Hadei pagtam tame, TPHCM hu 53 bangsa takik, dalam nan hu 43 bangsa  diuk rai haong gauk, hu labaih 590.000 urang, meblah 4,35 % bhap bini rahra. Tui nan, raidiuk bhap bini mboh tani tanat; dom sarak bangsa, an sinh xa hoi hu peih ngak samu. Dom bruk nak ilamu, pato megru, y te dalam bhum urang bangsa takik hu sangka; bruk pato bruk ngak, tacei ba jalan bac bruk ngak ka dom dam dara urang bangsa takik hu peih ngak siam; an ninh chinh tri, salamat raidiuk xa hoi dalam bhap bini, agama hu khik kajap. Urang ngak praong UBND TPHCM caong khin  tukvak anak tal, karja palei tui iek, duah thau tantu dom caong khin di bhap bini rahra, urang halau janeng, di dom baha, sang megik, kapol urang agama.

Melam 5/1, di Sang daoh Hồ Gươm ( Ha Noi), Rayo sap ndem Viet Nam peih ngak danak dak nghe thuat “Hatai jia tui Ndang praong uranam” pamong tal Nyaom roya XIV di Ndang. Danak dak hu makna praong, brei mboh bruk ngak tui, hu kuhria dahlau saong biak lagiah di VOV pamong tal Nyaom roya XIV di Dang. Tapa dom panuac ilamo nghe thuat,  danak dak rik tame ngak brei njauk hatai, pakajap hatai jia, pamedeih bruk jum pataom anait ranam, iek praong bruk ngak saong caong khin ba drei tame ngak bruk di rahra bhap bini dalam tuk taneh ia yam tame jaman patagok birau.

Kong an tinh Lam Dong saong UBND phuong Ham Thang ( di labik huyen Ham Thuan Bac, tinh Binh Thuan klak) birau padang sang birau dalam “ Danak dak Quang Trung”. Ini lac sa dalam 27 baoh sang hu Kong an tinh Lam Dong padang ngak. Tukvak anak tal, kong an tinh brei patui pataom tame jak ba dom gah piah ngak salah blaoh dom baoh sang pak ini dahlau harei 15 bilan 1. Tinh Lam Dong gaok kan kandah kayua hajan praong, ngak khat lahik drap ar, rilo urang lahik sang danaok, oh hu labik daok.

Kruac sành lac janih phun pala iek yau “ phun ngak kaya meda” di tinh  Vinh Long min daok trun yaom lap ba tal po bein  gaok rilo kan kandah. Yaom lac brei rilo baoh, paik hu rilo, min yaom meng 1.500 – 3.500 dong sa kilo, oh ginup jien  buh tame pala, ba tal oh lac takik baoh sang  bayar veik taneh, tavak sre jange. Bruk nan kayua yaom kruac sành  trun biar kayua taneh  pala pambak praong samar dalam tuk drak pasar tok pablei dalam negar, ba tal bruk ngak tabiak rilo jang urang caong blei.

Urak ini, halau ia gah angaok kraong tuh mai Bhum taneran kraong Cuu Long biak ralo, njom ia mbak min oh hagait kan kandah tal dom kraong ribaong di Bhum taneran kraong Cuu Long. Tui kuhria ia mbak njom tame  bilan 1/2026  biar jang dut saong tukvak ini thun dahlau. Bhum taneran kraong Cuu Long daok tam drak bilan Dong Xuan 2025 -2026, kuhria tal ini taong abih taneh pala hu 63% dut haong bruk ba tabiak. Halau ia brei pabak ginup ka bru pala drak.

Tong thong Nga Vladimir Putin mbaoh harak ka dom bruk ba tabiak saong bruk praong dalam dom bruk patagok di Lien bang Nga mbiah tal thun 2030. Tui nan, Tong thong Putin taduan ngak tui “ Dom kadha saong bruk praong piah dom bruk patagok taneh ia Lien bang Nga tal thun 2030” kayua Rajaei Nga ba tabiak, tui nan caong khin brei ramik pasiam lagaih haong dom asar kadha ba tabiak. Langiu di nan, Tong thong Putin tacei ba Rajaei saong Gilang pariak pakat negar Nga peih ngak dom jalan  piah patagok kinh te saong bruk buh jien tame ngak mbang.

Dalam thun 2025, labaih 7.000 labik pablei can sa kareik pabah mbang dalam tuk urang jakar Thai Lan daok khik iek saong brei adat pandar can sa ka gah y te. Thun 2022, Thái Lan lac taneh ia akaok meti di labik atah klak can sa tabiak truh angan matuy, brei ngak tui hukum ngan haong pandar can sa. Yau nan min, anak dom bruk oh lagaih, Thai Lan salih tapa khik iek catang.

An Do hu jeng taneh ia ngak tabiak brah ralo abih di dunya, yuak hu 150 trieu tan dalam thun 2025. Akok Mentri Ngak nong An Do kakei lac bruk hu makna praong, brei mboh  dom bruk yam tagok di An Do dalam bruk patagok  ngak nong, abih di nyu lac bruk roh duah saong ba tame pandar  dom pajaih phun pala brei rilo baoh, rilo asar. An Do jeng hu yaih khan 184 phun pala di 25 janih phun pala, kayua taneh ia ini ngak tabiak./.