Dalam labaih 70.000 urang ndoan, urang ngak bruk hu mbaok tame mek panuac, hu labaih 62% njauk hatai ka bruk salih harei padeih padei Harei Pachip Po Hung, 30-4 saong 1-5 jaik tal, piah dui atah tukvak padeih padei. Ini lac bruk mek panuac di urang ndoan, kong chuc, vien chuc, urang ngak bruk di Tong Kapul Ngak bruk Viet Nam. Bruk kuhia hu ini brei mboh hatai caong padeih padei piah urang ngak bruk hu tukvak padeih padei, pabak prein ngak bruk saong sangka raidiuk di baoh sang. Meng bruk ini, Tong Kapul Ngak bruk Viet Nam ba tabiak roh duah bruk lagaih dalam bruk ramik caga harei padeih padei tuk dom mbang padeih padei danak jaik gauk.

Dom jalan langyah piah khik caga saong paglong prein yawa di bhap bini, TS.BS Nguyễn Văn Vĩnh Châu - Pho Yam ndoc So Y te TP.HCM khan brei thau, ban raya hu peih praong tal 168 sang iek ruak saong 38 pasak y te. Piah  hu lagaih, ban raya  padang ngak veik bruk salih pandar taka so di dom pasak y te ban raya 168 balai y te xa, phuong; tui dak ramik veik dom  vi hu ghe laneing ndik  tui cum sang iek ruak piah pakhang pakat y te bhum palei. Bruk praong abih dalam jalan sahaneng khik iek y te urak ini lac danak dak “Iek ruak dahlau ka taong abih bhap bini vaktu 2026-2030”. Salih ka bruk cang bhap bini njauk ruak meng jru ruak, gah y te brei ngak dahlau bruk pasang iek ruak, caga ruak aval dahlau.

Phaok Akaok UB Bhap bini Mat tran Negar Viet Nam Hoàng Công Thủy mai rivang, tadhau ayuh Tet bhap bini Chol Chnam Thmay di mikva urang bangsa Khmer di phuong Trà Vinh, tinh Vinh Long. Ong Hoàng Công Thủy ndom lac, Ndang saong Karja tuk halei jeng brei mboh bruk bangsa, agama lac asal kadha jalan ngak mbuan mbiah, suai atah saong samar chip; lac bruk di sa he thong chinh tri saong dalam xa hoi. Gam haong nan xaong khin urang bangsa Khmer patui veik patagok bruk gul pataom, kham merat uak drei tagok dalam bruk patagok kinh te, padang raidiuk ilamo, daong bhum palei mek hu jayah dom jalan kuhria patagok karo kajap.

Danak Padang ngak bruk ngak nong ngak glai saong yulit bhap bini piah patagok bruk ngak mbang di xã Đắk Phơi, tỉnh Đắk Lắk hu peih ngak kuhria tabiak jiak 1,9 ti dong. Dalam 2 thun, danak dak hu pasang iek jaik 2 ribau hecta phun glai saong  taneh glai, pasang iek 150 baoh sang saong padang 5 bruk  ngak pala glai gam ngak nong, kuhria taneh  praong 2,5 hecta; paglong jalan ngak tabiak kaya hacih hijao. Tapa bruk ngak camereip di danak dak mboh bruk pambuak tal bruk ngak mbang kinh te saong khik caga glai lac bruk pamong atah dhua hu lagaih, piah caga palai kaya glai.

Tui Chi cuc Kraong ribaong tinh An Giang, dalam dom bilan tabung glaong bilan thu meng bilan 2 tal abih bilan 4 thun ini, meda mbuan rah tabiak bruk pandiak bhang, kurang ia. Piah khik kajap bruk pacang ia mbak - khik ia taba, duh ka bruk ngak nong, Chi Cuc Kraong ribaong tnh An Giang brei pambuak haong bhum palei piah pandar braong ia, danao kavei padang ia piah pacang ia mbak, khik ia taba, pasiam ia lagaih; pandar siam lagaih braong ia bhum 4 kieng mata Long Xuyên, tapen tasik An Biên – An Minh, ar pacang U Minh Thượng saong ar pacang Ô Môn – Xà No piah duh ka hatai caong ngak mbang saong daok dang di rahra.

Karja ban ine Bangkok di Thai Lan khan brei thau hu jaik 59.000 mbang urang hu pandar dom labik plaik njiak pandiak peih ngak  dalam 2 adit tapa. Tui Jabat khik iek  do thi Bangkok (BMA), bruk ini brei mboh caong khin di bhap bini dalam bruk duah labik hu salamat, la-ar lahei piah daok. Urak ini, BMA daok peih ngak 313 pasak palik njiak pandiak. Langiu di nan, ban raya padang 272 labik daong palaik njiak di dom bein bingu duk ka  bhap bini.  

Sa urang ngak kong gar gilac luac 2 adit hadei mbang jaleih labang mỏ di bhum pei barak Mexico hu daong ba tgaok. Tong thong negar ini ini ieu lac bruk daong diuk hu urang  ngak bruk di labang mỏ ini lac bruk kan si ngak hu, “khan si je”. Video cuak gilac tuk urang hu kapul daong duah mboh, gar gilac di tanut ia dalam tal ka-ing. Hadei nan, urang ini hu ba tabiak truh labang mỏ meng radaih, hu ma-om vil urang meng sa blah phui khik pandiak pandao rup saong pajeng meng ahaok truc thang tal Sang iek ruak.

Apui khuah mbang abih sa gilang khik piah ba-ar pandar saong ba-ar ka labaih 50 trieu bhap bini di bang California di Mỹ. Tui urang jakar pak ini, apui khuah mbang pakat 6 di page harei 7/4 di ban Ontario, bang California, dalam sa gilang praong labaih 111.000 m2. Kuhria abih tih labaih 175 urang lin daong padam apui gam 20 sruh radaih padam apui, 15 radaih takai nyan, 17 urang tacei ba ngak bruk di labik rah tabiak bala saong rilo urang pasang iek mai ngak bruk./.