Di var biai tui kapol nyaom dalam Roya Dang bo TPHCM mbang ka I, harei 14/10, Akok UB bhap bini TPHCM Nguyễn Văn Được ndem tapak dom bruk praong kayua radaih gan jalan, njom nerak saong ia dauk. Ong sanya brei langyah abih bruk radaih gan jalan di thun 2035. Urak ini, TPHCM daok pataom tame ngak salah Jalan Vanh dai 2, Vanh dai 3 saong daok peih ngak Vanh dai 4 dalam thun anak tal. Tui nan, ban raya padang ngak dom jalan pambuak bruk ngak mbang haong dom tinh yau: Jalan raya 13, Jalan roya 22 saong Jalan roya 1A nao gah Pei negar.

Lien doan Lao dong Ban Can Tho pambuak haong dom don vi peih ngak danak dak “ Radaih pajeng ba anit ranam”, pajeng 20 tân pandap, kuhria tui jien labaih 727 trieu dong daong ka mikva urang urang bhum ribuk di Thai Nguyen. Dalam nan hu mitom, brah, ia tasau limo, ia menyum, ikan, ahar gam dom janih jru, menyek luk saong kaya kan ye te. Bruk daong sumu mai meng Ban Can Tho lac bruk ngak lagaih, rik tame klak rabha kan kandah, pabah prein khang ka mikva urang bhum ia sua yam tapa kan kandah, tani tanat raidiuk.

Bruk glut jaleih daok rah tabiak di ar kraong Tiền xã Tân Long, tinh Dong Thap mbuan ngak khat lahik rilo baoh sang bhap bini. Dahlau di nan, melam 13/10 jaik labik sang ong Trần Văn Ham, ấp Tân Quới, xã Tân Long gkut jaleih atah labaih 30 met, ia ndik mbang tame dalam taneh 20m. Di labik glut jaleih daok hu 11 baoh sang gaok khat lahik. Tui yaok kuhria di So Ngak nong saong Alam moi truong tinh Dong Thap, dalam tinh urak ini rah tabiak 70 labik glut jaleih atah labaih 7km, khik hu jien labaih 500 ti dong piah ramik pasiam.

Dom harei tapa, hajan ia sua gam ia ribuk meng angaok kraong tuh trrun ba tal yaok rituh hecta taneh pala drak di dom xa gah angaok kraong  di bhum Dong Thap Muoi yau Tân Hưng, Vĩnh Hưng, Tân Thạnh (tỉnh Tây Ninh) dauk dalam ia sua. Ia ribuk sua ngak ia dauk 15 ha padai, 2,6 ha durien pala praong 2 thun saong labaih 3 hecta la-u, panat di xã Hưng Tân dauk dalam ia, mbuan lahik abih patih. Nyauk ndem tal, 18 ha taneh pala tamkai di xã Vĩnh Thạnh ia ngak talah ar, urang beik ar, ngak brei tathuak ia. Dom xa Vĩnh Châu, Hưng Điền jeng daok kham ngak kajap ar.

Pasak Daong pala, Khik ramik saong Patagok phun pala di Bein pakat negar Kon Ka Kinh, tỉnh Gia Lai pambuak haong jabat karja brei palao 2 drei laya( kra nduh), 1 drei klan saong 1 drei tê tê Java. Taong abih lac athur glai kayua bhap bini halan hatian jao veik ka jabat chuc nang. Dahlau tuk palao tame glai, dom drei athur nan hu pasang iek ruak hu kajap karo, lagaih diuk rai dalam glai.

Rajaei Indonesia peih bruk paglong prein khang tabiak rilo kaya kan, dalam tuk prein ngak daok biar abih di Bhum Dong Nam A. Urak ini, bruk paglong sumu 2,6% yaok thun, brei mboh dom kan kadah. Meyah oh langyah  hu dom bruk tavak meng lavik mai, kan ngak hu Bruk pamong atah Indonesia ameh 2045. Yau nan ye, rajaei khan brei thau Bruk kuhria taong abih prein ngak bruk pakat negar 2025-2029, piah daong Indonesia jeng sa dalam lime taneh ia ngak mbang kinh te dang akaok di dunya di thun 2045.

Dalam dua harei meng blaoh, dom sang bac di Bhum do thi Manila di Philippines kareik pabah mbang tal bac kayua dom ruak kum saong dreih ruak kum di anek saih. Dalam nan, dom sang bac di karja hu ngak brei hacih anek ruah saong pasang iek dom sang glong rilo tal saong ndap nda kaya kan. Mentri Pato megru Philippines iew dom sang bac kuhria caga pasram tuk megei baoh taneh, dom bruk samar karei saong peih ngak dom jalan khik siam prein yawa saong siam mekre.

Danak daka Patagok Liên Hợp Quốc (UNDP) khan lac, sa dalam dom taneh ia, dalam nan hu dom taneh ia chau Au, Canada, Mỹ saong dom taneh ia Ả Rập, brei mboh bruk sanya daong ka padang veik Gaza. Kuhria jien khat lahik di Dải Gaza tagok tal 70 ti USD, pambuk patau kayau praong labaih 55 trieu tan, sumu labiah 13 kim tu thap Giza. Ta-eng Ban Gaza, 83% dom danak dak padang ngak khut tayak. Bruk kurang kaya mbang, ia hacih saong jit vu y te daok jhul bhap bini rahra tame bruk kan kandah khin hu daong ba./.