Ban raya Ho Chi Minh kuhria peih ngak 7 danak dak pasak kuhria taong abih phun jien labaih 380.000 ty dong di bingun 30/4 jaik tal. Dom danak dak ini hu peih ngak jeng sa bruk patagok lagaih ka hatang, jhul tagok buh jien tame di karja saong pambak tabiak prein cakrok kinh te dalam tukvak bahrau. Tui ông Nguyễn Thanh Toàn, Phaok Yam ndok So Jien padai Ban raya Ho Chi Minh; hu Mbang thuong vu Ban uy, UB Bhap bini Ban raya Ho Chi Minh pato tacei tani tanat, kham marat peih ngak ngan haong hatai pataom tame glaong ka bruk.

Ngan haong bruk paglong jien mek tame meng bruk pablei kaya tabiak negar saong angan je di darak pasar dunya, tinh Vinh Long daok pataom tame ngak brei tani tanat tui taka so, padang ngak ma so bhum pala saong jhul pakhang bruk ngak tabiak kay meng boah durian. Dalam tinh urak ini 72 ma so bhum pala pablei tabiak negar Trung Quoc saong 14 ma taka so papaok. Langiu di nan, dom doanh nghiep saong HTX jhul pakhang bruk buh jien tame dom kaya yau durian caik tuk la-ar, kem durian…langyah bruk pablei durian tuk bilan paik baoh.

Hadei pagam, tinh Dong Thap hu labaih 500 labik sang danaok labaih, hu 4,6%. Min, bruk pasang iek, pandar taneh di karja gaok rilo kan kandah kayua sang daok, taneh labaih rilo min daok kurang harak gal hukum, abih di nyu nan lac harak mbaoh tangin bruk pandar taneh…Kayua nan, UB Bhap bini tinh Dong Thap hu pandar dom so, dom gah, bhum palei brei pasang duah, ba tagok panuac salih bruk di dom jabat tui jalan lagaih, caik dahlau ka gah pato megru, y te.

Hadei tuk duah mboh dom sruh jit ruak ruak tangin, takai, cambuai, pandiak tabiak darah, tagok baoh thuy dau, tinh Dak Lak duah hu dua sruh jit ruak quai bị. Dua sruh jit ruak nan rah tabiak dalam sang bac. Hadei tuk tamuh jit ruak, So Y te tinh Dak Lak samar duah tabiak labik njom mbak, brei jru Cloramin B, pakhang bruk pathau khan, paglong jalan sahaneng ka anek saih saong amaik ame anek saih. Meng akok thun tal ini, di Dak Lak, dom ruak pandiak  tabiak darah, tangin takai cambuai, tagok baoh…sraw kadau.

Tui Cuc Ceik Glai saong pasang iek glai, Mentri Ngak nong saong Alam langik, urak ini dalam negar hu 3.544 xa, phuong daok dalam bhum mbuan apui khuah glai. Dalam nan hu 1.239 xa, phuong hu kakaei caga ka apui khuah glai di pakat 5 – pakat biak kan kandah; tok meng dom bruk sit meda ngak tabiak bruk pui khuah praong. Kayua nan jabat ini pachreih kakei rahra oh cuh apui, oh njuk pakao jaik glai saong dalam glai. Ngan haong dom po glai saong jabat pasang iek patagok bruk nao pasang maong iek, daok khik iek di dom bhum pasak; jah ramik jalan piah pacang apui saong ramik hacih dom janih thu mbuan khuah apui di vil labik rahra daok taphia glai.

Akaok Mentri Kinh te Malaysia brei mboh bruk ngak tui sarak ngak bruk meng atah ngan haong urang jakar meng harei 15/4 oh klaik klaoh bruk ngak mbang kinh te, bo khik hu beuk ngak dalam tukvak yau urak ini. Tui bruk ba tabiak, dom urang jakar kong chuc daok atah labik ngak bruk 8km brei ngak bruk di sang, 3 harei dalam sa adat. Piah ngak njauk adat saong ngak siam bruk, urang jakar ngak bruk di sang brei tame mac jamraih tui iek online tui mon tukvak, pandar mac pasang iek labik daok di phone tangin piah brei thau tukvak ngak bruk.

Rajaei Indonesia daok ba cih tabiak gilac ka gah ngak kong radaih moto meng bruk jhul tagok bruk ngak tabiak saong pablei radaih moto ndien dalam negar, dalam tuk dom radaih moto nduac meng xang meng kal mai hu pamaong tal darak pasar pablei tabiak langiu negar. Sarak ini piah khik tani tanat karo kajap di gah ngak kong, gam haong nan jhul tagok dom gah ngak kong lagaih ba pandar ndien tame ngak. Kayua biak nao oh daok bruk palih ruah halei halei karei langiu bruk salih tapa pandar radaih ndien.

Gah Y te Dunya (WHO) khan brei thau, rilo sang iek ruak di Li-bang meda abih patih kaya ndap nda iek ruak laka kayua labik pabak brei jaik abih hadei dom mang patuh phao karaong di Ixraen dalam dom harei tapa. Urak ini, jien pajeng ba  kaya y te di Li-bang tagok klau mbang. WHO saong Mentri Y te Li-bang daok ba tabik bruk pajeng ba kaya mai ka dom sang iek ruak piah pabak, min kakei lac gah y te di Li-bang daok kham ngak abih prein./.