Luac abih thun 2025, dalam negar hu 18.000 kaya ndap nda OCOP mek hu 3 patuk tagok  ngan haong jaik 10.000 po kaya OCOP hu mbaok tame Danak dak. Dom kaya OCOP 5 patuk dak harei dak brei mboh labik dang, hu jeng kaya alin ka dom bruk pakat negar saong bruk ngak di Ndang, Karja. Tui nan, dalam negar hu labaih 600 bruk ngak gah sirah rivang bruk ngak hamu ngak apuh, palei pala hu jaik 400 labik yulit palei pala hu taduan brei angan. Rilo bruk ngak mek hu tanut chuan OCOP yulit bhap bini brei mboh jalan nao njauk piah patagok gah yulit gam haong bruk ngak ilamo, sinh thai  di bhum palei.

Akok UBND tinh Ca Mau kham merat taduan brei angan 22 xa, phuong an toan khu, kuhria abih tih dom do vi hanh chinh nan di tinh tagok tal 40 dalam 64 don vi. Bruk peih praong ralo labik mek hu angan je oh lac brei mboh bruk dhau dhar phol  di bhum taneh sajarah dakrai, rik tame daong ka bruk ngak cach mang bo daok daong ka bhap bini  di bhum taneh ini hu karja daong phun jien blei pakat the iek ruak BHYT saong oh abih jien tuk jru ruak tui hukum ba tabiak. Tui nan, dom bhum palei ini hu daong phun jien ngak jlan mbak, sang danaok  hatang  saong patagok bruk ngak mbang - raidiuk rahra hu siam jang.

Yaom durian di bein pak tinh Dong Thap daok trun yaom lap. Urak ini durian Ri6 trun khang, meng 32 -35 ribau dong sa kilo, trun labaih 10 ribau dong sa kilo dut saong  bilan dahlau. Daok durian Monthong janih A tagok meng 95 - 100 ribau dong sa kilo. Gah chuc nang bhum palei pakhang jalan tacei ba, pachreih  po bein pala durian  ngak tui dom jalan takik kandong jru cadimi; tui nan, pacang caga njom ia mbak piah phun tamuh siam luac thun. Dong Thap hu taneh pala durian praong abih  dalam negar hu jaik 35.500 ha.

Dalam 4 harei padeih Tet kawi ia harei -Duong lich 2026, tuai damuai mai sirah rivang  dom labik di TPHCM kuhria mboh 1 trieu 200 ribau mbang. Rilo labik mai rivang, labik ma-in saong labik bhap bini di pasak TPHCM pachreih hu rilo bhap bini saong tuai damuai uan raok thun birau. Dom labik ndih padeih padei 3-5 patuk, abih di nyu nan lac pasak biak ralo; jien mek tame  meng bruk papah labik daok, mbang huak, blei kaya, ma-in sambai  biak lagaih mek jien tame rilo. So Yulit TPHCM peih ngak tui rilo jalan khik brei salamat ka tuai damuai, caong khin dom labik daok, doanh nghiep yulit ngak njauk tui quy dinh ka bruk pacang caga apui khuah, khik brei kaya mbang hacih sa-at, pablei njauk yaom saong pagong asar siam jitvu.

Tui Cuc Canh sat jalan mbak, dalam 4 harei padeih Tet Duong lich, dalam negar rah tabiak 196 mbang bala angaok jalan mbak, ngak metai 94 urang saong 154 urang njauk rambuac. Kuhria dalam harei 4 bilan 1, harei  puac padeih di negar hu 19 urang metai kayua bala angaok jalan mbak. Kuhria taong abih bala rah tabiak di jalan mbak saong urang metai di angaok jalan nao mai. Cong an dom bhum palei pasang iek, langyah labaih 12.300 mbang ngak suan, langyah labaih 3.800 mbang menyum lalak, labaih 2.000 mbang peih radaih nduac khang.

Rilo taneh ia saong bhap bini di dunya khan lac bruk My taong tame Venezuela chap mek Tổng thống Nicolas Maduro. Bruk nan ngak ka manuac sia di dunya sahaneng ralo hadei rilo bilan My ba bol lin taong tame Venezuela. Tong Thu ky Lien hiep quoc Antonio Guterres kakei lac dom gah brei ngak njauk tui ginup hukum dunya, iew taong abih dom gah hu mbaok tame ginum biai. Dom mbang trun jalan caga veik bruk mesruh metak saong ndem puac ka bruk kalin kan di My di langiu Nha Trang di ban ine Washington jeng yau dom ban dalam negar My.

Mbang duah thau hatai sahaneng di bhap bini ka Hukum di Thai Lan meda rah tabiak di harei palih ruah lac harei 8 bilan 2 anak tal. Bruk nan piah patak pataom jien padai, takik ndua nong trak ka gah peih bruk saong hu lagaih ka cu tri dut haong bruk neh tabiak ngak dua bruk. Yau nan, harei 8 bilan 2, cu tri Thai Lan taduan hu 2 hala phieu karei di gauk di sa labik buh phieu, dalam nan hu phieu palih ruah lambaok Ha vien saong hala phieu duah thau hatai sahaneng di bhap bini. Bhap bini Thai Lan brei panuac ka bruk ramik tavah veik Hukum birau piah salih ka Hukum urak ini njauk atau oh.  

Indonesia ba tabiak bruk mek hu 16 -17 trieu mbang tuai damuai negar langiu mai sirah rivang dalam thun 2026, tuk taneh ia ini caong khin patagok bruk ngak yulit sirah rivang. Ini lac anek kiar (likso) peih jalan ka gah yulit Indonesia. Indonesia taduan hu 12 trieu tuai damuai negar langiu saong 900 trieu tuai dalam negar di bilan 10 thun 2025. Labik suraga rivang main Bali jeng hu tuai damuai mai rivang tagok tal labaih 7 trieu tuai damuai negar langiu di thun 2025./.