Danak dak “Patagok sa trieu hecta bhum pala padai asar siam saong takik tathuak neral gam patagok hacih hijao bhum taneran  kraong Cuu Long” lac sa jalan ngak praong, piah pamong tal bruk ngak suai lavik di Rajaei  dalam bruk ngak tabiak padai brah tui jalan patagok jien mek tame khang kajap, lagaih saong bruk langik salih karei. Mbiah tal ini, Kapol gah padai brah  Viet Nam rik tame brei harak chung nhan angan je ka 8 doanh nghiep ngan haong labaih 71.000 tan brah saong mbang akaok meti pablei brah tabiak negar langiu mek angan “Brah Viet hijao takik tathuak nerak” tapa Nhat Ban, taong yaom hu bruk ngak di gah padai brah Viet Nam.

Mban Khik iek danak dak My Thuan khan brei thau tuk vak ba Danak dak jalan Hau Giang - Ca Mau tapa bilan 1 thun 2026. Kuhria abih tih dom jalan praong nao tap rilo tinh bhum taneran kraong Cuu Long, pambuak dom pasak ngak mbang praong di Can Tho saong bhum taneh Ca Mau. Bruk ngak salah blaoh danak oh lac abih takik tukvak nao mai, takik gal jalan Raya 1 bo daok  pabak prein khang ka bruk cak rok patagok kinh te-xa hoi, khik siam bruk quoc phong - an ninh di dalam bhum gah Meraong negar.

Meng thun 2026, tinh Tay Ninh brei daong sa mbang tal 100 trieu dong ka yaok gru pato di dom xa bhum tapen negar. Urang hu mbang tui jien daong nan lac: hu palih ruah tame ngak gru patao di dom sang bac di karja tinh; hu mbaoh harak ngak bruk 6 thun sang ngak tui bruk tacei ba di jabat, don vi pakat angaok. Sarak nan caong khin lang talaih dom kan kandah ka bruk kurang  gru pato di dom xa atah bayah.

Peih ngak Danak dak patagok ngak glai khang kajap, makna lac Danak dak “ Pala sa ti phun kayau hijao vaktu 2021 -2025”, dalam thun ban Can Tho hu pala labaih 4 trieu 260 ribau phun hijao, ralo jang bruk kuhria ngak dahlau. Langiu di nan, bruk pacang caga apui khuah glai tuk halei jeng hu gah ngak nong peih ngak gam haong bruk khik iek glai, pasang khik  labik mbuan apui khuah ralo, pathau khan ka bhap bini daok tapen glai kham merat pacang caga apui khuah glai. Urak ini ban Can Tho hu taong abih taneh glai labaih 13.943 ha.  

Di bein athur Thảo Cầm Viên Sài Gòn daok peih ngak Adit Ilamo Dunya - Uan raok  thun birau 2026. Bruk nan rah tabiak meng harei 4 bilan 1 thun 2026, oh mek jien tame rivang iek meng mon 17 tal 21 tuk yaok harei dalam tuk peih ngak. Adit nan ba mai labik ilamo yawa langik  biak anit ranam, hadah hadai saong pambuak siam haong bhap bini. Danak dak pamong tal dom baoh sang hu uranaih sit, dam dara anit takre ilamo nghe thuat saong tuai damuai dunya, rik tame yaih khan thaok binguk Viet Nam sami samar, dalam dom harei akaok thun birau.

Rilo urang ilamo gah rilang pariak khan lac, dom jabat khik iek drap ar di baoh sang saong dom urang kaya meda di chau A daok payua jien tame dak harei dak rilo tame Thụy Sĩ, duah labik payua tame khik piah dalam dom gilang hu salamat. Urak ini, dom gilang pariak di urang Thuy Si daok peih pambak praong di chau A di taneh ia Trung Au, hadei rilo urang payua tame dalam 2 thun tapa. Urak ini Thụy Sĩ  daok khik hu labik lac suraga jien padai di dunya, oh huac kanda di panuac khan lac gilang pariak ngak mblo tabiak  khaw tin di tuai damuai.

Tong thong My Donald Trump tui kuhria brei thau urang hu palih ruah salih ka ong Jerome Powell, Akaok  Cục Dự trữ Liên bang Mỹ (Fed) di bilan 1 ini. Vaktu ngak bruk di Akok Fed di ong Powell abih tukvak di bilan 5 anak tal. Fed trun jien laba 3 mbang dalam thun ini, min ong Trump khan lac mbang cakak trun veik di harrei 10/12 “ meda kuhria tagok dua mbang”. Ong Trump palih ruah ong Powell ngak Akok Fed di thun 2017 dalam vaktu akaok meti di drei, min kuhria meng tuk gilac veik tame ngak bruk di Nha Trang,  Tong thong bhian ndem puac ka ong nan.

Ấn Độ tapa mbaok Nhật Bản piah jeng taneh ia ngak mbang praong ka 4 di dunya,  ngan haong GDP mek huu 4,18 ribau ti dola Mỹ. Taneh ia Nam Á kuhria yam tapa mbak negar Đức dang dhi ka 3 di thun 2030. Ini lac panuac khan di Rajaei An Do dalam sa harak pathau khan ka bruk ngak kinh te taneh ia dalam thun 2025. Dom kapol dunya jeng khan brei thau ka bruk patagok di An Do./.