Anak bilan jit ruak kum tamuh di dom negar saong dom urang njauk ruak dak harei dak rilo di gah Barak negar, piah pasang iek jit ruak, So Y te Ban raya Ho Chi Minh pandar dom labik y te pakhang bruk pasang iek dom urang ruak, ngak bruk pathau khan jit samar chip. Rahra mai pasang iek ruak, taong ruak di sang iek ruak brei pacang pabah saong idung, gam haong nan nao klauk jru caga ruak kum, khik hacih sa-at rup pabhap saong takik taom gaok dom urang hu mboh yau njauk ruak. Abih di nyu nan lac rahra brei caik hatai sangka, min jeng oh duh hatai anak jit ruak, brei ngak dom jalan ngak piah pacang khik prein yava piah takik bruk mbuan njauk njom mbak.

Akaok thun 2025, Ca Mau hu veik 18 pandap panda OCOP hu tanut chuan 4 patuk, kuhria abih tih dalam tinh tagok hu 191 pandap OCOP. Tinh Ca Mau kham merat tal abih thun ini hu takik abih 40 pandap OCOP taduan 3 – 4 patuk, ngan haong nan tinh jhul catang bruk pachreih pablei salih, peih praong darak pasar blei pandar dalam saong langiu nagar. Danak dak OCOP hu rik prein daong mek jien meik tame ralo, peih bruk ngak ka mikva, jhul catang bruk patagok kinh te palei pala.

Bol lin Bien phong tinh Kon Tum hu peih ngak rilo bruk ngak siam lagaih daong ka urang bhum tapen negar salih hatai sahaneng, bruk ngak, uak drei tagok truh kathaot. Dom danak dak daong hu lagaih yau ye alin hadiah limo pajaih, tacei ba pala drak, pambuak haong gah ikak kaiy piah pandap panda pablei tabiak hu…Bol lin Bien phong tinh Kon Tum hu mbaok daong bhap bini dalam dom bruk yau ye brei oh daok dom adat cambat oh daok lagaih, padang palei pala bahrau. Dom kham merat di Bol lin Bien phong Kon Tum hu daong paglaong raidiuk daok dang mbang ngui ka rahra, pasiam veik hatai gul pataom  bol lin haong rahra, khik kajap an ninh tapen negar.

Hu taneh pala bingu praong labaih 10.000 ha, thun 2024 mek hu 4 ty 4 ratuh trieu dhan bingu, Ban Đà Lạt, tinh Lam Dong dang akaok nagar di gah pala bingu. Urakni ban hu 400 janih ngan haong yaok rabau pajaih bingu saong kham marat pabak pajaih barau tui meng jalan blei tame nagar hu ban quyen. Tui ong Phan Thanh Sang, Akaok Kapul Bingu Đà Lạt, tui haong langik alam, taneih riya siam, bruk blei pandar dom kong nghe barau mai meng nagar langiu dalam bruk ngak tabiak pandap panda hu ba bruk pala bingu Đà Lạt – Lam Dong patagok sumu haong dom nagar jaik taphia.

Gilang tapuk tinh Đồng Tháp bahrau ba tabiak bruk “Gilang tapuk – Jalan pambuak yulit hijao”. Bruk ini hu ngak dalam thun ini dalam nan hu dom danak dak rah tabiak yaok bilan. Cambaih laih, ngan haong bruk duh ka urang puac tapuk di gilang tỉnh, dalam nan hu: Duah pataom, pabak tapuk, harak mbao vak ka gah yulit, drap ar ilamo…Sa danak dak siam gheih karei lac peih bruk “mbang radaih nduac ilamo” hu angan “Gilang tapuk – Jalan pambuak yulit hijao” di 6 labik, labik yut lit, inem mek sajarah, palei ngak bruk meng kal, kadai kuan pataom gauk. Langiu di nan Gilang tapuk tỉnh daok ngak jeng labik dalam hu tapuk – caraih saong cikuh.

Rajaei Nhat Ban hu khan ka sarak bruk kuhria ngak cambaih laih pambak tal Danak dak palih ruah manuac ngak bruk mai meng nagar langiu, kuhria mboh lac hu peih ngak meng thun 2027. Tui harak kuhria, jien bo manuac nagar langiu bayar ka dom kapul lac ralo abih 2 mbang jien bilan atau parabha tabiak bayar yaok mbang 10% jien bilan dalam 18 bilan. Bruk kuhria ngak jang brei ka dom urang ngak mai meng nagar langiu hu salih bruk hadei 1 tal 2 thun kuhria tukvak mai Nhat Ban ngak bruk. 

Bruk daong duah urang gaok bala daok patui ngak veik biak samar chip hadei bala jaleih taneh rah tabiak di harei 8/2 di palei Kim Bình di ban Nghi Tân, tinh Tứ Xuyên, Trung Quoc. Kuhria tal page harei kabroi 9/2, hu 10 baoh sang saong 1 labik ngak pandap panda njauk kalam dalam haluk, patau; takik abih 29 urang oh ka duah mboh. Tỉnh Tứ Xuyên hu jak ba bol lin, canh sat pan phao karaong, gah padam apui, sangka y te, khau tin ndom meyai piah jhul samar bruk duah chraong daong. Labaih 200 pandap panda chraong daong hu ba mai piah duh ka bruk chraong daong. Tal tuk ini, taong abih hu 95 baoh sang haong 360 urang hu panduan nao daok pak labik salamat.

Tong kong ti khik iek jalan mbak Nam Phi hu khan lac sa mbang gaok bala di tinh Limpopo gah Barak nagar ini ngak plang lahik takik abih 13 urang saong ngak 3 urang njauk rambuac. Jabat chuc nang khan lac dom rup thaik manuac lahik kayua apui mbang nan oh krein mbaok mata thei hu tra saong hu sa mbang xet nghiem AND piah duah thau ka angan dom manuac lahik. Urakni bruk ba tal bala daok hu pasang iek ngak brei cambaic laic./.