Ban raya Ho Chi Minh brei peih palih ruah aval urang ka Quoc hoi saong HĐ Bhap bini tukvak thun 2026-2031 di 4 labik. Bruk buh harak phieu rah tabiak meng harei 26/2 tal harei 14/3, duh ka 4.000 urang buh harak phieu lac urang daok di angaok tasik saong urang ngak kong Vietsovpetro. Piah khik kajap quyen di rahra ka dom ka dom urang ngak bruk atah harei angaok tasik, Uy mban palih ruah Ban raya Ho Chi Minh bahrau ba tabiak jalan ngak palih ruah aval di 4 labik dalam 3 phuong, xa: Phước Thắng, phuong Tam Thắng saong xa Long Sơn (jeng daok dalam tinh Ba Ria – Vung Tau klak). Tui dat, tukvak buh harak phieu di taneh riya hu meng mon 17 tuk tal 19 tuk harei 26/2, lac harei 10 bingun Tet nethak Asaih Waw.

Tet Nguyen dan nethak Athaik Waw - Binh Ngo 2026, bruk yulit tinh Tay Ninh mboh chreih chrai hu jaik 395.000 mbang tuai damuai jien mek tame hu labaih 365 ti dong, tagok  khang dut saong tukvak ini thun dahlau, ba mbuan lagaih ka gah yulit dalam tinh patagok samar akok thun. Njauk ndem tal Labik sirah rivang pakat negar Ceik Bà Đen hu labaih 327.000 mbang tuai damuai, tagok 10% dut saong bilan ini thun dahlau. Ini lac labik rivang kakuh poyang, sinh thai pachreih hu rilo bhap bini saong tuai damuai akok thun birau. Langiu di nan, rilo labik karei yau Long Điền Sơn, Chavi Garden, Happy Land, Milan Farm...gam haong dom labik rivang ma-in gah ngak nong, balai padeih takai, labik blei saong pablei kaya.

Dom harei akaok thun bahrau, di dom mbon palei tinh Dak Lak, rilo baoh sang urang Randaiy gilac jal val srap gap ka var huak pataom gauk. Dalam baoh sang atah bhap bini, dom rai rah pataom vil taom dar gauk piah tahanek mbang, ndom meyai, peih akaok camreip meng bruk gul pataom saong pambuak pagam. Dom urang dalam sang daok vil taom dar taphia salao lisei, gam mbang kaya mbang bangi, gam klah rabha asal kadha di thun klak saong payua ka gauk panuac tadhau ayuh thun bahrau. Yaok kaya mbang, yaok kadha hu brei nao jeng daong khik tani tanat bruk daok dang bhap bini. Bruk khik ramik var huak gul pataom akaok thun lac bruk piah bhap bini urang bangsa Randaiy khik ramik ilamo saong pabak bruk pambuak pagam di baoh sang.

Bruk halak halin saong njom ia mbak daok rah tabiak sraw kadau, karja, gah chuc nang saong bhap bini tinh Dong Thap daok ngak tui rilo jalan pacang caga bruk ngak mbang pala drak. Tui So Ngak nong saong Moi truong Dong Thap, halak ray di phun padai chroh nerang di tuk Tet Nguyen dan lac tukvak padai metian – chroh, tathak; hu labik njom ia mbak trak meyah oh pasang iek saong caga samar. Yau nan ye, gah ngak nong kakei juai pruh jru halak tuk takik halak rầy. Dom bhum palei brei tui iek tani tanat dom jit ruak yau: halak mbang hala, halak pluh rup phun, bọ trĩ, ruak ka-iu hala, bilik hala…

Harei 6 bingun Tet, harei padeih padei puac abih dalam mbang padeih padei Tet meng blaoh, mblang kapal ahaok par Tân Sơn Nhất kuhria hu jaik 178.000 mbang tuai damuai, tanut glaong abih meng nan tal ini, truh tapa atah bruk kuhria meng akaok meti dalam tabung glaong hadei Tet. Tui kuhria, yaom lac tuai damuai hu tagok glaong dut haong meng dahlau mai, min bruk di dom sang ga oh biak srau kadau rilo. Tuai damuai rilo meng lac di biar harei, nan bruk rilo menuac urang pataom di labik sang meng ndap nda kaya saong raok radaih taxi, radaih kong nghe.

Dom taneh ia Islam -Hoi giao tame bilan Ramadan. Yau nan min, bilan eik thun ini ba tui sahaneng kuhria rilo ka bruk yaom kaom kaya kan tagok glong saong bruk  haduh hatai ka salamat di rilo labik daok kalin kan. Pak negar Indonesia, taneh ia hu rilo bhap bini Islam abih di dunya ini ngan haong labaih 87% dalam labaih 280 trieu bhap bini rahra tui agama Islam, tame sampahyang di samegik Islam Istiqlal di ban ine Jakarta. Dalam tuk rajaei  taneh ia ini hu tame Hoi dong Hoa Binh  kayua Mỹ  padang ngak, rilo rahra caong khin  dom bruk  pambuak tal Palestine brei mboh njauk tui jalan jum pataom saong pahala.

Rajaei Singapore brei peih praong bruk daong jien padai tagok tal 1.200 dolla Singapore (SGD) ka dom baoh sang diuk rai di baoh sang menuac urang piah pasiam, pagam dom tal pakat ka urang praong thun umo. Kuhria hu labaih 80.000 baoh sang rahra hu mbang tui kein lagaih meng sarak ini. Tui adat, piah hu ginup kein lagaih piah ba drei tame, baoh sang rahra hu takik abih sa urang ngak kong Singapore meng umo 65 thun ba tagok. Dom urang dalam thun umo 60-64 jeng meda hu pasang iek mbaoh tangin meyah gaok kan kandah.

Mbang akok meti di negar Trung Quoc, sa gilai container angan “Trí Phi” ngak salah blaoh taong abih bruk ngak di gilai meng peih nao, mai pataok tame ar tal veik kaya ndap nda tagok bo oh hu manuac ngak bruk, brei mboh bruk ngak hu siam gah pajeng ba tui jalan tathik samar drah. Gilai “Trí Phi” hu pagam jamraih thong minh kayua Trung Quoc roh duah saong ngak tabiak, piah ba tame ngak  bruk pablei salih./.