Nyaom roya pakat negar Mat tran Negar Viet Nam mbang XI, vaktu 2026 -2031 peih ngak harei 11 -13/5 di Ha Noi haong rilo labik birau siam mekre dalam jalan sahaneng, bruk ngak. Khaw tin di UB pakat negar Viet Nam  di mbang ginum biai harei kabroi 4/5. Ngan haong kadha “Jum pataom - Bhap bini ngak po - Salih birau - Hadah trah - Patagok”. Nyaom roya hu mbaok di 1.138 urang lambaok vakil saong 200 tuai damuai. Sa bruk njauk caik hatai  lac pandar kong nghe tri tue nhan tao AI piah tut angan, gam hu labik parang iek “Mat tran so” saong bruk ngak angaok mang, rik tame salih birau jalan ngak bruk.

Mentri Noi vu daok pambuak bruk haong dom jabat ngak bruk ramik veik palei, kapol dan pho pagam tame, ngak brei takik palei, takik kapol nyaom, khik ka lagaih haong bruk  ngak di yaok bhum palei. Mentri Noi vu  hu Rajaei  jao bruk padang ngak Sarak ramik, bruk ngak di palei, kapol nyaom saong jien bilan tui sarak ngan haong urang ngak bruk di bhum palei, kapol nyaom. Sarak hu roh duah tani tanat, mbuan ngak saong lagaih bruk rah tabiak.

 Labaih 110.000 anek tut angan pakacah, palih ruah labaih 70% anek saih tame bac tal bac 10 di karja di TPHCM, tagok jaik 43.000 adei dut haong thun dahlau. Angka so nan kayua So Pato megru TPHCM khan tabiak. Dahlau di nan, So Pato megru TPHCM brei pabak  5 sang bac  THPT hu UBND TP.HCM mbaoh harak brei padang saong palih truah tame thun bac 2026 - 2027, dalam nan hu Sang bac THPT phuong Đông Hưng Thuận, THPT phường Phú Mỹ, THPT phường Tân Phú, TH - THCS - THPT phường Thới An, THPT phường Dĩ An.

Bilan he thun ini hu kakei dahlau meda hu rilo mbang langik pandiak catang, dui atah di rilo labik, pandiak glong jang dom thun dahlau, mbuan gaok kan kandah dalam radiuk jeng yau bruk nga mbang. Ta-eng Bhum Nam Bo saong Tay Nguyen, langik takik pandiak jang labik karei, min jeng daok glong, meng 34 tal 36 do C,  thu lagu dui atah lavik harei. Njauk caik hatai lac, mbuan rah tabiak yau hangin khang, jakala klak tuk langik salih bilan.

Bhap bini palei Nhì, xã  An Long, tỉnh Đồng Tháp duah mboh sa taphon akok Cò Ốc  atau Cò Nhạn njauk tame hlam njol di mblang hamu jaik metai. Yaok kuhria mboh hu 20  drei akok Cò Ốc, gam ramik hlam njol piah langyah urang ngak bruk ini tui hukum. Akok Ốc lac janih cim daok biak takik hu angan dalam Tapuk bhong meriak Viet Nam.

 Harei kabroi 4/5, LHQ iew brei peih jalan eo tathik Hormuz saong pasiam veik  adat nao mai di jalan tathik. Panuac nan ba tabiak njauk harei Iran taong tame gilai di eo tathik Hormuz saong ngak apui khuah di tapen tathik pajeng menyek di Dom taneh ia di Rập Thống nhất (UAE), brei mboh bruk cuang kandah trak abih kuhria meng tuk padeih patuh phao. Bruk nan rah tabiak hadei tuk Tong thong Mỹ  Donald Trump ba bol lin tathik mai piah peih jalan ka dom gilai daok gal tavak saong ramik pasiam veik jalan tathik.

Dalam harak pathau khan, Apple khan lac urang caong blei iPhone 17 saong mac  tinh MacBook Neo daong ka kong ty duah hu jien tame. Khaw tin ini ngak ka co phieu di Apple tagok jaik 4%. Yau nan min, Apple kakei ka bruk daok kurang chip, tapa nan mboh bruk pabak daok kurang ralo. Langiu di nan, Apple hu khan brei thau ka bruk blei veik co phieu kuhria tui 100 ti dola, piah pakajap hatai jia tame urang buh jien tame.

Gilang pariak Dunya mbaoh harak buh brei 300 trieu USD daong Campuchia pasiam jalan mbak, pakhang bruk  pambuak dom bhum saong ngak siam bruk logistics pakat negar. Tui kuhria mboh dahlau, danak dak  ba kein laba tapak ka labaih 1,6 trieu urang hu mbaok di jalan mbak saong bhap bini. Danak dak jhul pakhang dom bruk kinh te tapa negar, njauk ndem tal lac gah kong nghiep ngak tabiak kaya kan, gah pabah kaya kan saong yulit./.