Harei ini, dom sang bac tiểu học di TP.HCM hu peih bruk brei ka anek saih tal sa tame bac avar piah ngak randap haong bruk bac taa dahlau di tuk tame thun bac bahrau 2024-2025. Di Sang bac Tiểu học Phan Văn Trị, Quận 1 brei mboh, dah page ini, hadei di maong ngak randap mada mblang sang bac, anek saih hu ba tame tal bac, ramik labik daok. Amaik ame hu pang pathau khan dom adat jang yau danak dak bac. Meng harei 26/8 anak tal, abih tih anek saih dom pakat di TP.HCM meda tame bac. Thun bac ini, ban raya HCM hu labaih 1 trieu 7 rituh ribau anek saih, tagok labaih 24.000 adei dut saong thun bac dahlau.

Di tỉnh Vĩnh Long, bruk mikva Khmer hu mbaok tame khik iek puk palei dak harei dak patagok hu siam mekre. Meng hu pathau khan jalan ngak di Đảng, sarak hukum di Karja nan ye mikva sahneng mboh hu yaom glaong di bruk khik caga puk paga, palei negar. Tapa 3 thun peih ngak bruk nan, rahra Vĩnh Long hu khan brei urang jakar thau yaok ratuh bruk, daong taong tayah rilo labik kanjah jhak. Meng rik daong di dom urang hu angan je, bruk urang Khmer hu mbaok tame khik iek puk palei di tỉnh Vĩnh Long hu Mintri Công an lac bruk ba mai kein laba glaong dalam bruk bhap bini khik iek puk paga, palei negar.

Ban sit Óc Eo, huyện Thoại Sơn, tỉnh An Giang lac labik hu rilo urang bangsa takik. Bruk peih ngak dom bruk patrun kan kathaot di danak dak bruk ngak Negar cak rok patagok kinh tế-xã hội bhum bangsa takik saong bhum ceik tukvak 2021-2030 biak hu makna, hu palei caik hatai sangka. Taeng di danak dak ka 1 hu langyah bruk kurang taneh daok, sang daok, taneh ngak mbang pala drak, ia pandar, palei hu daong 9 baoh sang ka sang kathaot, sang jaik kathaot; daong ka 12 baoh sang blei thung caik ia; daong ia pandar ka bhum mikva bangsa takik di puk Tân Đông… Bruk buh jien tame ngak cơ sở hạ tầng pandar yaok harei, pabak ka bruk ngak mbang, pala drah, raidiuk mbang ngui dalam bhum mikva bangsa takik, bhum ceik hu karja palei caik hatai peih ngak haong yaom jien labaih 1 tỷ đồng.

Ong Đoàn Văn Phương, Yam ndok Sở Tài nguyên - Môi trường Tiền Giang brei thau, anak mata, tỉnh brei adat njuk mek cuah di 3 mỏ cuah dalam kraong Tiền di dom xã Hòa Hưng, Mỹ Lương, Hòa Khánh (huyện Cái Bè) piah mek 6 triệu mét khối cuah brei ka bruk ngak jalan Vành đai 3, TP. HCM di puac bilan 8 ni. Tapa duah thau, bruk njuk mek cuah di 3 mỏ cuah nan, karja saong bhap bini jeng pachreih tui. Rilo bruk padang ngak praong di tỉnh Tiền Giang jeng daok caong hu cuah. Nan ye langiu 3 mỏ cuah daok caga mek piah ngak jalan Vành Đai 3, TP. HCM ye dom mỏ cuah daok veik di kraong Tiền jeng njauk hu karja palei brei njuk mek ka nyu siam, lagaih.

Công an phường An Bình, ban Dĩ An, tỉnh Bình Dương hu ngak salah adat jao paok jien 200 triệu đồng ka urang ngak laik. Dahlau di nan, kreih pandiak harei 17/8, saai Đỗ Thanh Hòa saong saai Đinh Quốc Tuấn hu nao tal jabat Công an phường An Bình piah pathau khan saong jao sa paok jien hu 10 xấp, yaok xấp 20.000.000 đồng. Tui pathau khan di dua urang dam, tuk daok padeih radaih cang gom bhong di labik jalan An Bình saong Bình Đường 3, di phường An Bình, ban Dĩ An, dua urang hu mboh sa urang likei ndik radaih mac ngak laik paok jien nan. Yaom lac, dua urang hu kham marat pagui nduac tui piah biyar ka urang ngak laik min oh samu. Bier harei nan, tapa duah thau, Công an phường An Bình hu thau paok jien nan lac jien di saai T ngak laik. Abih tih paok jien hu jao biyar gilac ka urang ngak lahik.

Mintri Hukum saong quyền anek menuac Indonesia harei kabroi  ba tabiak thiết kế passport bahrau njauk di tuk Harei negar di taneh ia ini. Passport bahrau di Indonesia ndung bak ilamu bangsa saong khik kandauk glaong jang. Akaok Mintri Hukum saong quyền anek menuac Yasonna Laoly brei thau, sambo màu hộ chiếu hu salih meng xanh lam - xanh lục tapa bhong meriah saong mbong patih, brei mboh ka hala dok Indonesia. Passport bahrau hu tabiak mbaok di thun anak. Tui yaok pataom thun 2024 di Henley Passport Index hu dak passport Indonesia di labik dang ka 68, ngan saong dom menuac hu miễn thị thực atau hu pabak thị thực tuk nao tal 78 taneh ia.

Urang pan akaok dom taneh ia châu Phi jeng brei mboh bruk haduh hatai ka ruak đậu mùa khỉ daok njom mbak biak samar drah pak bhum taneh ini, gam tui di nan jeng brei thau ka yaom glaong di bruk jum pataom gauk pacang caga jit ruak. Tui Jabat y tế Liên minh châu Phi pathau khan harei kabroi, bhum taneh ini hu mboh abih tih labaih 18 ribau urang medil njom ruak atau hu brei thau ruak dau mua khi meng di akaok thun, dalam nan hu 1.200 urang hu pathau khan tok dalam sa adit, glaong jang abih tih dom urang ruak di dalam thun 2023. Gah Y tế Dunya (WHO) bahrau ba tabiak bruk samar drah ka prein yava di dunya - ini lac tanut brei thau glaong abih di jabat ini.

Bruk kurang dom janih pandap mbang menyum, dalam nan njauk ndom tal di abih lac brah, daok rah tabiak di Nhật Bản, mai meng mbang pandiak thun blaoh ngak ka bruk parabha brah trun rilo. Di dom siêu thị praong yau Life, Frente saong dom labik pablei brah di Tokyo, oh daok mboh brah saong mì. Daok brah ndiuk yaom lac hu mboh min yaok urang tok blei hu 1kg. Dom labik pablei brah brei kreik pabah mbang kayua abih brah./.