc bang New York Kathy Hochul ndem puac ka bruk nan lac “ cagar bruk chinh tri” saong “ biak kanjiak jhak hatai”.

Hu takik abih lac 22 urang metai saong labaih 60 urang njauk rambuac tuk radaih tai pajeng urang tableik  di gah Barak Ethiopia. Angaok radaih  hu dom urang gaok pagat pachot kayua dom urang ngak suan hukum saong oh thau ka jalan nao mbuan rah tabiak bala. Ethiopia lac sa dalam dom labik pajeng ba di “ Jalan gah Pur”, jalan bo bhap bini nao tabiak truh bhum glai Sừng chau Phi piah duah bruk ngak di dom taneh ia bhum Tathik kaya meda. Tui Gilang pariak dunya, Ethiopia hu 40% bhap bini diukrai biak rambah rambeip kurang yaok janih./.