Ban raya HCM kuhria caga blaoh tani tanat Tet Ula Naih 2025 ngan haong bruk praong lac sangka bhap bini, khik salamat nagar saong patagok bruk ngak mbang. Phun jien ban raya buh tame ngak labaih 900 ti ndong piah sangka mikva raok Tet. Dom bhum palei jang jak ba labaih 50 ti ndong piah sangka labaih 90.000 urang gaok kan kandah. So Lao dong, Thuong binh saong Xa hoi peih ngak danak dak “Tet pataom mbaok – Xuan jum pataom”, maong iek ka 15.000 baoh sang urang Kong ndoan abih tih 27 ti ndong. Ngan haong nan, danak dak “Harak ve anit ranam – Xuan pataom mbaok” alin harak ve radaih, ve radaih pui, ve kapal ahaok ka 40.000 urang ndoan vien mai palei; “Harei bui sambai urang ngak kong – Darak pasar hatai ranam”, kuhria caga ka 9.500 urang kong ndoan kan kandah. Ban raya jang peih danak dak “Baoh sang urang ngak kong bui sambai raok Tet haong Ban raya HCM”.

Hu 29 labik parang pablei njam patam, pandap kaya bingi karei meng bhum palei, darak Xóm Rẫy lac darak biak gheih ndung bak ilamo di bhum gah Pei negar, pacheih  biak ralo bhap bini tuai damuai mai rivang iek saong blei. Darak  di kreh bhum taneh pala njam patam di xã Tân Nghĩa, huyện Cao Lãnh, tỉnh Đồng Tháp labik dom mblang hamu pala njam patam, tangei saong mariak taphia hamu padai. Tuai damuai meda blei dom pandap yau ahar bhap bini, njam patam that, kaya ikan di palei yaom lap, meng 5.000 - 20.000 đồng. Rilo pandap hu pagam ma QR piah duah thau hu meng halei mai. Nyaom darak Xóm Rẫy lac ilamo siam gheih, gam dang ka tuai damuai  hu thau cambaic laic ka raidiuk bruk ngak di urang ngak apuh hamu, gam daong ka mikva duah hu jien tame meng bruk jirah rivang main.

Tet Nguyen ndan Ula Naih 2025 ni, Lien ndong lao ndong Ban Can Tho alin hadiah paok pandap Tet ka urang kong ndoan, manuac ngak bruk daok kan kathaot. Yaok sa paok pandap hu makna 1 trieu 3 ratuh rabau ndong, dalam nan hu 1 trieu ndong jien mbaok saong pandap panda. Langiu di nan Lien ndoan lao ndong ban jang peih Darak pasar Tet kong ndoan, ni lac mbang ka 3 hu peih ngak danak dak ni, daong ka kong ndoan, urang ngak bruk hu blei pandap siam makre, yaom kaom tani tanat. Tui nan, daok lac sa guan daong ka manuac ngak bruk hu ma-in chreih bui hadei di tuk ngak bruk meng dom bruk ilimo, tamia adaoh, pasram padhih, ma-in tui bhap bini saong Pakacah gauk ngak tapei nung piah alin ka manuac ngak bruk.

Yaom padai di bhum taneran kraong Cuu Long adit tapa trun veik biar gam haong nan, yaom brah pablei tabiak negar langiu jeng trun. Di tinh Bạc Liêu yaom padai trun biar tuk urang ngak hamu daok tame yuak praong hamu padai. Rilo urang blei caik jien kakei blei  dahlau di nan, min urak ini ndok klak jien, blei tui yaom padai di darak pasar. Yaom padai ST25 dahlau di yaom 13.000 đồng sa kilo urak ini trun biar oh ka tal 9.000 đồng sa kilo. Tui ong Tô Thanh Hải, Akok jabat Ngak nong saong patagok palei  huyện Vĩnh Lợi, tỉnh Bạc Liêu, thun ini yaom padai trun biar, kuhria abih jien buh tame ngak, urang ngak hamu daok laba labaih  oh ka tal 20 trieu dong sa hecta.

Piah duh ka darak pasar Tet tui meng kan Ula Naih, saai Phan Minh Luận, urang ngak nong daok xa Long Định, huyen Châu Thành, tinh Kien Giang hu raong ralo ikan praong piah pablei. Urakni, baoh sang saai Luận hu labaih 3 tan ikan ralo pajaih; dalam nan hu 2 pajaih ikan praong lac ikan pra Dầu saong ikan Patih teik trak labaih 20 kg sa drei. Piah hu ikan praong yau ni, langiu di dom danao raong ikan praong 14ha, saai daok duah blei ikan meng di baoh sang raong jaik taphia. Saai Luận nan lac urang ngak nong hu raong ikan piah pablei tabiak darak pasar praong abih di bhum.

Adat rukun mekak praong abih di Ấn Độ angan Kumbh Mela birau peih tabiak harei kabroi ngan haong adat menei ia labik pataom tame gauk di kraong Hằng, kraong Yamuna saong kraong Saraswati. Ini lac adat Hindu praong abih di dunya hu mbaok di labaih 400 trieu urang. Piah duh ka adat nan, Mban peih bruk hu padang  sa dom ging tahaneh mbang di bhap bini brei ka 50.000 urang mai mbang sa guol haong gauk. 68.000 got gom LED hu padang tagok truac hadah tanriak di var ngak adat nan. Canh sat Ấn Độ brei pasang iek gam gam luac harei  melam  piah khik brei salamat ka bruk nan.

Mentri Jalan mbak pajieng ba Han Quoc hu khan sa khau tin makna praong pambak tal hop nden di kapal ahaok Boeing 737-800 di gah kapal ahaok Jeju Air, gaok bala pak mblang kapal ahaok dunya Muan meng harei 29/12/2024. Tui nan, pandap thiet bi ghi khao tin di guan peih ahaok saong ghi am aduk peih ahaok lac padeih 4 minit dahlau tukvak kapal ahaok ginuh tame sa daning mbe tong pak mblang ahaok. Kapul pasang iek di Han Quoc saong My daok duah khau tin habar hop nden padeih pasang iek. Ni lac ka khau tin makna praong piah duah thau ka bruk ngak tabiak bala kapal ahaok.

Dom urang daong padam khuah daok ngak drah samar piah padam hu apui khuah glai biak khang mbang abih yaok ribau baoh sang saong ngak metai takik di nyu 16 urang di labik  Los Angeles, Mỹ. Dalam nan, Cục Pasang iek lam langik di taneh ia ini kakei dahlau hangin khang  gilac veik  dalam adat ini, ngak patagok pauai khuah glai birau veik. Labaih 150.000 urang daok pandon nao labik karei. Labaih 14.000 urang daong padam khuah daok kham merat padam pui. Dalam tuk yau ini, urang jakar iew bhap bini brei ngak njauk tui dom panuac tacei ba pandon nao labik karei saong palaik njaik labik mbuan gaok bala./.