Page ini harei 5/5, di tinh Tay Ninh, Quan uy Trung uong, Mentri Quoc phong peih bruk Alin brei Patau  rup thaik Chu tich Ho Chi Minh saong Harak meyaom di Akaok  Mentri Quoc phong ka dom kapol nyaom, urang ngak siam bruk palih ruah urang lambaok ka Quoc hoi mbang XVI saong urang lambaok HĐND dom pakat vaktu 2026-2031. Brei panuac di var nan, Đại tướng Nguyễn Trọng Nghĩa, Ủy viên Mentri Chính trị, Bí thư Trung ương Đảng, Ủy viên Thường vụ Quân ủy Trung ương, Akaok Tổng cục Chính trị Bol lin bhap bini Viet Nam caong khin pakat uy, karja saong bol lin tinh Tay Ninh patui veik bruk bac megru saong ngak tui jalan diukrai di Ho Chi Minh; padang kapol urang jakar “gam naih joi, gam tarieng”; pakhang bruk jum pataom bol lin - bhap bini, rik tame khik kajap tani tanat bruk chinh tri, patagok kinh te - xa hoi, pakajap bruk quoc phong, an ninh dalam tinh.

Akok Mentri Padang ngak birau harak Kong ndien 08 ka bruk jhuk pakhang bruk ngak hu rilo sang daok xa hoi thun 2026. Tui nan, thun ini, dalam negar brei ngak salah labaih 158.700 baoh sang daok xa hoi. Mentri Padang ngak caong khin dom bhum palei  brei hu ginup urang jakar, kong chuc, parabha urang jakar ngak bruk tui dom gah padang ngak sang daok xa hoi; ngak siam bruk hu jao brei, parabha tui pakat, oh gal tavak, suai ngak harak gal.

Lac bhum palei hu rilo bhap bini Cam praong abih dalam negar, tỉnh Khánh Hòa hu rilo drap ar ilamo siam gheih, meng kien truc bimong kalan yau Bimong Po Nagar, Bimong Pô Rômê  tal dom rija roya, palei ngak saong nghe thuat daoh tamia bhap bini biak gheih oh labik halei hu. Njauk caik hatai, bruk rivang ma-in bhap bini daok ngak brei cakrok patagok, hu dom labik daok ka tuai damuai ngak tui thaik kien truc Cam,  pambuak pagam  haong ilamo  meng kan. Bruk  dang peih ngak Harei Ilamo Cam pakat negar  mbang IV di bilan 6 anak tal lac piah ka Khanh Hoa yaih khan ilamo siam gheih karei, gam ngak iek dom bruk rivang ma-in birau.

UBND tinh Dak Lak harei kabroi peih ngak “ 30 harei melam tabung glong  peih praong taneh” ngak Danak dak Jalan tapen tathik, piah lang talaih  dom labik gal tavak, jhul pasamar bruk peih ngak saong brei phun jien buh tame ngak di karja. Danak dak atah 25 km, kuhria jien buh tame ngak 3.825 ti dong meng kadung jien Trung uong saong tinh. Tui Akaok UBND tinh Dak Lak Đỗ Hữu Huy ini lac danak dak ngak jalan praong, hu makna dalam bruk  patagok kinh te - xa hoi, quoc phong, peih praong labik ban do thi, yulit saong bruk mbang di tathik.

Tỉnh Vĩnh Long urak ini hu labaih 16.120 hecta glai, dalam nan labaih 456 hecta lac mbuan apui khuah glai. Ralo taneh glai pala phi lao tapen tathik, piah pacang riyak paoh, cuah par, khik caga  labik tapen tathik saong pacang bala meng langik. Pho akaok UBND tinh Vĩnh Long Châu Văn Hòa iew dom bhum palei hu glai brei pasang iek, brei manuac khik saong mac jamraih, ngak siam bruk pacang apui khuah glai dalam bilan thu.

Uy ban Nobel Nauy khan lac, kuhria taong abih tih 287 urang hu palih ruah alin Yai Nobel Hòa bình thun ini. Dalam tuk bruk mesruh metak di dunya saong pambuak bruk ngak mbang dunya gaok kan kandah, Yai Nobel Hòa bình hu makna praong jang. Ndem tal dom urang hu taduan yai, meda hu angan Tong thong My Donald Trump kayua hu rilo urang ngak praong negar karei palih ruah ong. Yai Nobel Hòa bình thun 2026 kuhria brei thau angan di harei 9/10 anak tal.

Jabat Yaok kuhria Australia birau khan lac taneh ia ini hu jaik 28 trieu bhap bini, dalam nan hu jaik 9 trieu urang, sumu haong 32% bhap bini hu ndih tapui di negar langiu. Meyah dut saong thun dahlau bhap bini Australia ndih tapui di negar langiu  tagok 0,5%, tagok samar dut haong bhap bini Australia ndih tapui di taneh ia ini. Tapa nan, yaom lac ngak catang sarak oh brei urang tame negar min daok hu rilo urang mai daok di Australia.

Dalam mbang padeih padei Harei Dunya urang ngak 1/5 tamat di harei 5/5, ban Hàng Châu, Trung Quoc peih ngak “kapol urang canh sat robot” akok meti di taneh ia ini hu 15 urang. Oh lac tacei ba jalan ka tuai damuai di dom labik yulit, robot ngak daong ngak harak gal hukum karja, khik iek samar hadah krah 24 lac 7 harei di dom jalan dalam ban. Langiu di nan, robot meda peih ngak 8 bruk tacei ba nao jalan yau nao, dang veik, vaih gah iew saong gah hanuk./.