Page harei ini, Mban Chap hanh Trung uong Dang, Quoc hoi; Po ine negar; Rajaei saong Uy ban Trung uong Mat tran Negar Viet Nam peih ngak praong prang pahadar 80 thun Harei Tong tuyen cu akaok meti Quoc hoi Viet Nam (6/1/1946 – 6/1/2026). Brei panuac  di var nan, Tong Bi thu To Lam khan lac: patui veik bruk padang Quoc hoi lac jabat glong abih di Karja, patagok bruk ngak po, hukum, salih birau, hadah krah; ngak bruk cambaic laic, siam lagaih dalam bruk ngak, salih birau khang kadang dalam bruk padang ngak hukum, tacei pato padang ngak brei cakrok patagok. Jhul pakhang bruk cakrok patagok karo kajap, padang he sinh thai birau; pataom tame ngak brei salah, sumu taong abih gah piah cakrok patagok samar, karo kajap di taneh ia. Paglong jalan ngak bruk ba tabiak dom bruk praong di taneh ia kuhria tui dom du lieu ilamo khoa hoc, cambaic laic saong ba bruk pambuak dom gah tame dalam, rik tame paglong jang labik dang di Viet Nam angaok dunya…

Po  negar mbaoh harak alin kaya Tet thun birau 2026 ka urang ngak bruk cach mang daong ka taneh ia, tui dua yaom jien nan lac 600.000 dong saong 300.000 dong. Tui kuhria hu labaih 1,6 trieu urang hu taduan mbang tui kuhria labaih 500 ti dong. Tui Mentri Noi vu, dalam 78 thun tapa, Ndang, Karja, bhap bini tuk halei jeng sangka, kuhria, peih ngak siam bruk bayar dhar phol  ka urang ngak bruk cach mang dahlau diah saong gauk gar di urang. Jien daong di thun 2025 tagok labaih 70% dut saong thun 2021, rik tame paglong raidiuk di urang dahlau diah hu daong ka taneh ia.

Di Ban Can Tho hu 759 doanh nghiep alin Tet Nguyen dan nethak Athaik Waw glong abih 110 trieu dong saong biar abih lac 200.000 đồng, di doanh nghiep FDI. Daok jien alin Tet Nguyen dan kuhria lac 11,5 trieu dong. Jien alin glong abih di doanh nghiep thun ini  sumu 1/3 dut haong thun dahlau. Tui So Noi vu di ban Can Tho, yaom la bruk ngak mbang kinh te kan kandah min oh mboh po ngak mbang pablei salih halei tavak jien bilan di urang ngak. 

Meng ini tal thun 2030, tinh Vinh Long peih ngak dom danak dak di karja kuhria phun jien labaih 375 ti dong. Phun jien ini pataom tame daong 300-400 mbang labik pandar may moc, jamraih birau, ngak tui jalan birau  piah paglong prein ngak bruk, kaya siam. Gah kong thuong tinh Vinh Long peih 3 mbang palih ruah kaya kong nghiep palei pala ngak mbang hu kein laba pakat tinh, tui nan daong ka 50 tal 100 labik tut angan kaya. Ini lac jalan hu makna praong dalam daong ka dom labik padang angan je, peih praong darak pasar.

Tinh Tay Ninh peih ngak rilo bruk sumu gauk pasang gah ngak mbang pablei salih thun 2026, piah duah kuhria du lieu kinh te - xa hoi duh ka bruk kuhria ba tabiak sarak patagok di Trung uong saong karja bhum palei dalam tukvak birau. Dom khaw tin hu duah thau camereip saong kuhria dalam, ka urang ngak bruk, drap ar, kaya, jien mek tame, jien buh tabiak ngak pandar kong nghe so saong pablei salih dien tu di dom don vi ngak mbang -pablei salih. Tui kuhria nan lac piah taong yaom bruk cakrok patagok kinh te - xa hoi, meng nan duh ka bruk ngak sarak, quy hoach buk patagok di tinh.

Campuchia sa mbang tra caong khin Thai Lan peih bruk ginum biai veik di Uy ban rilo gah ka bruk padang gang jaman tapen negar di harei som atau harei angar bilan 1 ini. Njauk ndem tal, gah Campuchia khan lac ba tabiak danak dak ginum biai ka bruk ngak di bol lin Thai Lan ngak kan kandah tal bruk ngak po taneh ia ini. Campuchia jeng brei thau ka jalan sahaneng ka bruk taneh tapen negar Campuchia - Thái Lan lac  iek praong hukum dunya.

Mentri Y te saong Jitvu Nhan sinh My daok kakei brei klauk takik jru vaccine caga ruak ngan haong uranaih di Mỹ. Dom urang jakar y te daok kakei brei klauk jru vaccine soi, quai bị saong rubella, jeng yau vaccine pacang caga ruak bai liet, ndaih baoh, HPV saong dom janih ruak karei. Yau nan min, Mentri ini daok kakei brei klauk jru caga dom ruak viem glo akaok kayua vi khuan, viem gan B saong viem gan A. Dom bruk ramik pasiam nan  hu khan brei thau tuk hu urang njom ruak kum dalam negar My, dalam tuk bilan ini hu 9 uranaih metai kayua ruak kum.

Rajaei Ba Lan ba tabiak hukum pakauk uranaih umo ala 16 thun pandar mang xa hoi piah khik caga uranaih plaik njiak dom bala tapa online. Tui Mentri Kong nghiep Ky thuat so Ba Lan, mang xa hoi daok jhak tal prein yawa di uranaih, takik caik hatai, jeng yau mbuan dui ba pambak tame angaok mang. Yau nan ye, tuk xa hoi ngak bruk piah khik caga uranaih plaik  njiak atah dom asar kadha oh siam di angaok mang online./.