Hadei klau bilan pagam, jalan mbak Ban raya Ho Chi Minh peih praong jeng daok hu rilo kan kandah. Tui kuhria, taneh mbaok jalan urak ini bahrau hu labaih 40% dut haong bruk quy hoach Thu tuong mbaoh tangin di thun 2020. Yaok thun, taneh jalan tok tagok veik 0,5-1%, dalam tuk rahra tagok 5% saong radaih di urang menuac tagok tal 7%. Bruk oh samu gauk ini ngak kateik geik dak harei dak praong ka hatang ban raya. Tui Phaok Yam ndok So Padang Ban raya Ho Chi Minh Bùi Hòa An, Ban raya brei hu pataom tame patagok jalan mbak dalam rahra dalam bruk radaih menuac urang tapa 12 trieu. Asal kadha ba tabiak lac hu lagaih ka 3 quy hoach, ngak tabiak bruk di jalan mbak hu lagaih, samar drah jang, duh siam jang ka hatai caong nao mai saong bruk daok dang di rahra.

UB Bhap bini Dac khu Phu Quoc, tinh An Giang birau padang 8 Kapol tui pasang iek dom khu pho. Ong Lê Quốc Anh,  Bi thu Dac khu Phu Quoc mboh lac bruk padang 8 kapol ngak bruk piah pakhang bruk khik iek di karja saong ba sarak di karja hu tame dalam raidiuk bhap bini rilo jang. 8 kapol nan pagap yau tangin atah pambuak karja dac khu, dalam nan hu bruk ngak di Urang dang akaok kapol nan biak praong, brei mboh bruk anit ranam, ngak dahlau.

Piah daong anek saih kathaot baoh sang kan kandah dalam tinh Ca Mau dalam thun bac bahrau 2025-2026, Kadung jien pachreih bac Võ Văn Kiệt hu peih ngak dua mbang alin kaya daong prein nao bac ka anek saih kathaot ngan haong taong yaom kaom labaih 2 ty dong. Tapa 10 thun peih Kadung jien pachreih bac Võ Văn Kiệt hu jak ba hu labaih 46 ty dong, alin labaih 10.000 paok jien pachreih bac, alin 8.000 radaih juak, yaok rituh tapuk siphau, tapuk bac megru saong ndap nda duh bruk bac…daong ka yaok pluh ribau anek saih , sinh vien kathaot, anek saih bangsa takik truh tapa kan kandah, hu nao bac.

Di jalan ar kraong Măng xa Tân Long Hội, tinh Vinh Long rah tabiak glut jaleih di 3 labik, atah labaih 30 m. Glut jaleih 15 baoh sang bhap bini, ia sre 8 danao hlung raong ikan, 5 ha taneh bein pala phun mbang baoh. Ia ndik tagok glong, meda ngak khat lahik trak tal bruk ngak mbang pala drak di bhap bini. Ia tagok glong mbuan dauk  Sang bac Tieu hoc Tan Long Hoi, ngak kan kandah bruk nao mai di gru pato, anek saih. Urak di labik glut jaleih hu veik 2 labik talah saong mbuan glut jaleih dalam tukvak anak tal.

Pasak Pasang iek ruak hakik (CDC) tinh Dak Lak bahrau hu sa urang metai kayua ruak Whitmore di Tieu khu 280, xa Ea Súp. Ini lac mbang njauk ruak ka klau di tinh Dak Lak dalam thun ini saong lac mbang metai akaok meti. Tieu khu 280 hu labaih 100 baoh sang hu jaik 400 urang. Ini lac labik daok di rilo baoh sang rahra panduan mai daok, bruk daok dang hacih sa-at saong pandar y te daok kurang. Dom thun dahlau hu rah tabiak ha sit ha sit dom mbang njom ruak ini. Bruk ini brei mboh takai ruak jeng daok kandaong dalam taneh, ia di labik ini.

Jabat Khik iek Bala Taneh ia Indonesia ba tabiak bruk caga samar chip di kaoh pulao Bali dalam 1 adit tapa, hadei ia ribuk sua ngak khat lahik biak trak di rilo labik. Hadei tuk khan samar drak, jabat ini parabha paok jien daong yaok 1 ti rupiah (labaih 60.700USD), hu gilai caosu saong mac jamraih, kaya mbang, phui men, nem, gam haong rilo mac njuk pruh ia saong leu kadai. Urak ini ia sua ngak takik di nyu 15 urang metai, 6 urang lahik saong labaih 600 bhap bini gaok kan kandah.

Dak harei dak hu rilo anek radaih di Australia lamek bhi atau trak kilo. Tui Kadung jien Uranaih LHQ, 1/3 uranaih dalam meng umo 5 thun tal 19 thun di Australia hu tanut rup pabhap BMI daok dalam bruk labaih kilo atau lamek bhi. Anak bruk ini, Kadung jien Uranaih LHQ brei mboh lac, Australia brei ka hu ba tabiak dom sarak pasang iek tani tanat jang ngan haong kadung ndap nda, dom yaih khan ndap nda, dom sarak daong saong jien je ngan haong ndap nda kaya mbang piah pasiam kaya mbang ka uranaih.

Tui Jabat Gah kapal ahaok Vu tru My (NASA), tapa dut iek langayh mau radaih patau kayua  gilai roh duah patuk sao Hỏa pataom  mek dom inem brei mboh bruk diuk di vi sinh vat meng kan dahlau. Tui NASA, ini meda brei mboh cambaic laic abih ka bruk di vi sinh vat hu mboh di patuk sao Hỏa. Dom urang roh duah mboh lac, njauk ba radaih patau ini trun mai Baoh taneh piah langyah tani tanat, piah thau lac hu biak bruk vi sinh vat daok di patuk bhong ha-oh./.