Ban raya Ho Chi Minh brei salah blaoh bruk langyah, bayar jien tui sarak ka urang jakar, kong chuc saong urang ngak bruk padeih bruk tui Sarak ka 178 saong Sarak ka 67 di Rajaei dahlau harei 31/8 anak tal. Ini lac bruk ngak hu makna piah srap gap ka tukvak bahrau, tuk dom bhum palei brei khik kajap gam ramik patakik kapul ngak bruk gam paglaong ilamo kapul ngak bruk, pabak hatai caong patagok kinh te - xa hoi saong pambuak dunya dak harei dak praong dalam.

Tui Trung uong Kapol Chu thap do Viet Nam, dom mbang urang rik jien ka danak dak daong bhap bini Cuba tagok  rilo, labaih 360 ti dong. Trung uong Kapol Chu thap do Viet Nam taong yaom bruk ngak hu jak jeng siam mekre ini brei mboh bruk pambak praong khang kadang talei rohim jum pataom dunya saong anit ranam daong ba gauk di bhap bini Viet Nam - Cuba. Danak dak hu peih ngak tal ginup 65 harei, meng harei 13 bilan 8 tal abih harei 16 bilan 10.

Dalam thun bac 2025-2026 anek saih dom tal bac 1, 9 saong 12 di tinh Dong Thap brei tame bac meng harei ini (22-8), dom tal bac karei brei tame bac meng harei 29-8. Harei pakak thun bac bahrau rah tabiak di harei 5-9-2025. Hadei tuk pagam tinh Dong Thap hu 1.068 labik pato megru pakat karja saong 36.770 urang daok ngak bruk. Labik dalam thun bac bahrau 2025-2026 di tinh dahlau abih hu khik kajap, srap gap tame thun bac bahrau.

Ca Mau daok peih ngak bruk pambak praong bruk ngak hadang khang kajap, piah brei mboh labik dang di “labik raong rilo hadang” di taneh ia piah bhap bini labik gah meraong Negar yam tagok ngak kaya meda meng hadang. Hadang ngak tabika yaok thun hu labaih 900.000 tấn, jien pablei hadang tabiak negar langiu  kuhria jaik 2,5 ty USD dalam thun ini. Dom urang ilamo mboh lac bruk pagam tame, gah ngak hadang di Ca Mau hu hu labik cak rok patagok khang kajap.

Meng akaok thun tal ini, dalam tinh Dong Nai hu labaih 10 ribau urang ruak pandiak tabiak darah, tagok labaih 6,4 ribau urang dut haong tukvak ini thun dahlau saong hu 3 urang metai. Hu rilo makna ba tal bruk ruak pandiak tabiak darah rah tabiak srau kadau. Dalam nan, tal ini hu rilo xa, phuong oh ka ramik caga hu urang ngak bruk y te, ba tal bruk peih ngak dom bruk pacang caga jit ruak oh ka samu gauk. Tinh Dong Nai brei daong bhum palei dom ndap nda kaya, jamraik piah pasang iek urang ruak, taong ruak siam lagaih, oh luai ka jit ruak tamuh tabiak praong dalam rahra.

Rajaei Thai Lan khan lac, pataom tame prein khang daong ka bhap bini gaok khat lahik kayua bruk mesruh gauk di labik tapen negar Thai Lan - Campuchia. Birau ini, rajaei parabha paok jien daong 100 trieu Baht, sumu labaih 3 trieu USD ka karja 7 tinh bhum taphia negar Campuchia, ba mbuan lagaih ka bhap bini gaok kan kandah hu taduan bruk daong nan samar abih. Tui nan, daong ka bhap bini ramik pasiam sang tayak, samar tani tanat raidiuk. 

Takik abih 13 urang metai saong labaih 40 urang njauk rambuas hadei mbang taong tame dalam harei di Colombia. Dalam rilo yaok pluh thun, taong paoh mesuh metak dalam negar Colombia ngak metai labaih 450.000. Karja Colombia daok tagok dom jalan ngak an ninh saong pasang duah iek urang duas ngak dom mbang taong tame, gam haong nan pagun sanya khik kajap karo salamat ka rahra.

Dom kapal lin daong padam khuah saong bhap bini rahra ban sit Castelo Novo, bhum kreh Bồ Đào Nha daok ngak samar piah padam apai khuah glai khang. Pui khuah mbang abih 274.000 ha glai phun thu druh, glong klau mbang kuhria yaok thun meng thun 2006 tal thun 2024. Oh lac Bồ Đào Nha, rilo taneh ia  chau Au daok gaok kan kandah kayu apui khuah glai. Kuhria meng akaok thun tal ini, apui khuah mbang glai labaih 1 trieu ha di dom taneh ia Lien minh chau Au ( EU)