Mentri Padang daok pasang iek wek bruk buh jien tame padang jalan pasei pambuak Ban raya Ho Chi Minh tal Ca Mau hu nduac 250km/h. Danak dak kuhria nao tapa 6 bhum palei hu makna dalam nan hu: Ban raya Ho Chi Minh, Dong Thap, Vinh Long, Can Tho, An Giang saong Ca Mau. Ini lac jalan nao hu makna dalam bruk ngak lagaih bruk quy hoach majam jalan pasei pakat negar, piah dui katut tukvak nao mai saong patagok pambuak kinh te bhum. Langiu jalan Ban raya Ho Chi Minh – Ca Mau, Rajaei brei caik dahlau dom jalan hu makna yau jalan pasei peih nduac samar Barak – Maraong, Lào Cai – Ha Noi – Hai Phong saong Bien Hoa – Vung Tau.

Harei roya “ Xuan jum pataom – Tet anit ranam” nethak Athaik Waw rah tabiak di harei 31/1 ini peih ngak danak dak kuhria Tet ka Bhap bini TPHCM. Harei roya hu ngak rilo labik tui asar kadha di Tet piah kuhria tui yaok nyaom kapol. Tapa harei roya, TPHCM brei mboh bruk ngak siam di Mat tran Negar saong dom gah chinh tri - xa hoi dalam bruk ngak, patagok prein khang di bruk jum pataom  taong abih bangsa, pambuak dom gah xa hoi kuhria Tet ka bhap bini. Kuhria abih tih jien Ban raya buh tabiak ngak hu labaih 5.900 ti dong.

Dalam danak dak “Tet Bol lin – Rahra” thun 2026, Mban Pato tacei Bol lin Bien phong tinh An Giang pambuak saong xa Hòa Điền (tinh An Giang) peih bruk alin brei baoh sang Gul pataom ka 2 baoh sang kan kandah di palei Núi Trầu. Yaok baoh sang hu padang praong labaih 36m², jien buh tabiak 60 trieu dong sa baoh sang. Dai ta Doãn Đình Tránh, Phaok Chinh uy Mban Pato tacei Bol lin Bien phong tinh An Giang, brei thau pambak praong hatai anit ranam di bol lin – rahra, patui veik brei mboh, paglaong bruk siam gheih “Bol lin Wa Ho” dalam hatai rahra.

Daok labaih 20 harei tra tal Tet thun nethak Athaik Waw, bruk ngak di dom palei pala bingu meng kan mai di tinh Vĩnh Long dak tuk dak chreih chrai jang. Thun ini, kayua langik  oh lagaih, bingu cuc mam xoi chroh nerang samar aval nan ye urang pala bingu cuc oh duah hu jien laba yau dom thun dahlau. Dalam tinh Vinh Long yaok thu pablei tabiak darak pasar  Tet labaih 12.000 kaya yaok janih; dalam nan bingu cuc mam xoi meng 2,5 - 3 trieu kaya. Urak ini, dom janih bingu yau cuc mam xoi, van thọ, bingu jameng manuk…hu urang blei ralo dut saong thun dahlau.

Rilo urang ngak nong pala pa-aok di ban Can Tho daok tame mbang paik baoh. Urak ini pa-aok cuah Hòa Lộc janih I hu yaom 60.000đ/kg; daok veik hu yaom meng 45.000-50.000đ/kg. Ban raya Can Tho hu labaih 100.000ha pala phun mbang baoh, dalam nan hu jaik 8.400ha phun pa-aok. Kayua hatai caong mbang pa-aok tagok glaong dalam tuk oh ka tame mbang paik baoh, nan daong ka yaom baoh pa-aok daok di tanut hu lagaih ka urang ngak nong.

Yaok pluh trieu urang Mỹ daok gaok kan kandah kayua ribuk tuyet laik kapan di taneh ia ini, ba tal 18 urang metai, ngak gal pacang jalan mbak saong jhul rilo bhum palei tame bruk ngak chip samar dalam tuk langik la-ar. Ribuk tuyet laik kapal jaik 30 cm, meng New Mexico tal New England, me-om bak gah Pur negar Mỹ. Langik la-ar di rilo ban praong trun am 20do C. Dom urang ilamo dut iek kakei langik la-ar meda dui atah tal akaok bilan 2.

Dom urang padang hukum di negar Prang brei buh harak phieu ka du thao pakauk uranaih umo ala 15 thun pandar mang xa hoi, piah pacang khik uranaih anak bruk pandar rilo kaya ndien tu. Dalam tuk mang xa hoi patagok khang dalam dunya. Dom suhsa duh hatai ka bruk uranaih pandar kaya ndien tu biak rilo meda ngak kateik geik bruk patagok saong ngak kurang prein yava hatai glo akaok sahaneng di uranaih si jeng dam jeng dara. Urang jakar Prang caong khin jhul khang tukvak ngak bruk, ngan haong jalan kuhria hu pandar meng akaok thun bac ini.

Ethiopia brei thau pacang hu bruk tamuh jit ruak virus Marbung - nan lac janih virus dreih haong Ebola. Jit ruak hu duah mboh di bilan 11 thun 2025 di ban sit Jinka, atah ban ine Addis Ababa labaih 430 km gah Tây Nam. Meng nan mbiah tal ini, jabat y te kuhria hu abih tih 14 mbang urang ruak, dalam nan hu 9 urang metai. Tui Gah Y te dunya, jit ruak hu pacang tui rilo jalan pakhang saong pambuak khang kajap di Rajaei Ethiopia saong dom taneh ia di dunya./.