UB Bhap bini ban raya Ho Chi Minh brei peih danak dak “ATM harak ve anit ranam” daong tuai damuai kan kandah nao metro ka 1 meng jien jak ba rik daong. Tui panuac ba tagok, danak dak brei hu peih ngak iek meng bilan 5-2026, di ga Ben Thanh saong ga Suoi Tien dalam tukvak 2 bilan, dahlau tuk peih praong taong abih jalan. Bruk peih ngak lac pagam dom jamraik kiosk ta-eng di sang ga piah pabak harak ve oh mek jien ka urang ngak bruk, anek saih – sinh vien baoh sang kan kandah.

HĐND tinh Dong Nai brei tapa harak Danak dak Sarak ka jalan buh jien tame ngak Danak dak padang jalan pambuak meng tatua Mã Đà tal jalan Vành đai 4 TPHCM. Danak dak atah labaih 44 km, kuhria jien tame labaih 28.800 ti dong. Bruk padang ngak jalan pambuak meng  tatua Mã Đà tal jalan Vành đai 4 TPHCM hu jeng jalan pambuak praong, tapak meng dom don vi karja gah Barak saong gah Meraong tinh Dong Nai, pabak ka bruk pajeng ba ndap nda, kaya nong…

Gilang khik drap ar Truong Sa bahrau peih padang di xa Cam Lâm, tinh Khanh Hoa (taphia haong Labik Pahadar Bol lin Gạc Ma urak ini). Gilang khik drap ar hu padang di taong abih taneh labaih 17.100 m3, hu thaik thaot “blah layar sron mbon salamat”. Ong Phạm Thanh Liêm, Akaok UB Bhap bini kaoh pulao truong Sa, brei thau gilang khik drap ar oh lac labik khik harak gal banrik ka luac jalan mesuh metak khik tasik kaoh pulao negar blaoh daok brei mboh ka hatai anit ranam di rahra dalam negar pamaong tal Truong Sa.

Tinh Dong Thap daok kuhria ngak harak padang ngak Gilang khik piah drap ar Dong Thap Muoi labaih 700 ti dong, praong labaih 7,8 ha. Gilang khik piah ngak labik parang iek tui 3 kadha praong nan lac: Negar patao Phù Nam saong ilamo Óc Eo; sajarah bhum Dong Thap Muoi; sajarah bruk diukrai di bhum taneh ini. Njauk caik hatai, gilang khik piah  hu pandar kong nghe ngak iek birau piah padang veik bruk peih taneh riya, ceik glai, phun kayau oh labik halei hu pachreih tuai damuai mai rivang iek…

Tinh Ca Mau brei padang “3 asar padai” glaong 24m hu taong abih jien buh tame labaih 20 ty dong, piah pok meyaom bruk pala padai, pok meyaom urang ngak nong, urang hu ciuk rilo kan kandah, glaih glar piah ngak tabiak padai. Gilang khik drap ar ngak tui bruk inem krung pagam haong bruk ba drei tame tapak. Oh lac parang, yaih khan dom kadha ka luac jalan peih taneh, rai phun padai, danak dak daok brei mboh sa labik bhum palei Meraong Negar, hu angan di bhum Ca Mau – Bac Lieu.

Pahadar  250 thun harei Bebat độc lập, dalam bilan padeih hè ini Rajei Mỹ brei dom blah hộ chiếu hu thaik binguk  Tong thong rai ka 47 di taneh ia ini. Blah ho chieu ini, hu yaih khan yau asar kadha  pahadar 250 thun bebat doc lap di Mỹ. Ho chieu lac bruk ngak birau abih hu ba thaik binguk ong Trump hu mboh di ralo labik  jabat saong harak tai lieu di My.

Bruk kinh te Iran daok dalam bruk kanhaj trak kayua kan kandah di mesuh metak. Urak ini yaok trieu urang mbuan gaok bruk lahik jien saong eik lipa. Jien mek tame kuhria tui yaok urang hu trun meng labaih 8.000 USD thun 2012 trun daok 5.000 USD thun 2024. Tui Danak dak Patagok Lien hop quoc, meda hu veik tal 4,1 trieu urang laik tame bruk eik lipa kayua mesuh metak. Khat lahik drap ar jien padai kayua yaok ribau mbang ahaok par taong tame ngak ka rilo urang brei panduan nao. Labaih 23.000 sang mac saong gah ngak mbang pablei salih njauk taong tame.

Dom urang ruak ung thu di Bỉ hu kakei dahlau daok ralo veik dalam dom thun anak tal, ralo kayua bruk kan  kandah rahra bhap bini taha rilo. Tui Jabat ngak bruk gah ruak ung thư, mbiah tal thun 2035, taneh ia ini meda hu jaik 93.000 mbang urang ruak ung thư birau yaok thun, tagok labaih 16.000 mbang dut saong thun 2023. Ung thư  daok jeng ruak pasang iek suai lavik. Di Bỉ, urang diuk hu 5 thun sumu labaih 70%, meng hu dom bruk ngak siam gheih birau di gah  y hoc saong samar pacang caga dahlau aval./.