Trung uong Ndoan Thanh nien Cong San Ho Chi Minh patui veik pambuak haong gah rik daong daong ka danak dak “Ba Tet mai sang”. Dalam nan brei alin 4.230 harak radaih oto gam haong dom banah kaya alin hu makna ka anek saih, dam dara, urang ngak kong saong urang ngak bruk kan kandah daok bac megru saong ngak bruk di Ban raya Ho Chi Minh, tinh Dong Nai hu palei di dom tinh bhum kreh negar saong barak negar. Labik peih ngak jeng brei caik dahlau dom baoh sang biak kan kandah; baoh sang njauk kan kandah trak kayua bala, ribuk ia sua.

Darak Tet nguyen dan thun 2026 di TPHCM peih ngak samar, pataom tame yo kaya ndap saong yo kaya ndap nda yaom gap mbiah. Lambaok Saigon Co.op mboh lac, piah  pabak ka bruk caong blei di urang, gah pablei rai brei kuhria caga ndap nda piah meng kreh thun, patagok tal 40%, tui nan peih ngak rilo danak dak tui yaok tukvak piah khik tani tanat  yam kaom, So Kong thuong TPHCM hu peih ngak danak dak “Pablei kaya grauk labik -  Khik tani tanat yaom kaom” di khu kong nghiep, labik che xuat saong pasak. Bruk daong urang ngak hu blei kaya Tet siam, yaom kaom tani tanat, takik kurang ndap nda.

Yaom lac pablei glaong jang bangu cuc blaoh urang ngak nong di palei bangu Chợ Lách di tinh Vinh Long jeng suhsah parilo cuc mam xoi Han Quoc. Tui ong Đặng Văn Mi – HTX Ngak nong Long Thới, yaok yau bangu cuc han Quoc hu yaom labaih 300 ribau dong, glaong tagok dua mbang dut haong cuc pala bhian meng kal mai, nan oh ka dui pachreih hu tuai damuai. Urak ini dalam xa Chợ Lách hu labaih 100.000 cau bangu cuc mam xoi Han Quoc. Karja palei daok tui iek siam lagaih kinh te di pajaih bangu ini. Tuk darak pasar tani tanat jang, xa hu jalan daong ky thuat saong pambuak pablei ka rahra.

Urang ngak nong di tinh An Giang daok thuvi thuvar ngak taneh, tam drak njam patam piah pablei tabiak ka darak pasar Tet thun birau. Tui ong Võ Văn Tứ, Pho akaok UBND xã Mỹ Hòa Hưng, taong xã hu 360 ha pala njam patam, piah pasiam lagaih phun pala, karja bhum palei daong, pasram ka urang ngak nong pala tui jalan huu co hacih sa-at, pal iek njam patam hacih sa-at. Tui nan, padang sa Kapol pala njam patam hacih sa-at saong 2 HTX ngak nong. Tapa nan, patagok jien mek tame yaok hecta  pala njam tagok meng 150 - 200 trieu dong yaok thun.

Thun 2025, Dong Nai rah tabiak 932 mbang gaok bala di jalan mbak, ngak 669 urang metai, 400 urang njauk rambuac; patrun 131 mbang gaok bala saong 90 urang metai dut haong thun 2024. Dai ta Trần Anh Sơn, Phaok Yam ndok Kong an tinh Dong Nai pandar kapul Canh sat jalan mbak paglaong dom jalan, labik hu makna, abih di nyu nan lac labik sang bac saong labik pataom rilo urang, pagam haong bruk langyah bruk gar jalan saong peih lagaih dom kadha khik kajap siam mekre salamat jalan mbak.

Gilang pariak karja negar Nga khan lac, thun 2026, bhap bini saong doanh nghiep Nga meda mbuan jang dalam bruk ba tabiak jalan ngak saong sahaneng ka harei anak tal, bruk lam phat saong dom phun jien mesre hu tani tanat. Tui kuhria, mbiah tal puac thun 2026, lam phat trun daok meng 4 tal 5% saong hadei di nan khik hu sumu bruk ba tabiak. Kadha nan brei mboh yaom kaom tagok suai, laba jien brei mesre gap mbiah, daong ka bhap bini saong doanh nghiep hu lagaih jang.

Dom bruk salih bahrau di kum A, atau H3N2 saong hu ieu lac “ruak kum trak”, daok pambak samar di My, ngak ka rilo urang njauk tame sang iek ruak tagok jaik dua mbang tok dalam sa adit. Bruk “ruak kum trak” njom mbak samar ngak ka yaok ribau urang njauk brei tame sang iek ruak saong kan kandah abih lac njom mbak ruak tal uranaih. Kuhria tal harei 20/12, di My takik abih hu 7,5 trieu urang njauk ruak kum. Pasak Pasang iek saong Caga Jit ruak My (CDC) patui veik pachreih taong abih urang umo meng 6 bilan ba tagok njauk brei klauk vaccine caga ruak kum yaok thun.

10 negar, dalam nan hu Anh, Pháp, Đan Mạch, Phần Lan, Iceland, Na Uy, Thụy Điển, Thụy Sĩ, Canada saong Nhật Bản khan lac, bhap bini di Gaza daok anak rilo bruk kan kandah dalam raidiuk kayua hajan praong saong bilan la-ar, dalam tuk nan daok 1,3 trieu  urang khin daong samar hu labik daok di Gaza.  Bruk jaleih tayak labik sang ngak hacih ba tal 740.000 urang kathaot mbuan dauk dalam saong jit ruak./.