Di nyaom biai Kuhria pataom iek veik bruk ngak gah patagok kinh te -xa hoi thun 2025; tacei ba jalan peih ngak bruk thun 2026, ong Nguyễn Văn Được, Akok UBND TP.HCM khan lac, meyah peih brei phun jien karja tame ngak di Ban raya hu siam ye GRDP  meda glong jang. Ban raya  daok rilo bruk gal tavak suai lavik oh ka langyah tantu. Mboh anak meta lac bruk peih brei phun jien di karja, hu rilo jang dut saong dahlau diah, min oh ka ngak hu. Bhian tal puac thun, jien peih brei hu taong abih, min tok hu 70%. Urak ini, TPHCM  daok labaih phun jien oh ka ngak abih, bruk ba tal suai kuhria buh jien tabiak ngak  kayua oh mek hu taneh.

Thun ini, ban Can Tho pataom tame pasang iek, paglong asar siam padang ngak palei pala birau di dom xã, kham merat hu takik abih lac 6 xã mek hu tanut chuan palei pala birau tui Dom asar kadha palei pala birau pakat negar vaktu 2026 -2030. Tui So Ngak nong saong Moi truong ban raya, urak ini Can Tho 72 xã, dalam hu 59 xã mek hu tanut chuan palei pala birau. Yau nan min, meyah ngak tui tanut palei pala birau bo pakat negar ba tabiak ye rilo xã kurang asar kadha.

Mbang akaok meti jien mek tame gah yulit Dak Lak labaih 13 ribau ti dong, labaih 8% dut saong bruk kuhria dahlau dalam thun. Tui So Ilamo, Padhih The thao saong Yulit  tinh Dak Lak, thun 2025 tinh peih ngak ngak rilo bruk praong di tinh saong negar…Tapa brei mboh  bruk patagok ilamo pambuak pagam bruk khik ramik drap ar, patagok ilamo Tay Nguyen saong peih pakak ka gah yulit. Thun ini, Dak Lak thau lac bruk patagok ilamo dalam padang jalan diukrai anek manuac saong moi truong xa hoi siam mekre; peih ngak thun Yulit  tinh Dak Lak, tapa nan prein peih ngak patagok kinh te saong patagok khang kajap  dalam tukvak birau.

Dang bo phuong Hòa Lợi, TP.HCM (dahlau diah lac TP. Bến Cát, tỉnh Bình Dương) birau ba bruk ngak “Lavang labik parang iek ilamo Ho Chi Minh” tame labik ngak bruk di phuong. Bruk padang ngak “Lavang labik parang iek ilamo Ho Chi Minh” di labik ngak bruk pambuak bhap bini, pabak prein khang  piah bhum palei yam tame tukvak birau. Dalam tukvak birau anak tal, phuong meda patui pambak praong bruk nan  tal dom chi bo, kham merat padang ngak sa bhap bini kaya meda rilo ilamo siam gheih, Ban raya ba taneh ia pok drei patagok di bangsa’.

Tui Pasak Kuhria iek langik tathik pakat Negar, harei ini, tapen tathik dom tinh, ban meng Ban raya HCM tal Ca Mau hu ia tagok praong, di balai Vũng Tàu lac 4,05-4,15met, tukvak ia ndik tagok meng 15h-17h saong meng 0h -3h. Labik mbuan ia dauk dalam kayua ia tathik ndik lac taneh dhaong saong ar pacang. Dom urang ilamo gah kuhria iek langik tathik kakei brei caik hatai, ia tathik ndik  glong meda ngak ia suai tathuak di dom kraong gah Dong Nam Bo. Dom  labik biar tapen tathik, tapen kraong, ar pacang meda mbuan dauk.  Ia ndik tagok glong tukvak ini daok ngak ia mbak mbuan tame dalam hamu.

Langik la-ar  daok rah tabiak di rilo taneh ia chau Au, ngak khat lahik trak ka manuac saong drap ar, ba tal jalan mbak di dom labik ini gal tavak oh daok nao mai hu. Ha Lan mboh langik tuyet laik kapal, gam klaik klaoh kong nghe  khaw tin ngak jalan radaih ndien dalam negar dang abih di page harei 6 bilan 1. Pháp jeng daok dalam langik la-ar dui atah ala 0OC. Takik abih lac 5 urang metai dalam dom mbang bala rah tabiak jalan mbak kayua tuyet. Langik di gah Meraong saong gah Pur negar Đức trun dalam ala 100C.

42 anek metau oh huac langik la-ar trun 200C, piah payua panuac that caong takre di Roya Tuyet Cáp Nhĩ Tân di Trung Quốc. Bruk nan lac binah di roya yaok thun di ban danei angan “ Labik bilan la-ar biak gheih” di Trung Quoc. Ini lac ndam lakhah dui atah abih, peih ngak praong abih saong siam abih di Trung Quoc. Ban ini caong khin hu jeng  “Ban raya anait ranam saong la-ar” gam angan je “ Bhum taneh bilan la-ar mekre” di Trung Quoc.

Kapol Nestle brei mek veik dom kaya mbang ka uranaih kuman di rilo taneh ia Chau Au kayua huac njom anek ruak ngak glaoh ta-ok saong pandik tian. Bruk mek veik rah tabiak tuk duah mboh hu sa janih jru mek. Mentri Y te Ao khan lac brei mek veik kaya ngak labaih 800 kaya  di 10 sang mac di Nestle saong mbang mek veik kaya praong abih dalam sajarah dakrai di gah Kapol  ini./.