Tui So Lao dong - Thuong binh saong Xa hoi Ban raya Ho Chi Minh, abih tih jien sangka Tet Nguyen dan Ula Naih lac jaik 1.300 ty ndong. Sa dalam dom bruk bahrau di bruk sangka Tet thun ini lac Ban raya Ho Chi Minh tagok tanut sangka ka urang mbang tui sarak saong peih praong bruk sangka ka dom urang rambah metui mejua dalam rahra, piah brei oh daok baoh sang kathaot halei oh hu mbang Tet. Thun ini, Ban raya Ho Chi Minh jeng hu tagok rilo urang umo taha oh hu jien bilan padeih hưu, daong bao hiem xa hoi yaok bilan, daong yaok bilan meng jaik 2.600 paok dalam thun 2024 tagok jaik 4.950 paok.

Di var peih ngak danak dak ngak brei abih baoh sang taik tahak, sang taik tahak di xã Khánh Bình Tây Bắc, huyện Trần Văn Thời harei kabroi 6/2, Pho akok UB bhap bini tỉnh Cà Mau Lê Văn Sử caong khin dom gah, dom pakat sangka kuhria, jhul pakhang bruk peih ngak danak dak sami samar, siam lagaih. Tapa pasang iek, tỉnh Cà Mau hu 4.400 baoh sang taik tahak. Mbiah tal ini, dom bhum palei hu ngak salah 1.095 baoh sang. Tỉnh ini kham merat, mbiah tal bilan 8 anak tal, bruk ngak salah abih sang taik tahak dalam tinh.

Meng bilan 2, langik pandiak jang, ngak mbuan rah tabiak bruk pui khuah glai, piah pacang khik labaih 28.700 ha glai, urang khik iek glai Ba Ria – Vung Tau saong po glai hu pambuak haong dom bhum palei peih tabiak rilo jalan langyah, abih di nyu nan lac dom labik pasak mbuan rah tabiak bruk apui khuah glai. Dahlau nan, tinh hu mbaoh tangin ka jalan pacang caga apui khuah glai haong yaom jien labaih 17 ty ndong. Yaom lac hu bruk srap pagap, gah ngak glai jeng pachreih rahra paglaong ilimo, caik hatai caga haong bruk cuh hala kayau thu, apuh pakak.

Tỉnh ndoan Hậu Giang birau peih bruk jak ba gauk pachreih tui bruk Tet pala phun “Miat miat hadar dhar phol Wa Ho” thun Ula Naih. Dom pakat Kapol Dam dara dalam tỉnh yaok thun kham merat pathau khan, jak ba urang jakar dam dara, urang ndoan tame pala takik 1 phun kayau; yaok sa kapol urang ndoan dam dara taduan takik di nyu 1 danak dak dam dara  pambuak haong bruk ngak mekre labik daok, dak padang mbaok meta palei pala birau. Mbang ini, Tinh doan Hậu Giang hu alin brei 40 paok jien bac “Truac hadah hatai caong khin” piah daong anek saih hu raidiuk kan kandah.

Kong an tinh kien Giang bahrau pambuak haong Balai Bien phong Pabah pambang negar dunya Hà Tiên taduan 24 urang Viet Nam kayua Campuchia bayar. Ini lac dom bruk gaok pachot pagat tapa negar langiu ngak bruk suan hukum saong hu kapul chuc nang Campuchia duah mboh saong mek kareik, jao bayar mai ka negar. Kong an tinh Kien Giang pachreih rahra, abih di nyu nan lac dam dara, brei caik hatai sangka anak dom khau tin pilih ruah oh hu tantu cambaih laih angaok mang xa hoi.

Langik la-ar tame bak/bauk bhum taneh Han Quoc, ngak mboh la-ar.  La-ar ngak ralo urang Han Quoc brei salih jalan nao mai atau plaik takik tabiak gah langiu jalan dalam tukvak ini piah hu siam mekre. Langik la-ar am 24 do C, saong glong abih lac 5 do C. Kuc Kuhria iek langik tasik Han Quoc kakei langik la-ar mbang ini  dui atah, yau nan ye bhap bini brei khik rup pabhap caga dom ruak la-ar lagah laguai.

Tui jabat pasang iek langik tasik Copernicus di Lien minh chau Au, bilan 1 bahrau blaoh lac bilan pandiak abih hu taduan mboh, hu pandiak di mbaok taneh dunya glaong jang 1,75 độ C dut haong tanut dahlau jaman kong nghiep. Bruk ini brei mboh bilan ka 19 gam gam hu taduan mboh langik pandiak tagok glaong. Dom bruk ngak kanjah jhak di langik pandiak oh bhian mboh daok rah tabiak cambaih laih jang. Dalam dunya, dom bruk langik oh lagaih yau langik pandiak dui atah, hajan praong, pandiak bhang saong rabuk khang daok rah tabiak dak harei dak catang.

Labaih 20.000 vien chuc lien bang Mỹ hu tut angan padeih bruk tui danak dak ramik takik urang ngak bruk kayua karja Tổng thống Donald Trump ba tabiak, tal abih harei 6/2. Danak dak ini piah brei cakak trun bruk di rajaei, patak pataom  jien padai tagok tal 100 ti USD. Dom urang tut ngan padeih bruk dalam tukvak meng harei 28/1 tal 6/2 hu taduan jien bilan saong jien daong karei ralo tal 8 bilan atau tal abih harei 30/9./.