Tui Mban Khik iek jalan radaih ndien ndo thi Ban raya HCM, kuhria harei 9/3 anak tal ga Ben Thanh hu peih pakak jalan metro 1 (Ben Thanh - Suoi Tien). Di var pakak hu adat tuol ralaoh kong trinh di JICA saong tuol ralaoh kong trinh njauk caik hatai pakat Ban raya uan raok harei pahadar 50 thun peih paha Maraong nagar, pajum hasa taneh ia. Dalam 10 harei padeih padei Tet Nguyen dan Ula Naih, jalan metro ka 1 pajieng labaih 761.000 mbang tuai damuai, jien mek tame hu 11 ty 7 ratuh trieu ndong. Tuai damuai mai saong jien mek tame glaong abih lac harei 2 bingun Tet saka ia bilan (labaih 120.000 mbang tuai damuai, labaih 1 ty 8 ratuh trieu ndong).

Di dom tỉnh Tiền Giang, Bến Tre baoh kruac bung kalik hijao janih ka sa yaom ala 10 ribau dong sa kilo, trun jaik 10 ribau dong sa kilo dut saong tuk Tet Nguyen dan. Dom janih kruac bung pajaih meng dahlau yaom dua klau ribau dong sa kilo. Tiền Giang saong Bến Tre  lac 2 bhum taneh kruac bung kalik hajao biak ralo di Bhum taneran kraong Cuu Long hu jaik 14 ribau ha. Tukvak tapa, baoh kruac bung ini hu ngak brei praong siam bingi jang  abih di nyu lac hu pala tui jalan hacih sa-at, Viet GAP…pablei tabiak darak pasar rilo taneh ia angaok dunya.

Hu 40 baoh sang kathaot, jaik kathaot bangsa Xơ Đăng daok di 2 xa Đăk Na saong Văn Xuôi, huyen Tu Mơ Rông, tinh Kon Tum hu daong oh mek jien 3.320 phun pajaih sam Ngọc Linh piah patagok kinh te baoh sang. Bruk brei phun pajaih sam Ngọc Linh ngak meng Danak dak pakat nagar patrun kathaot hu kajap karo daong ngak tabiak pandap panda tui talei makna saong kuhria abih tih jien hu yaom jaik 1 ty ndong. 5 thun tapa hu jaik 2.000 baoh sang Xơ Đăng daok di huyen Tu Mơ Rông hu tagok truh kathaot kayua hu daong pajaih sam Ngọc Linh.

UB bhap bini huyen Trần Văn Thời, tỉnh Cà Mau hu ba tabiak yaom jien 3 trieu dong meyaom urang duah mboh, khan brei ka gah chuc nang chap mek urang khik piah, pandar ndien, jru saong dom bruk ngak karei piah taong chap pametai kaya dalam ia. Mbiah tal ini, dalam tinh Cà Mau langyah labaih 500 mbang pandar ndien piah taong chap pametai kaya alam dalam ia.   

Urakni njom ia mbak di kraong Hau tui ia tasik ndik di Bien Dong jaik tame tinh Hau Giang di labik huyen Chau Thanh saong Ban Ngã Bảy ngan haong glaong abih lac 2,2 tal 3,2 ngaok sa rabau. Kuhria mboh meng harei ini tal harei 16/02, njom ia mbak tagok glaong abih meng 3,5 tal 5,5 ngaok sa rabau. Tui gah chuc nang tinh Hau Giang, jalan ia nduac meng kraong Hau daok di tanut biar jang tui kuhria rah tapa ralo thun meng 5 – 10% min jang pabak hu ia taba ka mikva.

Gah Bol lin Phat yao Dan chu Karen di Myanmar ba tabiak duah bruk, dom bang ndang Trung Quoc peih dom blah web ma-in mbia online, labik taong mbai atau sang kuan mbang suan hukum…njauk brei tabiak truh labik ini di puac bilan ini. Dalam tuk nan, karja Myanmar jeng daok pakhang bruk pagui mek urang pablei menyek dauk tame Myanmar, kayua dom bang ndang kham merat palaih nyiak pabak ndien, xang saong menyek diesel meng Thai Lan.

Jaik tal Harei mayut mayau ini jang lac tukvak meda rah tabiak ralo bruk pachot pagat pambak tame hatai anit ranam kayua yau nan jabat chuc nang Australia barau tabiak panuac ghak mikva thau pacang caga klah gaok bala saong lahik jien di dom bruk oh siam. Dalam thun 2024, pachot pagat anit ranam ngak ka manuac bang New South Wales lahik jaik 9 trieu AUD, bang Tay Australia jang kurang lahik jaik 5 trieu AUD. Kong nghe deepfake hu daong khol bleik ngak tabiak dom video yau biak piah nao pachot pagat dom urang daok caong duah ayut drei ranam.

Mỹ birau brei peih 2 kapal haok pajeng urang negar Venezuela tabiak truh negar Mỹ. Ini lac mbang kapal haok pajeng urang negar karei njauk patrauk mbang camereip  kuhria meng tuk bruk hu ginum biai di bilan tha meng blaoh di karja Tổng thống Mỹ Donald Trump saong Tổng thống Venezuela Nicolas Maduro. Karja kayua ong Trump pan kaok jeng atah klak bruk khik iek ngan haong labaih 348.000 urang Venezuela di Mỹ nan lac dom urang njauk mek veik harak ngak bruk saong hadei di nan patrauk tabiak di bilan 4./.